سٹیل ملز کے ملازمین نے اسٹیل ملز کو 30 سال کے لیے لیز پر دینے کی تجویز کو مسترد کردیا

کراچی(اُردو پوائنٹ اخبارتازہ ترین - این این آئی۔ 30 جنوری2017ء) پاکستان اسٹیل ملز کے ملازمین نے حکومت کی جانب سے اسٹیل ملز کو 30 سال کے لیے لیز پر دینے کی تجویز کو مسترد کرتے ہوئے اس بات پر زور دیا ہے کہ جن لوگوں نے اس قومی اثاثے کو گھٹنوں پر لاکھڑا کیا، ان کا احتساب کیا جائے۔وزارت خزانہ، نجکاری اور صنعت و پیداوار کو بھیجے گئے ایک خط میں اسٹیل ملز ملازمین کی یونین (سی بی ای)نے مستقبل میں نجی آپریٹرز پر اسٹیل درآمد کرنے پر ریگولیٹری اور اینٹی ڈمپنگ ڈیوٹیز کے مجوزہ نفاذ یا اسٹیل درآمد کرنے پر پابندی سے متعلق بھی سوالات اٹھائے ہیں۔

یونین نے اپنے خط میں اس بات پر بھی حیرت کا اظہار کیا کہ جب اسٹیل ملز عوامی ہاتھوں میں تھی تو بار بار درخواستوں کے باوجود اس طرح کے اقدامات کیوں نہیں کیے گئے۔

(جاری ہے)

یونین نے الزام لگایا ہے کہ گزشتہ 3 سال میں اسٹیل ملز کی مالی حالت بد سے بدتر ہوئی ہے، 30 جون 2013 کے اسٹیل ملز کے نقصانات اور واجبات کا تخمینہ 2 کھرب تھا جو حکومت کی ناکام پالیسیوں اور ترجیحات کے باعث 31 دسمبر 2016 تک بڑھ کر 4 کھرب 15 ارب تک پہنچ گیا۔

اسی بحران کے تناظر میں ورکرز یونین سی بی اے نے الزام لگایا ہے کہ حکومت نے جون 2015 میں زبردستی اسٹیل ملز کو بند کردیا تھا، جب کہ اس کے ملازمین کو حکومت کی جانب سے نشانہ بنایا جا رہا ہے۔ملازمین کا کہنا تھا کہ گزشتہ 3 سال کے دوران سرکاری خزانے کو 215 ارب روپے کا نقصان پہنچانے والے شخص کا احتساب ہونا چاہئیے، اسٹیل ملز میں پیداواری عمل رک جانے کی وجہ سے ملک کے اوپر 1.5 ارب امریکی ڈالر قرضہ ہوگیا۔

ملازمین نے دعوی کیا کہ اسٹیل ملز اب بھی ایک گھنٹے میں 30 لاکھ روپے کی پیداوار دینے کی صلاحیت رکھتی ہے، ورکرز کے مطابق خام مال نہ ملنے، گیس کی فراہمی نہ ہونے اور حکومت کے ذمے دیگر لاجسٹکس مسائل کی وجہ سے نقصان ہو رہا ہے۔ملازمین کے خط میں کہا گیا کہ حاضر سروس اور ریٹائرڈ ملازمین تنخواہوں کی عدم ادائیگی، میڈیکل سہولیات اور ریٹائرمنٹ کی مراعات نہ ملنے کی وجہ سے متاثر ہو رہے ہیں جب کہ متعلقہ وزارت خاموش تماشائی بنی ہوئی ہے۔

یونین نے الزام عائد کیا کہ اسٹیل ملز کی 157 ایکڑ زمین پورٹ قاسم اتھارٹی کو 90 لاکھ روپے فی ایکڑ پر فراہم کی گئی ہے، جب کہ اس زمین کی قدر 3 کروڑ فی ایکڑ ہے۔علاوہ ازیں خط میں نجکاری کمیشن کو درخواست کی گئی ہے کہ جولائی تا دسمبر 2015 کے درمیان آڈیٹر جنرل کی جانب سے کیے گئے آڈٹ میں مالی بے ضابطگیوں کی رپورٹس سامنے آنے کے باوجود کسی بھی ذمہ دار شخص کے خلاف اب تک کارروائی نہیں کی گئی۔