راولپنڈی چیمبر کا برآمدات میں کمی پر تشویش کا اظہار

راولپنڈی۔ (اُردو پوائنٹ اخبارتازہ ترین - اے پی پی۔ 15 جولائی2017ء)راولپنڈی چیمبر آف کامرس اینڈ انڈسٹری کے قائم مقام صدر راشد وائیںنے ملکی برآمدات میں کمی پر گہری تشویش کا اظہار کرتے ہوئے کہا ہے کہ حکومت پیداواری لاگت میں کمی لائے، غیر روایتی شعبوں میں سرمایاکاری بڑھانے کے لیے سہولتیں فراہم کرے اور نئی منڈیاں تلاش کرے برآمدی اہداف پورے کرنے کے لیے تجارتی پالیسی فریم ورک پر نظر ثانی کی جائے، پالیسی فریم ورک 2015-2018کے تحت برآمدات کا ہدف 35 ارب ڈالر رکھا گیا تھا جو موجودہ حالات میں قابل عمل نہیں لگتا راولپنڈی چیمبر میں تاجروں کے ایک اجلاس سے گفتگو کرتے ہوئے قائم مقام صدر راشد وائیں نے کہا کہ حالیہ بجٹ میں ٹرن اوور ٹیکس میں اضافہ کیا گیا ہے جس سے کاروباری لاگت بڑھے گی پاکستان میں گزشتہ چند برسوں میں پڑوسی ممالک کے مقابلے میں کاروباری لاگت میں اضافہ ہوا ہے جس سے درآمدات میں اضافہ ہو تا چلا گیا ادائیگیوں میں عدم توازن، ری فنڈز میں تاخیر، بجلی مہنگی ہونے، بنیادی ڈھانچے کی کمی اور ٹیکسوں کی بھر مار سے سرمایاکار بھاگنے پر مجبور ہوا ہے سرمایاکاری واپس لانے کے لیے ہنگامی اقدامات کرنا ہوں گے ہمیں مقامی صنعت کی بحالی، اور چھوٹے اور درمیانے درجے کے کاروبار کے فروغ کے لیے مراعات دینا ہوں گی ، قیمتی پتھر، زیورات، انفارمیشن ٹیکنالوجی ، پولٹری اور خدمات جیسے غیر روایتی شعبوں کو ترقی دینا ہو گی ٹیکسٹائل کا شعبہ ملکی برآمدات کا 60فی صد حصہ دار ہے ٹیکسٹائل انڈسٹری کی بحالی کے لیے ہنگامی اقدامات کرنا ہوں گے نرم شرائط پر قرضے دئیے جائیں اور مشینری پر ڈیوٹی اور ٹیکسوں کی مد میںچھوٹ دی جائے۔

(جاری ہے)

اس کے ساتھ ساتھ ہمیں نئی منڈیاں بھی تلاش کرنا ہوں گی علاقائی تجارت کے فروغ کے لیے موثر اقدامات کیے جائیں وسطی ایشیائی ملکوں میں پاکستانی مصنوعات کی مانگ بڑھ رہی ہے ہمیں یہاں فضائی اور زمینی راستوں کی بحالی، براہ راست پروازوں کے آغاز، بہترین ریلوے نیٹ ورک اور سڑکیں بنانا ہو ں گی تاجکستان، ازبکستان، کرغزستان، ترکمانستان اور قزاقستان کے ساتھ دو طرفہ حجم بہت کم ہے ہمیں ان ملکوں میں تعینات کمرشل اتاشیوں کو فعال بنانا ہو گااجلاس میں ، نائب صدعاصم ملک، سابق صدور، مجلس عاملہ کے اراکین اور تاجر نمائندے بھی موجود تھے۔