چین ،نرسنگ ہوم میں آ تشزدگی، 38 افراد ہلاک، چھ زخمی

بدھ 27 مئی 2015 06:22

ہینان (اُردو پوائنٹ اخبارآن لائن۔27 مئی۔2015ء)چین کے ہینان صوبے کے ایک نرسنگ ہوم میں آتشزدگی سے کم از کم 38 افراد ہلاک ہوگئے ۔ چینی میڈیا کے مطابق آگ پنگڈنگشان شہر میں پیر اور منگل کی درمیانی شب ایک نجی نرسنگ ہوم میں لگی اور دیکھتے ہی دیکھتے پوری عمارت میں پھیل گئی۔اس میں چھ افراد کے زخمی ہونے کی اطلاعات بھی ہیں۔چینی خبر رساں ایجنسی ژنہوا کے مطابق زخمیوں کو ہسپتال لے جایا گیا ہے لیکن ان میں سے دو کی حالت تشویشناک ہے۔

(جاری ہے)

آتشزدگی کی وجوہات کا ابھی تک پتہ نہیں چل پایا ہے تاہم حکام کے مطابق ابھی بھی لوگوں کی تلاش اور امدادی کام جاری ہے۔چینی ٹی وی سی سی ٹی وی نے اپنے فیس بک صفحے پر آگ کی تصاویر ڈالی ہے جس میں ایک عمارت سے دھوئیں کے مرغولے اٹھتے نظر آ رہے ہیں۔یہ خیال ظاہر کیا جا رہا ہے کہ یہ عمارت کسی پٹرول سٹیشن کے پیچھے ہے۔اس سے قبل چین کے جنوب مشرقی صوبے فوجیان میں ایک کیمیکل پلانٹ میں دھماکے کے سبب خوفناک آتشزدگی ہوئی تھی۔اس سے بھی قبل چین کے جنوبی صوبے گوانگ ڈونگ کے شہر ہوئی ڈونگ میں ایک شاپنگ سنٹر میں آتشزدگی سے کم از کم 17 افراد ہلاک ہوگئے تھے۔