پی ٹی آئی قیادت کا اجلاس؛ رہنماؤں نے 10 اکتوبر تک لانگ مارچ ملتوی کرنے کی تجویز دے دی

اسلام آباد اور راستوں کی بندش حکومت کی بوکھلاہٹ اور تحریک کی کامیابی ہے، لانگ مارچ میں شمولیت کیلئے جےیوآئی اور پیپلزپارٹی سے بھی رابطے تیز کرنے پر اتفاق کیا گیا

ثنااللہ ناگرہ جمعرات 24 ستمبر 2026 20:48

پی ٹی آئی قیادت کا اجلاس؛ رہنماؤں نے 10 اکتوبر تک لانگ مارچ ملتوی کرنے ..

اسلام آباد (اردوپوائنٹ اخبار تازہ ترین۔ انٹرنیشنل پریس ایجنسی ۔ 24 ستمبر 2026ء ) تحریک انصاف کی قیادت نے 10 اکتوبر تک لانگ مارچ ملتوی کرنے کی تجویز دے دی، پی ٹی آئی رہنماؤں کا کہنا ہے کہ اسلام آباد اور راستوں کی بندش حکومت کی بوکھلاہٹ اور تحریک کی کامیابی ہے۔ میڈیا رپورٹس کے مطابق تحریک انصاف کی اعلیٰ سطحی قیادت کا اجلاس ہوا۔ اجلاس میں بیرسٹر گوہر، سہیل آفریدی، اسد قیصر، سلمان اکرم راجہ، جنید اکبر ودیگر نے شرکت کی۔

اجلاس میں پی ٹی آئی قیادت کی اکثریت نے لانگ مارچ کو 5 سے 10 اکتوبر تک ملتوی کرنے کی تجویز دی۔ اجلاس میں حکومت کی جانب سے راستوں کی بندش کو حکومت کی بوکھلاہٹ قرار دیا گیا۔ اسلام آباد اور شاہراہیں راستے بند کرنے کو تحریک کی کامیابی قرار دیا گیا ہے۔

(جاری ہے)

پی ٹی آئی قیادت کے اجلاس میں اپوزیشن لیڈر محمود اچکزئی اور راجہ ناصر عباس کے کردار پر سخت تحفظات کا اظہار کیا گیا، پارٹی قیادت کے مطابق جے یو آئی (ف) اور پیپلزپارٹی سے رابطے میں ہے۔

اجلاس میں پیپلزپارٹی سے متعلق کہا گیا کہ پی پی قیادت ابھی کھل کر بات نہیں کررہی اور چیئرمین بلاول بھٹو کی وطن واپسی کا انتظار کررہے ہیں۔ اجلاس میں 6 سے 10 اکتوبر کے درمیان اے پی سی بلانے کی تجویز پر بھی غور کیا گیا۔

پی ٹی آئی قیادت جے یو آئی ایف پیپلز پارٹی سے رابطے میں ہے، بریفنگ#ARYNews pic.twitter.com/nl34Q4138D
— ARY NEWS (@ARYNEWSOFFICIAL) September 24, 2026

اسی طرح پارٹی کی سندھ، پنجاب اور بلوچستان چیپٹر کی کارکردگی پر بھی غور کیا گیا ہے۔

اجلاس میں بانی پی ٹی آئی عمران خان کی اسپتال منتقلی اور بشریٰ بی بی کو رعایت ملنے سے متعلق بھی تبادلہ خیال ہوا اور تمام اپوزیشن جماعتوں سے رابطے تیز کرنے پر بھی اتفاق کیا گیا۔ تحریک تحفظ آئین پاکستان کے اعلامیہ کے مطابق اپوزیشن رہنماؤں کی سربراہ تحریک تحفظ آئین پاکستان محمود خان اچکزئی سے ملاقات کی۔ قائد حزب اختلاف سینیٹ سینیٹر علامہ راجہ ناصر عباس جعفری، چیئرمین پاکستان تحریک انصاف بیرسٹر گوہر علی خان اور سینیٹر مصطفیٰ نواز کھوکھر نے قائد حزب اختلاف قومی اسمبلی و سربراہ تحریک تحفظ آئین پاکستان محمود خان اچکزئی سے ملاقات کی۔

ملاقات میں تحریک تحفظ آئین پاکستان کے ترجمان آخوندزادہ حسین احمد یوسفزئی بھی موجود تھے۔ ملاقات کا بنیادی مقصد 27 ستمبر کے لانگ مارچ کی تیاریوں، اس کے انتظامات اور آئندہ کی سیاسی حکمتِ عملی پر مشاورت تھا۔ اس حوالے سے اپوزیشن جماعتوں کے درمیان رابطہ کاری، باہمی تعاون اور مشترکہ لائحۂ عمل کو مزید مؤثر بنانے پر تفصیلی گفتگو کی گئی۔ ملاقات میں خیبر پختونخوا کی موجودہ صورتحال، امن و امان اور صوبائی خودمختاری کو درپیش چیلنجز سمیت ملک کی مجموعی سیاسی صورتحال کا بھی جائزہ لیا گیا۔ اس موقع پر اپوزیشن جماعتوں کے درمیان باہمی رابطوں اور مشاورت کے عمل کو مزید مضبوط اور مربوط بنانے پر اتفاق کیا گیا۔