ایران سے بغیر پابندیوں والی گیس خریدنا چاہتے ہیں،مصد ق ملک

اسلام آباد(اردو پوائنٹ اخبارتازہ ترین۔22 مئی 2024 ) وفاقی وزیر پٹرولیم مصدق ملک کا کہنا ہے کہ ایران سے بغیر پابندیوں والی گیس خریدنا چاہتے ہیں، ایران سے پابندیوں کا مسئلہ حل کرنے کیلئے کوشش کر رہے ہیں۔ حکومت کی ترجیحات میں توانائی کی مناسب قیمت پر بلا تعطل فراہمی ہے۔اسلام آباد میںپاکستان انرجی سمپوزیم سے خطاب کرتے ہوئے وفاقی وزیر پٹرولیم نے کہا کہ پاکستان کو موسمیاتی تبدیلیوں سے بہت زیادہ مشکلات کا سامنا ہے، ہمیں موسمیاتی تبدیلیوں کو روکنے کیلئے کام کرنا ہے۔

پاکستان سالانہ 18 ارب ڈالرز سے زائد توانائی کی درآمدات میں لگا رہا ہے، ہم ملک میں تیل و گیس کی تلاش کا کام تیز کر رہے ہیں، غیر ملکی کمپنیوں کو ملک میں سرمایہ کاری کیلئے خوش آمدید کہتے ہیں۔ اقتصادی ترقی کیلئے انرجی سیکیورٹی بہت ضروری ہے،توانائی کی ضرورت پوری کرنے کیلئے ملکی وسائل کو بروئے کار لانا ہوگا، ترقی کے سفر میں ماحول کو آلودگی سے بچانا ہوگا،پائیدار ترقی کیلئے ہمیں ماحول دوست ٹیکنالوجی کو اپنانا ہوگا، ہم چھوٹی کمپینیز کی کنسورشیم بنانے کیلئے حوصلہ افزائی کر رہے ہیں۔

(جاری ہے)

تابی فریم ورک انتہائی دلچسپ ہے اور ہم اس پر کام کر رہے ہیں۔ توانائی کی ضرورت پوری کرنے کیلئے تاپی گیس منصوبہ انتہائی اہم ہے۔ بیراج میں پانی کے زیادہ بہاو سے پاکستان کی فوڈ سیکیورٹی کو بھی خطرہ لاحق ہوجاتا ہے، ہم نے حال ہی میں سندھ میں بدترین سیلاب دیکھا، ہزاروں گاوں پانی میں بہہ گئے، تو ہمیں ذمہ داری کا مظاہرہ کرنا پڑے گا، یہ ہمارے لئے بڑا چیلنج ہے۔

ان کا کہنا تھا کہ دوسرا استحکام مالیاتی ہے، ہماری کل ایکسپورٹس 30 ارب ڈالر ہے لیکن اگر ہماری توانائی کی در آمد ہی 20 ارب ڈالر ہوگی تو ہم معاملات کو کیسے کنٹرول کریں گے؟ اس طرح کام نہیں کیا جاسکتا۔ ہمیں عدم استحکام کا سامنا ہے، ہم نے استحکام کو دو حصوں میں تقسیم کردیا ہے پہلا ہے ماحولیات استحکام ، ہمارا کاربن پرنٹ صفر ہے، اگر پوری دنیا کا ہیٹ میپ بنایا جائے تو اس میں پاکستان نہیں ملے گا، ہم گلیشیئرز کے دہانے پر واقع ہیں اور موسمیاتی تبدیلی بھی ہو رہی ہے اور موسمیاتی تبدیلی کے ساتھ سب تبدیل ہوجاتا ہے۔

وفاقی وزیر برائے پیٹرولیم مصدق ملک کا مزید کہنا تھا کہ سوال یہ ہے کہ اس مسئلے کو کیسے حل کیا جائے؟ تو سب سے پہلے ہم پیٹرولیم مصنوعات کی پیداوار بڑھانا چاہتے ہیں، ہم اس پر کام کر رہے ہیں، ہم نے مختف پالیسیز بنائی ہیں ، ہم بین الاقوامی پلیئرز کو بھی مدعو کر رہے ہیں کہ وہ ہمارے ساتھ مل کر کام کریں۔