ایس ای سی پی نے چارٹرڈ ااکائونٹنٹ (ترمیمی) بل 2018 کے مسودہ کی منظوری دے دی

جمعرات 12 اپریل 2018 22:16

اسلام آباد (اُردو پوائنٹ اخبارتازہ ترین - این این آئی۔ 12 اپریل2018ء) سکیورٹیز اینڈ ایکس شینج کمیشن آف پاکستان نے چارٹرڈ اکاونٹنٹ (ترمیمی) بل 2018 کے مسودہ کی منظوری دے دی ہے۔ نیا مسودہ قانونی سازی کے لئے وفاقی حکومت کو بھجوا دیا گیا ہے۔ اس ترمیمی بل کے ذریعے چارٹرڈ اکاونٹنٹ آرڈیننس 1961 میں ترامیم تجویز کی گئیں ہیں۔ اس سے پہلے مذکورہ بل اپریل 2012 میں قومی اسمبلی میں متعارف کروایا گیا تھا تاہم اسمبلی کی مدت مکمل ہونے پر یہ بل آئین پاکستان کے آرٹیکل 76 کے تحت منظوری نہ ہو سکا۔

وزارت خزانہ نے انسٹی ٹیوٹ آف چارٹرڈ اکاونٹنٹ آف پاکستان کے ساتھ مشاور کے بعد، مجوزہ مسودہ قانون دوبارہ سے بھجوانے کی ہدایت کی تھی۔ اس سلسلے میں ایس ای سی پی اور آئی کیپ کی ایک مشترکہ ٹاسک فورس تشکیل دی گئی جس نے مسودہ قانون کا دوبارہ سے جائزہ لیا اور مسودہ قانون میں ضروری ترامیم کی سفارشات پیش کیں۔

(جاری ہے)

ٹاسک فورس کی جانب سے تجویز کی گئی ترامیم کی منظور آئی کیپ کی کونسل نے بھی دی جس کے بعد مکمل مسودہ قانون کو منظوری کے لئے ایس ای سی پی کے کمیشن کو پیش کیا گیا۔

چارٹرڈ اکاونٹنٹ بل 2018 میں کسی بھی تادیبی کارروائی کی خاف اپیل کرنے کا فورم فراہم کیا گیا ہے۔ ایس ای سی پی ایکٹ کی روشنی میں قائم کئے گئے آڈٹ اور سائٹ بورڈ کے حوالے سے ضروری تشریح اور شقیں شامل کی گئی ہیں۔ علاوہ ازیں، لمیٹڈ لائیپلٹی پارٹر شپ ایکٹ 2017 کی روشنی میں چارٹرڈ اکاونٹنٹ کے قانون کا دائرہ کار بھی وسیع کیا گیا ہے۔ مسودہ قانون میں اس سلسلے میں بھی شقیں شامل کرنے کی تجویز دی گئی ہے کہ صرف سرٹیفیکیٹ رکھنے والے اور کمپنیز ایکٹ 2017 کے تحت منظور شدہ اکاونٹنٹ ہی آڈٹ کی خدمات فراہم کر سکیں گے۔

ان ترامیم سے آڈٹریز کی کونسل کو آڈٹ کے معیارات برقرار رکھنے اور انہیں فروغ دینے میں مدد ملے گی۔ اس کے علاوہ بہت سی ایسی شقیں ختم کر دی گئیں ہیں جن کا اب استعمال نہیں رہا تھا۔