یو جی جی امسال بھی ایف پی سی سی آئی کے انتخابات جیتے گا٬حاجی نسیم الرحمان

کراچی (اُردو پوائنٹ اخبارتازہ ترین - این این آئی۔ 15 اکتوبر2016ء)یونائیٹڈ بزنس گروپ (یو بی جی )کے ریجنل چئیرمین حاجی نسیم الرحمان نے کہا ہے کہ امسال انکا گروپ تیسری بار ایف پی سی سی آئی کے سالانہ انتخابات برائے 2017 جیت کر ہیٹ ٹرک مکمل کرے گا جبکہ مفاد پرستوں کو اس بار بھی ناکامی کا سامنا کرنا ہو گا۔ یو بی جی کی دو سالہ کارکردگی سب کے سامنے ہے جبکہ دوسری طرف کئی دہائیوں تک ایف پی سی سی آئی کے وسائل لوٹنے اور ملک بھر کی کاروباری برادری کو چکمہ دینے والوں کا یہ حال ہے کہ انھیں صدارتی امیدوار تک نہیں ملا۔

شکست خوردہ بزنس مین پینل کئی ماہ تک حاجی غلام علی کی قیادت میں یو بی جی کے اتحاد کی بھرپور کوشش کرتا رہا جسے ہمارے قائدین نے مسترد کر دیا۔ یو بی جی کے ریجنل چئیرمین حاجی نسیم الرحمان ایف پی سی سی آئی کیپیٹل آفس میں وفاقی چیمبر کے چئیرمین کوآرڈینیشن ملک سہیل ٬ مردان چیمبر آف کامرس اینڈ انڈسٹری اور مردان چیمبر آف سمال ٹریڈزرکے وفد سے بات چیت کرتے ہوئے کہا کہ مخالف پینل کو صدارتی امیدوار تک نہیں ملا جبکہ یو بی جی کے رہنمائوں نے انھیںگھاس نہیں ڈالی اسلئے چند ماہ قبل بننے والے ایک پینل کے امیدوار کی حمایت کا فیصلہ کیا ہے جو انکی پہلی شکست ہے۔

(جاری ہے)

اس ٹولے کا مسترکہ امیدوار کا یو بی جی کے امیدوار زبیر طفیل سے کوئی مقابلہ نہیں جو اپنی ایمانداری٬ خدمات اور اخلاق کے سبب ملک بھر کی کاروباری برادری میں انتہائی عزت سے دیکھے جاتے ہیں۔ انھوں نے کہا کہ شکست خوردہ عناصر کے کریڈٹ پر کچھ نہیں اسلئے وہ ٹڈاپ کے سی ای او ایس ایم منیر پر جھوٹے الزامات کی بارش کرتے رہتے ہیں۔بزنس مین پینل اور پاکستان بزنس گروپ کے مابین اتحاد نظریات کی بنیاد پر نہیں بلکہ مفادات کی بنیاد پر ہوا ہے مگر اسکے باوجودوہ الیکشن میں تیسری بار شکست کے اندیشہ میں مبتلاء ہیں۔

شکست کی ہیٹ ٹرک سے بچنے کیلئے بے بنیاد الزام تراشی کی آڑ لی جا رہی ہے مگر انھیں کامیابی نہیں ہو گی کیونکہ ملک بھر کے تاجر انھیں پہچانتے ہیں۔ ایس ایم منیر کے خلاف الزام تراشی کر کے سستی شہرت حاصل کرنے کی کوشش امسال بھی ناکام ہو گی۔اپنے سیاہ کارناموں سے پریشان تاجر رہنما ایس ایم منیر کو ہر مسئلے کا ذمہ دار قرار دے رہے ہیں مگر ایسی سازشوں سے تاجربرادری کو دھوکہ نہیں دیا جا سکتا۔اس موقع پر مردان چیمبر اور مردان چیمبر آف سمال ٹریڈرز کے نمائندوں نے غیر مشروط طور پر یو بی جی حمایت کا اعلان بھی کیا۔