سعودیہ کی جانب سے پاکستان میں 5 ارب ڈالرکی سرمایہ کاری کا فیصلہ خوش آئندہے، چیئرمین اپٹپما

فیصل آباد (اُردو پوائنٹ اخبارتازہ ترین - اے پی پی۔ 17 اپریل2024ء) چیئرمین آل پاکستان ٹیکسٹائل پراسیسنگ ملز ایسوسی ایشن (اپپٹما) حافظ شیخ محمد اصغر قادری نے پاکستان میں سعودی عرب کی جانب سے پانچ ارب ڈالرکی سرمایہ کاری کے فیصلے کو خوش آئند قرار دیتے ہوئے کہا کہ پاکستان میں مذکورہ سرمایہ کاری سے ملکی معیشت کو سہارا ملے گا جبکہ اس سرمایہ کاری کیلئے وزیر اعظم شہباز شریف، آرمی چیف جنرل سید عاصم منیر اورسابق نگران حکومت کی کاوشیں لائق تحسین ہیں۔

میڈیا سے بات چیت میں انہوں نے کہا کہ سعودی عرب نے ہمیشہ پاکستان کی معیشت کو مضبوط بنانے اور عوام کی فلاح و بہبود کیلئے معاون کردار ادا کیا ہے تاہم پاکستانی اور سعودی تاجروں کیلئے دونوں ممالک کے درمیان مختلف شعبوں میں براہ راست تعاون ناگزیر ہے۔

(جاری ہے)

انہوں نے کہا کہ دونوں ممالک کے کاروباری افراد کو روابط میں بہتری اور قانونی اصلاحات کیلئے ایک فریم ورک کی ضرورت ہے جو سرمایہ کاری کی راہ ہمواراور مختلف شعبوں میں تعاون کے امکانات کو وسیع کرے۔

انہوں نے تجویز دی کہ دونوں ممالک میں مشترکہ تجارتی نمائشوں کے انعقاد اورآزاد تجارتی معاہدہ بھی باہمی تعاون کو مزید بڑھانے کا سبب بن سکتاہے۔انہوں نے کہا کہ پاکستان اور سعودی عرب کے درمیان تجارت کے وسیع مواقع موجود ہیں جبکہ موجودہ معاشی اور سیاسی ماحول نے سعودی عرب کو معاشی ترقی اورپاکستان کی برآمدات کیلئے منافع بخش مارکیٹ بنا دیا ہے۔

انہوں نے کہا کہ پاکستان کے پاس سعودی عرب کے ساتھ ٹیکسٹائل، فارما سیوٹیکل، چاول،چمڑے، سمندری خوراک، ڈیری فارمنگ اوردیگر شعبوں میں تجارتی اور سرمایہ کاری کے تعلقات کو بڑھانے کے وسیع امکانات موجود ہیں جنہیں سعودی عرب کو پاکستان کی برآمدات میں اضافے کیلئے استعمال کیا جا سکتا ہے۔ انہوں نے کہا کہ سعودی عرب ہمیشہ مشکل وقت میں پاکستان کے ساتھ کندھے سے کندھا ملا کر کھڑا ہوا ہے اور اس بار بھی سعودی سرمایہ کاری پاکستان کو موجودہ معاشی بحران سے باہر نکالنے کیلئے مدد گار ثابت ہو گی۔