گزشتہ مالی سال کے دوران پاکستان اورامریکا کے درمیان دوطرفہ تجارت میں اضافہ،

اسلام آباد (اُردو پوائنٹ اخبارتازہ ترین - اے پی پی۔ 24 جولائی2019ء) گزشتہ مالی سال کے دوران پاکستان اورامریکا کے درمیان دوطرفہ تجارت میں اضافہ ریکارڈ کیا گیا ہے، اسی طرح ختم ہونے والے مالی سال میں امریکا میں مقیم پاکستانیوں کی جانب سے ترسیلات زرمیں بھی اضافہ ریکارڈ کیا گیاہے۔ گزشتہ مالی سال کے دوران امریکا بدستورپاکستانی برآمدات کے حوالہ سے سرفہرست رہاہے، چین اوربرطانیہ فہرست میں دوسرے اورتیسرے نمبر پر ہیں۔

پاکستان بیوروبرائے شماریات اورسٹیٹ بنک کے اعدادوشمارکے مطابق مالی سال 2018-19ء میں امریکا کو پاکستانی برآمدات کا حجم 4.032 ارب ڈالررہا جو مالی سال 2017-18ء کے مقابلے میں 4.21 فیصد زیادہ ہے۔ مالی سال 2017-18ء کے دوران امریکا کو پاکستانی برآمدات کا حجم 3.86 ارب ڈالر ریکارڈ کیا گیاتھا۔

(جاری ہے)

اسی طرح گزشتہ مالی سال کے دوران امریکا سے درآمدات میں مالی سال 2017-18 کے مقابلے میں 0.72 فیصد اضافہ ریکارڈ کیا گیاہے۔

اعدادوشمارکے مطابق مالی سال 2018-19ء میں امریکا سے درآمدات کا حجم 2.092 ارب ڈالر ریکارڈ کیا گیا، مالی سال 2017-18ء میں امریکاسے درآمدات کا حجم 2.077 ارب ڈالر رہاتھا۔مالی سال2016.17 ء میں امریکا سے درآمدات کا حجم 2.10 ارب ڈالر رہاتھا۔پاک امریکا دوطرفہ تجارت کے علاوہ امریکا میں مقیم لاکھوں پاکستانی ترسیلات زرکی مد میں قومی معیشیت کے فروغ میں اہم کرداراداکررہے ہیں۔

اس حوالہ سے موجود اعدادوشمارکے مطابق گزشتہ مالی سال کے دوران امریکا میں مقیم پاکستانیوں نے 2.18 ارب ڈالر کازرمبادلہ ملک ارسال کیا جو مالی سال 2017-18ء کے مقابلے میں 20.15 فیصدزیادہ ہے۔ مالی سال 2017-18ء میں امریکا میں مقیم پاکستانیوں نے 1.99 ارب ڈالر زرمبادلہ ملک بجھوایاتھا۔پاکستان تحریک انصاف کے رہنماء سینیٹرفیصل جاوید نے بتایا کہ پاکستان اورامریکا کے درمیان تعلقات میں نمایاں بہتری آرہی ہے۔

انہوں نے کہاکہ وزیراعظم عمران خان کا امریکی حکومت نے گرمجوشی سے استقبال کیا ہے ، اسی طرح امریکا میں مقیم پاکستانی کمیونٹی نے جس طرح وزیراعظم عمران خان کا خیرمقدم کیاہے اس کی مثال نہیں ملتی۔انہوں نے کہاکہ صدرٹرمپ اوروزیراعظم عمران خان کی ملاقات کی تاریخی اہمیت ہے اوراس ملاقات نے خطہ اوردنیاء کو ایک واضح پیغام دیا ہے۔انہوں نے کہاکہ دنیاء دیرینہ اورحل طلب مسائل کے حل کیلئے وزیراعظم کے موقف پرتوجہ دے رہی ہے۔