پی آراے ہیڈ کوارٹر میں ادائیگیوں کے آن لائن سسٹم کی افتتاحی تقریب

لاہور(اُردو پوائنٹ اخبارتازہ ترین - این این آئی۔ 16 دسمبر2018ء) ڈالر مہنگا ہونے کا معاملہ وزیر خزانہ اسد عمر کے علم میں تھا اور وہ پہلے ہی اس معاملے پر وضاحت دے چکے ہیں،روپے کو مستحکم کرنے کے لیے کوشاں ہیں، ڈالر کی قیمت مارکیٹ کے ساتھ منسلک ہے،ٹیکس وصولیوں کاڈیجیٹل سسٹم معاشی ترقی میں اہم کردار ادا کرے گا، سیلز ٹیکس کی آن لائن ادائیگی کاروباری طبقہ کے لیے آسانیاں پیدا کرے گی، حکومت پنجاب صوبے میں سرمایہ کاری کے فروغ اور کاروبار میں آسانی کے لیے موافق فضا ہموار کر رہی ہے،دسمبر کے اختتام تک سیلز ٹیکس آن سروسز کی آن لائن، اے ٹی ایم اور فون کے ذریعے ادا ئیگی ممکن ہو گی۔

جلد ہی ایکسائز اینڈ ٹیکسیشن سمیت دیگر اداروں میں ہونے والی تمام وصولیوں کو بھی اس سسٹم کے تحت لایا جائے گا ۔

(جاری ہے)

ان خیالات کا اظہار گورنر سٹیٹ بنک آف پاکستان طارق باجوہ اور صوبائی وزیر خزانہ مخدوم ہاشم جواں بخت نے محکمہ خزانہ کے زیر اہتمام پنجاب ریونیو اتھارٹی میں سٹیٹ بنک آف پاکستان، حکومت پنجاب اور ون لنک کے مابین صوبائی محصولات کی ادائیگیوں کے متبادل ذرائع کے حوالے سے مفاہمتی یادگار پر دستخط کی تقریب کے موقع پر میڈیا سے گفتگو کے دوران کیا۔

گورنر سٹیٹ بنک طارق باجوہ نے پنجاب ریونیو اتھارٹی کاکردگی کو سراہتے ہوئے کہا کہ پی آر اے کا یہ اقدام عام آدمی اور ٹیکس دہندگان دونوں کی ترقی کا سبب بنے گا ۔ انہوںنے کہاکہ اسٹیٹ بنک آف پاکستان کی اسلامی بینکنگ اور مالی معاونت تک ہر ایک کی رسائی کے علاوہ تین بنیادی ترجیحات ہیں جن میں ملک میں کاروبار میں آسانی، چھوٹے اور درمیانے درجے کے کاروبار کا فروغ اور زراعت شامل ہیں ۔

گورنر اسٹیٹ بینک طارق باجوہ نے کہاکہ ڈالر مہنگا ہونے کا معاملہ وزیر خزانہ اسد عمر کے علم میں تھا اور وہ پہلے ہی اس معاملے پر وضاحت دے چکے ہیں،روپے کو مستحکم کرنے کے لیے کوشاں ہیں، ڈالر کی قیمت مارکیٹ کے ساتھ منسلک ہے۔طارق باجوہ کا کہنا تھا کہ سپریم کورٹ نے موبائل ٹیکس ختم کیا جس سے ٹیکس نیٹ پر فرق پڑا، ٹیکس کا ڈیجیٹل نظام ہی خوشحال پاکستان کی ضمانت ہے۔

سیلز ٹیکس کی آن لائن ادائیگی کا سسٹم کاروباری طبقہ کیلئے بہت سود مند ہے۔ٹیکس کا ڈیجیٹل نظام ہی خوشحال پاکستان کی ضمانت ہے۔ انہوںنے کہاکہ حکومت کے سو روزہ پلان میں ڈیجیٹل سسٹم شامل ہے تمام ادائیگیوں کو ڈیجیٹل آن لائن پیمنٹ کی طرف لا رہے ہیں۔صوبائی وزیر خزانہ میڈیا نے کو معاہدہ کی تفصیلات سے آگاہ کرتے ہوئے کہاکہ ٹیکس کے اس جدید نظام کے اطلاق سے ٹیکس دہندگان کو ٹیکس کی ادائیگی کے لیے لائینوں میں کھڑے ہونے یا بنکوں کے چکر کاٹنے کی ضرورت پیش نہیں آئے گی بلکہ وہ ون لنک کے ذریعے گھر بیٹھے ٹیکس کی رقم متعلقہ بنکوں تک ٹرانسفر کر سکیں گے اس کے لیے انھیں کو اضافی خرچ نہیں کرنا پڑے گا۔

انہوں نے کہا کہ حکومتی نظام کو جدید دور کے تقاضوں سے ہم آہنگ کرنے کے لیے اداروں کی ڈیجیٹلائزیشن وقت کی اہم ضرورت ہے ۔صوبائی وزیر نے پنجاب ریونیو اتھارٹی کو ٹیکس کا ڈیجیٹل سسٹم متعارف کروانے والی پہلی صوبائی اتھارٹی کا اعزاز حاصل کرنے پر مبارکباد پیش کی ۔ انہوں نے کہا کہ پنجاب ریونیو اتھارٹی ٹیکس دہندگان کے ساتھ براہ راست رابطے ، دوستانہ رویے اور اپنی سمارٹ سروسز کے ذریعے حکومت کے ویژن کو بھرپورانداز میں سپورٹ کر رہی ہے۔

اس موقع پر چیف سیکرٹری پنجاب یوسف نسیم کھوکھر نے کاروبار میں آسانی کے لیے سہولیات پیدا کرنے کی ضرورت پر زور دیتے ہوئے کہا کہ حکومت مستقبل میں بھی ایسی اصلاحات جاری رکھے گی جن سے صوبے میں معاشی سرگرمیوں میں اضافہ ہو گا اورمعیشت مضبوظ ہو گی۔