کچھ کھلاڑی ٹیم میں محمد عامر کی واپسی کیخلاف ہیں، پی سی بی نے تسلیم کر لیا ، عامر اپنے رویئے میں عاجزی لائے اور ڈسپلن کا مظاہر ہ کریں ، شہریار خان کی تلقین ، محمد عامر نے بحالی کا پروگرام مکمل کیا ہے ،اپنی غلطی تسلیم کرتے ہوئے معافی مانگی ، ان سے جب جرم سرزد ہوا ان کی عمر 19 برس جبکہ بیک گراؤنڈ پسماندہ تھا، پی سی بی

جمعرات 24 دسمبر 2015 09:01

لاہور(اُردو پوائنٹ اخبارآن لائن۔24دسمبر۔2015ء)پاکستان کرکٹ بورڈ نے آخر کار تسلیم کر لیا ہے کہ کچھ کھلاڑی ٹیم میں محمد عامر کی واپسی کیخلاف ہیں۔پاکستان کرکٹ بورڈ کے چیئرمین شہریار خان نے اسپاٹ فکسنگ کیس کے سزا یافتہ محمد عامر کو تلقین کی ہے کہ وہ عاجزی اور اپنے رویئے میں ڈسپلن کا مظاہرہ کریں۔کھلاڑیوں، میڈیا اورکمنٹیٹرز کی جانب سے محمد عامر کے لئے قومی ٹیم کی راہیں ہموار کرنے پر تنقیدکے بعد پاکستان کرکٹ بورڈ نے وضاحت کی ہے کہ عامر کو کیوں منتخب کیا جا رہا ہے۔

(جاری ہے)

اپنے اعلامئے میں پی سی بی نے کہا کہ محمد عامر نے بحالی کا پروگرام مکمل کیا ہے ، اْنہوں نے اپنی غلطی تسلیم کرتے ہوئے معافی مانگی ، عامر سے جب جرم سرزد ہوا ان کی عمر 19 برس جبکہ بیک گراؤنڈ پسماندہ تھا۔پی سی بی کے اعلامئے کے مطابق آئی سی سی نے محمد عامر کو پابندی ختم ہونے سے چھ ماہ پہلے ہی کھیلنے کی اجازت دی ، محمد عامر نے ڈومیسٹک کرکٹ اور بی پی ایل میں اچھا پرفارم کیا، چیئرمین پی سی بی نے محمد عامر سے ملاقات میں اْن کو مثالی رویہ اپنانے کی تلقین کی ہے جس کی محمد عامر نے یقین دہانی کرائی ہے۔