صنعتی کارکن اور مزدور ملکی معیشت میں کلیدی حیثیت کے حامل ہیں،جدید سہولیات کی فراہمی اولین ترجیح ہے‘ راجہ اشفاق سرور

لاہور ( اُردو پوائنٹ اخبار تازہ ترین۔23 اکتوبر۔2014ء) صوبائی وزیر محنت و انسانی وسائل راجہ اشفاق سرور نے کہا ہے کہ صنعتی کارکن اور مزدور ملکی معیشت میں کلیدی حیثیت کے حامل ہیں، پاکستان کی تعمیر و ترقی میں خون پسینہ ایک کرنے والے محنت کشوں اور ان اہل خانہ کوجدید سہولیات کی فراہمی حکومت پنجاب کی اولین ترجیح ہے، حکومت پنجاب مزدوروں کے لیے رہائش، صحت، تعلیم اور دیگر بنیادی سہولیات کی فراہمی کے لیے تمام وسائل بروئے کار لارہی ہے۔

انہوں نے یہ بات جمعرات کے روز لیبر کالونی ڈیفنس روڈ میں ادارہ سوشل سکیورٹی پنجاب کے زیر اہتمام صنعتی کارکنوں، محنت کشوں اور ان کے اہل خانہ کے لیے 64ملین کی لاگت سے تعمیر کئے جانے والے سوشل سکیورٹی میڈیکل سنٹر، سنٹرل میڈیکل ڈپو اور ڈائریکٹوریٹ آف سوشل سکیورٹی (ساؤتھ )کے افتتاح کے موقع پر منعقدہ تقریب کے شرکاء سے خطاب کرتے ہوئے کہی۔

(جاری ہے)

اراکین صوبائی اسمبلی سیف الملوک کھوکھر اور سائرہ افتخار کے علاوہ سیکرٹری لیبر فرحان عزیز خواجہ، کمشنر سوشل سکیورٹی عشرت علی، ڈی جی طارق اعوان،محکمہ لیبر کے افسران ، ڈاکٹرز ، محنت کشوں ، مزدوروں، صنعت کاروں اور شہریوں کی کثیر تعداد نے تقریب میں شرکت کی۔ صوبائی وزیر راجہ اشفاق سرور نے تینوں منصوبوں کے افتتاح کے بعد تقریب کے شرکاء سے خطاب کرتے ہوئے کہا کہ ان فلاحی منصوبوں کے تکمیل سے مزدوروں بھائیوں اور ان کے اہل خانہ کو ایک ہی چھت تلے تمام بنیادی سہولیات کی فراہمی میں مدد ملے گی۔

انہوں نے کہا کہ آجر اور اجیر حکومت پنجاب کے لیے مساوی اہمیت کے حامل ہیں اورسہ فریقی کاوشوں ورہنمائی کے نتیجہ میں ان اہم منصوبوں کی قلیل مدت میں تکمیل ممکن ہوپائی ہے۔ راجہ اشفاق سرور نے کہاکہ مزدوروں کے مسائل کے حل کے لیے حکومت پنجاب سیاست سے بالا تر ہو کر قومی خدمت کی انجام دہی کا فریضہ انجام دے رہی ہے۔ انہوں نے کہا کہ لیبر کالونی میں قائم کئے گئے میڈیکل سنٹرز میں مزدوروں اور ان اہل خانہ خصوصا خواتین کو علاج معالجہ کی بہترین سہولیات میسر آئیں گی اور انہیں علاج معالجہ کے لیے دور دراز ہسپتال میں نہیں جانا پڑے گا۔

میڈیکل سنٹر میں 5ڈاکٹرز شفٹوں میں محنت کشوں کو طبی سہولیات فراہم کریں گے جبکہ سنٹرل میڈیکل ڈپوبین الاقوامی معیار کے مطابق ادویات سٹور کرنے کی بھرپور صلاحیت رکھتاہے۔جہاں سے ان ادویات کی صوبہ بھر کے سوشل سکیورٹی ہسپتالوں میں ترسیل آسان ہوجائے گی۔ انہوں نے کہا لیبر کالونی میں سوشل سکیورٹی ڈائر یکٹوریٹ کے قیام سے مزدوروں کے مسائل گھر کی دہلیز پر حل کرنے میں بے حد ملے گی۔

تقریب سے رکن صوبائی اسمبلی سیف الملوک کھوکھر،سیکرٹری لیبر فرحان عزیز خواجہ ، کمشنر سوشل سکورٹی عشرت علی اور ڈی جی سوشل سکیورٹی طارق اعوان نے بھی خطاب کیا۔ اس موقع پر محنت کشوں اور اہل خانہ نے لیبر کالونی ان سہولیات کی فراہمی پر حکومت پنجاب اور وزیراعلیٰ محنت راجہ اشفاق سرورکے اقدمات کو بے حدسراہا ۔