سکیورٹیز اینڈ ایکسچینج کمیشن نے پبلک کمپنیوں کے ملازمین کو اسٹاک آپشن کے تحت حصص جاری کرنے کے لئے گائیڈ لائنز جاری کر دیں

ہفتہ 30 اپریل 2016 16:53

اسلام آباد ۔ 30 اپریل (اُردو پوائنٹ اخبارتازہ ترین - اے پی پی۔30 اپریل۔2016ء) سکیورٹیز اینڈ ایکسچینج کمیشن آف پاکستان ( ایس ای سی پی ) نے تمام پبلک کمپنیوں کی جانب سے اپنے ملازمین کو اسٹاک آپشن کے تحت حصص جاری کرنے کے لئے گائیڈ لائنز جاری کر دی ہیں۔آرڈیننس 1984 کے تحت جاری کی گئی ان گائید لائنز میں اسٹاک آپشن سکیم کے انتظامی ڈھانچہ اور ملازمین کو حصص جاری کرنے کا طریقہ کار وضع کیا گیا ہے۔

جاری کی گئی گائید لائنز کے مطابق، ملازمین کمپنی کے حصص ایک مخصوص دورانیے کے اندر ، کمپنیوں کی جانب سے متعین کردہ قیمت کے عوض خرید سکتے ہیں۔ دنیا کے ترقی یافتہ اور ابھرتے ہوئے کارپوریٹ اداروں میں اس اسکیم کے ذریعے ان ملازمین کو سرمایہ کاری کی پیشکش کی جاتی ہے جن کی موجودگی کمپنی کے کاروباری معاملات کے لئے انتہائی اہم ہوتی ہے۔

(جاری ہے)

اس اسکیم کو کمپنیوں میں ملازمین کے معاوضے اور مراعات کے لئے بھی استعمال کیا جاتا ہے ، جس کی وجہ سے ملازمین ان کمپنیوں میں لمبے عرصے تک اپنی خدمات پیش کر تے ہیں۔

جبکہ ملازمین کوکمپنی کی ملکیت میں بھی شراکت داری کے مواقع بھی فراہم کئے جاتے ہیں ، جس سے کمپنی کے کاروباراور پیداوار میں اضافہ ہوتا ہے۔ایس ای سی پی کی جانب سے پیش کیے جانے والے رہنما اصولوں کا مقصد تمام پبلک لمیٹڈ کمپنیوں میں اس اسکیم کے انتظامی ڈھانچے کو مزید بہتر بنانا ہے۔ پیش کردہ اصولوں میں معاوضہ کمیٹی کی تشکیل، کمیٹی کے فرائض و ذمہ داریوں کا تعین،اسکیم کی منظوری کا طریقہ کار، اسکیم میں کیے جانے والے انکشافات ، درخواست نامے کی ترتیب بندی اور درخواست کے ساتھ جمع کیے جانے والی دستاویزات سمیت دیگر اہم ہدایات شامل ہیں۔

ان اصولوں میں اس بات کو بھی شامل کیا گیا ہے کہ اسکیم کے انتظامی ڈھانچے کی تشکیل کے دوران کمپنیوں کے ملازمین اور شراکت داروں کے تحفظات کو مدِ نظر رکھا جائے گا۔ جبکہ تمام پبلک لمیٹڈکمپنیاں اپنے کاروبار کی ترسیل اور ملکی معیشت میں بہتری کے لئے اس اسکیم کو بروے کار لائیں گی۔