خیبر پختونخوا چیمبر آف کامرس اور سمال اینڈ میڈیم انٹرپرائزز ڈویلپمنٹ اتھارٹی پشاورکے درمیان معاہدہ

پشاور(اُردو پوائنٹ اخبار تازہ ترین۔نومبر-2014)خیبر پختونخوا چیمبر آف کامرس اینڈ انڈسٹری کے صدر فواد اسحق اور سمال اینڈ میڈیم انٹرپرائزز ڈویلپمنٹ اتھارٹی پشاور کے چیف جاوید خٹک کے مابین چیمبر ہاؤس میں قائم انڈسٹریل اینڈ ٹریڈ ایڈوائزری سیل کو فعال بنانے اور چھوٹے اور درمیانے درجے کی صنعتوں اور کاروبار سے وابستہ افراد کو ون ونڈو آپریشن کے ذریعے تمام سہولیات اور معلومات فراہم کرنے اور کاروباری طبقے کی کیپسٹی بلڈنگ کے لئے سیمینارز اور ورکشاپس منعقد کرنے پر اتفاق ہوا ہے جبکہ خیبر پختونخوا چیمبر کے صدر فواد اسحق نے صوبے میں چھوٹی صنعتوں کے فروغ کے لئے ملٹی سٹوری بلڈنگ کے قیام کی تجویز پیش کی ہے اور کہا ہے کہ کاٹیج انڈسٹری کو فروغ دیکر بے روزگاری پر قابو پایا جاسکتا ہے ۔

(جاری ہے)

تفصیلات کے مطابق سمیڈا کے صوبائی چیف نے گذشتہ روز خیبر پختونخوا چیمبر کا دورہ کیا اور چیمبر کے صدر فواد اسحق  سینئر نائب صدر عروج احمد انصاری اور نائب صدر حاجی اقبال خان کو سمیڈا کے کردار  اس کے اغراض و مقاصد اور اس ادارے کے تحت ایس ایم ای سیکٹر کی ترقی کیلئے اٹھائے جانیوالے اقدامات سے آگاہ کیا ۔ اس موقع پر سمیڈا کے منیجر راشد امان بھی موجود تھے ۔

جاوید خٹک نے خیبر پختونخوا چیمبر کے صدر فواد اسحق کو بتایا کہ سمیڈا نے ایس ایم ای سیکٹر میں مختلف شعبوں کی 150 فزیبلٹی رپورٹس تیار کی ہیں جبکہ صنعت و تجارت سے متعلقہ شعبوں کی ترقی  روزگار کی فراہمی  کاروباری طبقے کو معلومات اور سہولیات کی فراہمی  بینک قرضوں سے متعلق معلومات اور ERKF فنڈز سے صوبے کی بزنس کمیونٹی کی مالی امداد کے لئے کئی منصوبے شروع کر رکھے ہیں۔

انہوں نے بتایا کہ سمیڈا صوبے میں موجود صنعتوں کی ٹیکنالوجی اپ گریڈیشن  کلسٹر اور پراجیکٹ ڈویلپمنٹ  انٹرپینیورز کی کیپسٹی بلڈنگ اور مختلف شعبوں میں ٹریننگ ورکشاپس کا باقاعدہ اہتمام کر رہا ہے ۔ انہوں نے خیبر پختونخوا چیمبر کے تعاون سے ایس ایم ای سیکٹرکی ترقی کیلئے مزید منصوبوں پر کام کرنے کا عندیہ بھی دیا ۔ خیبر پختونخوا چیمبر کے صدر فواد اسحق نے چھوٹے اور درمیانے درجے کے کاروباری افراد کی ترقی کیلئے سمیڈا کی کارکردگی کو سراہا تاہم انہوں نے کہا کہ سمیڈا چیمبر میں قائم آئی ٹیک کو فعال بنائے اور اس ڈیسک کے ذریعے ایس ایم ای سیکٹر سے متعلقہ کاروباری افراد کو سرمایہ کاری  کاروبار شروع کرنے ایکسپورٹ  ٹیکس نظام سے متعلق معلومات اور ان کی کیپسٹی بلڈنگ کے لئے ٹریننگ پروگرامز شروع کرے ۔

انہوں نے کہا کہ وہ صوبے کے چھوٹے اور درمیانے درجے کے کاروباری افراد کی معاشی ترقی کا عزم لیکر آئے ہیں اور ان کی اولین ترجیح صوبے میں روزگار کے مواقع پیدا کرنا اور چھوٹی اور کاٹیج انڈسٹری کو فروغ دینا ہے۔ اس موقع پر انہوں نے ٹریننگ پروگرامز کے انعقاد اور انٹرپینیورشپ ڈویلپمنٹ کے لئے چیمبر کے سینئر نائب صدر عروج احمد انصاری کی سربراہی میں کمیٹی بھی تشکیل دی اور کہا کہ یہ کمیٹی سمیڈا کے ساتھ مل کر معلوماتی سیمینارز کا انعقاد یقینی بنائے گی ۔ اس موقع پر چیمبر کے سینئر نائب صدر عروج احمد انصاری اور نائب صدر حاجی اقبال خان نے بھی ایس ایم ای سیکٹر کی ترقی کیلئے اہم تجاویز پیش کیں ۔