کوئٹہ، نومنتخب صدر اور ممبران کیساتھ مل کر امپورٹرز ایکسپورٹرز صنعت کاروں ٹرانسپورٹ سے وابستہ افراد کے مسائل کے حل کیلئے ہر ممکن کوشش کرینگے ،عبدالصمد

ْکوئٹہ(اُردو پوائنٹ اخبارتازہ ترین - آن لائن۔ 05 اکتوبر2017ء) چیمبرآف کامرس اینڈانڈسٹریز کوئٹہ کے صدر عبدالصمد نے کہاہے کہ لینڈ روٹس کیلئے ٹیکس ویلیوایشن میں کمی ،وی باک ،ای فارم اور سیکورٹی فورسز کی چیک پوسٹوں پر انٹریز اور ٹھپوں سے متعلق معاملات کے بارے میں جلدمتعلقہ محکموںاور اداروں کے حکام سے ملاقات کرکے امپورٹرز ایکسپورٹرز اور صنعتوں سے وابستہ افراد کو درپیش مشکلات سے آگاہ کرینگے بلکہ اس سلسلے میں چیمبرآف کامرس کے عہدیداران اور ممبران کی تجاویز بھی ان تک پہنچائی جائینگی ۔

ان خیالات کااظہار انہوں نے گزشتہ روز ایوان صنعت وتجارت کوئٹہ بلوچستان میں چیمبرآف کامرس کے پیٹرن انچیف غلام فاروق خان ،سینئر نائب صدر حاجی محمدایوب خلجی ،نائب صدر محمد طاہر خان اچکزئی سمیت ایگزیکٹو ممبران کے ساتھ مشاورتی اجلاس کے موقع پر اظہار خیال کرتے ہوئے کیا۔

(جاری ہے)

اس سے قبل چیمبرآف کامرس کے پیٹرن انچیف غلام فاروق خان کاکہناتھاکہ نومنتخب صدر ،سینئر نائب صدر اور نائب صدر اور چیمبرآف کامرس کے ایگزیکٹو ممبران کے ساتھ مل کر امپورٹرز ،ایکسپورٹرز صنعت کاروں ،ٹرانسپورٹ سے وابستہ افراد اور دیگر کے مسائل کے حل کیلئے ہر ممکن کوشش کرینگے ،انہوں نے کہاکہ بلوچستان کے امپورٹرز ،ایکسپورٹرز اور صنعت کار اس وقت تک ملک کی دیگر اکائیوں کے صنعت وتجارت سے وابستہ افراد کا مقابلہ نہیں کرسکتے جب تک انہیں لینڈ روٹ پر ٹیکس ویلیوایشن میں خصوصی رعایت نہیں دی جاتی ،انہوں نے کہاکہ وی باک ،ای فارم اور سیکورٹی فورسز کی چیک پوسٹوں پر انٹریز سمیت مختلف مسائل کا تجارت سے وابستہ افراد کو سامناہے اس سلسلے میں مشترکہ لائحہ عمل طے کرکے حکام بالا سے بات کرنے کی ضرورت ہے ۔

اس موقع پر اظہار خیال کرتے ہوئے ایوان صنعت وتجارت کے صدر عبدالصمد کاکہناتھاکہ لینڈ روٹ کیلئے ٹیکس ویلیوایشن چمن اور تفتان میں وی باک اور ا ی فارم کے مسائل سمیت سیکورٹی چیک پوسٹوں پر امپورٹ اور ایکسپورٹس کی مال بردار گاڑیوں کی انٹریز ،تجارتی شعبے کو متاثر کررہی ہے اس لئے اس سلسلے میں متعلقہ اداروں کے حکام سے بات چیت کرینگے انہوں نے کہاکہ ایکسپورٹ پر قد غن لگانے کی کسی کو اجازت نہیں دی جاسکتی ،انہوں نے کہاکہ اعلیٰ حکام کے واضح احکامات کے باوجود بھی ٹیکس ویلیوایشن میں 15فیصد تک کمی پر عملدرآمد ممکن نہیں ہوسکاہے ہماری کوشش ہے کہ اس سلسلے میں نہ صرف رعایت کو بڑھایاجائے بلکہ اس پر فوری عملدرآمد کو بھی ممکن بنایاجائے ،انہوں نے کہاکہ اس سلسلے میں متعلقہ حکام سے جلد ملاقات کرکے مسائل کو اٹھایاجائیگا ،انہوں نے کہاکہ فوڈ سیکورٹی کے حوالے سے بھی ہم اپنے خدشات اور تجاویز وفاقی وزیر سمیت دیگر محکمے کے دیگر حکام تک پہنچائینگے ،چیمبرآف کامرس کے سینئر نائب صدر محمدا یوب خلجی کاکہناتھاکہ سیکورٹی چیک پوسٹوں پر امپورٹ اور ایکسپورٹ گاڑیوں کی انٹری اور چیکنگ کا مسئلہ ہو یا وی باک ای فارم اور دیگر تمام کے حل کیلئے ،چیمبر کے ایگزیکٹو ممبران اور دیگر اراکین کے ساتھ مشاورت کرکے لائحہ عمل اختیار کیاجائیگا ہم چاہتے ہیںکہ صوبے میں قانونی تجارت کو فروغ حاصل ہو تاہم بلوچستان کے حالات ملک کے دیگر صوبوں کے مقابلے میں یکسر مختلف ہے اس سلسلے میں اعلیٰ حکام کی توجہ مبذول کرناے کیلئے ہرممکن اقدامات کئے جائینگے ۔

چیمبرآف کامرس کے نائب صدر طاہر اچکزئی کاکہناتھاکہ وی بیک اور دیگر کے متعلق سابقہ پالیسیاں تاحال لاگو ہے جس کے ایکسپورٹ پر انتہائی برے اثرات مرتب ہورہے ہیں اس مسئلے سمیت دیگر بارے متعلقہ حکام سے بات چیت وقت کی اہم ضرورت ہے اس سلسلے میں چیمبر کے سینئر ممبران اور عہدیداران سب کو مل کر چلنے کی ضرورت ہے ۔اس موقع پر چیمبر کے ایگزیکٹو ممبر ان نے مختلف مسائل اور ا ن کے حل کیلئے نومنتخب صدر ،سینئرنائب صدر اور نائب صدر کو تجاویز دی بلکہ ان کے حل کیلئے ہرممکن تعاون کا بھی اعادہ کیا ۔