بلائنڈ کرکٹ ورلڈ کپ کے فائنل میں بھارت نے سنسنی خیز مقابلے کے بعد پاکستان کو ہرا دیا

پیر 8 دسمبر 2014 04:45

کیپ ٹاوٴن(اُردو پوائنٹ اخبارآن لائن۔8دسمبر۔2014ء )بلائنڈ کرکٹ ورلڈ کپ کے فائنل میں بھارت نے سنسنی خیز مقابلے کے بعد پاکستان کو 5 وکٹوں سے ہرا کر ٹائٹل اپنے نام کرلیا۔

(جاری ہے)

جنوبی افریقا کے دارالحکومت کیپ ٹاوٴن میں کھیلے گئے میچ میں پاکستان نے پہلے بیٹنگ کرتے ہوئے مقررہ 40 اوورز میں 7 وکٹوں کے نقصان پر 389 رنز بنائے، قومی ٹیم کے کھلاڑیوں نے بھارتی بولروں کی جم کر دھلائی کی اور گراوٴنڈ کے چاروں اطراف عمدہ شاٹس کھیلے، اوپنر محمد جمیل 102 رنز کی ذمہ دارانہ اننگز کھیل کر سب سے نمایاں بلے باز رہے جب کہ محمد اکرم نے 75، نثار علی نے 56 اور انیس جاوید نے 50 رنز کی شاندار اننگز کھیلی۔

بھارت نے 390 رنز کا مطلوبہ ہدف آخری اوور میں 5 وکٹوں کے نقصان پر پورا کرکے ٹائٹل اپنے نام کرلیا، بھارت کی جانب سے پرکاش جیارمایا نے 82 رنز کی اننگز کھیل کر ٹیم کی کامیابی میں اہم کردار ادا کیا جبکہ کیتن بھائی بابوگھائی پٹیل 76 رنز بنا کر دوسرے نمایاں بلے باز رہے۔