راولپنڈی وومین چیمبر آف کامرس کا اسلام آباد آئی سینٹر کیساتھ معاہدہ

ممبران کی سہولت کیلئے آنکھوں اور گائنی کے امراض پر 25فیصد تک رعایت حاصل ہو گی

بدھ 18 اکتوبر 2023 22:23

راولپنڈی (اُردو پوائنٹ اخبارتازہ ترین - این این آئی۔ 18 اکتوبر2023ء) راولپنڈی وومین چیمبر آف کامرس کا اسلام آباد آئی سینٹر کیساتھ معاہدہ طے پا گیا۔ معاہدے کے مطابق ممبران کی سہولت کیلئے آنکھوں اور گائنی کے امراض پر 25فیصد تک رعایت حاصل ہو گی۔ معاہدے کی تقریب راولپنڈی وومین چیمبر آف کامرس کے دفتر میں منعقد ہوئی۔ راولپنڈی وومین چیمبر آف کامرس کی قائمقام صدر مس صبوحی حسین اور اسلام آباد آئی سینٹر کے سی ای او کرنل (ر) ڈاکٹر شہزاد نے معاہدے کی دستاویزات پر دستخط کئے۔

(جاری ہے)

راولپنڈی وومین چیمبر آف کامرس کی سینئر نائب صد ر منتہی شاہ رخ، ایچ آر نورین طارق، جنرل سیکرٹری، اسسٹنٹ جنرل سیکرٹری تقریب میں موجود تھے۔ اس موقع پر خطاب کرتے ہوئے اسلام آباد آئی سینٹر کے سی ای او لیفٹیننٹ کرنل(ر) ڈاکٹر شہزاد سعید نے کہا کہ ڈاکٹرز کا شعبہ خدائی خدمتگاری کا شعبہ ہے اس لئے ہمیں چاہیے کہ ہر طرح کے مریضوں کو بلاتفریق ٹریٹ کریں۔ انہوںنے کہاکہ ضرورت مند لوگوں کے کام آنا چاہیے۔ راولپنڈی وومین چیمبر آف کامرس کیساتھ اسلام آباد آئی سینٹر کا معاہدہ ایک خوش آئند امر ہے۔اسلام آباد آئی سینٹر تمام سہولیات سے آراستہ ہے۔ہسپتال میں مریضوں کو تمام باہمی سہولیات فراہم کر رہے ہیں۔