پروفیسر ڈاکٹر اقرار احمد خاں نے لیبارٹری گرلز ہائی سکول و کالج سسٹم میںکالج کی نئی تعمیر ہونے والی بلڈنگ کا افتتاح کردیا

فیصل آباد(اُردو پوائنٹ اخبارتازہ ترین - آن لائن۔ 10 اپریل2017ء) زرعی یونیورسٹی فیصل آباد کے وائس چانسلر پروفیسر ڈاکٹر اقرار احمد خاں نے لیبارٹری گرلز ہائی سکول و کالج سسٹم میںکالج کی نئی تعمیر ہونے والی بلڈنگ کا افتتاح کیا۔ جس میں 7کلاس روم، 3 لیبارٹریز شامل ہیں۔ ڈاکٹر اقرار احمد خاں نے کہا کہ قوموں کی ترقی کا انحصار معیاری تعلیم اور تربیت یافتہ افرادی قوت پر منحصر ہے۔

جس کے لئے حکومتی سطح پر تمام کاوشیں بروئے کار لانے کے ساتھ ساتھ عوام میں تعلیم کی اہمیت بارے شعور بیدار کرنے کے لئے عملی اقدامات ناگزیر ہیں۔ انہوں نے کہا کہ ملک میں اس وقت 30فیصد سے زیادہ بچے وسائل کی کمی کے باعث تعلیم کی نعمت سے محروم ہیں۔ انہوں نے کہا کہ زرعی یونیورسٹی لیبارٹری سکول و کالج سسٹم کے دائرہ کار کو یونیورسٹی کے سب کیمپسز ٹوبہ ٹیک سنگھ، بورے والا اور دیگر شہروں تک وسعت دی جا رہی ہے تاکہ مقامی افراد کو ان کی دہلیز پر معیاری تعلیم سے منور کیا جا سکے۔

(جاری ہے)

ان کا کہنا تھا کہ طلباء کو جدید رجحانات اور سائنسی ترقی سے روشناس کروانے کے لئے ہر ممکن وسائل بروئے کار لائے جا رہے ہیں۔ خواتین میں تعلیم کو فروغ دے کر نہ صرف تربیت افراد یافتہ افرادی قوت میسر آ سکے گی بلکہ آنے والی نسلوں پر بھی مثبت اثرات مرتب ہوں گے۔ ان سے قبل پرنسپل سکولز ڈاکٹر خلیل الرحمان نے کہا کہ طلباء میں کردار سازی کو پروان چڑھانے کے لئے ہرممکن کوشش کی جا رہی ہے۔

ملک میں شرح خواندگی ترقی یافتہ ممالک کی نسبت کافی کم ہے جس کے لئے لوگوں میں شعور اجاگر کرنا وقت کی اشد ضرورت ہے۔ سکول میں تعلیم کے معیار کو مزید بہتر بنانے کے لئے ٹیچرز، والدین کی میٹنگ کے لئے روزانہ ایک گھنٹہ مختص کیا گیا ہے جس میں والدین اساتذہ کے ساتھ مل کر بچوں کی تعلیم میں درپیش مسائل کے حل کے لئے حکمت عملی وضع کرتے ہیں۔ ترقی پسند کاشتکار ڈاکٹر منظور ٹھاکر نے طلباء پر زور دیا کہ ان کو زندگی میں آگے بڑھنے کا ایک مقصد ہونا چاہیے جس کے تحت ذمہ دار شہری بن کر انسانیت اور ملک کو درپیش چیلنجز سے نبردآزما ہونے میں مدد ملے گی۔

سکول کی پرنسپل شہلا حماد نے کہا کہ لیبارٹری گرلز ہائی سکول بورڈ میں ہر سال پوزیشنز لینے کا اعزاز حاصل کرتا ہے۔ اس سال بھی آٹھویں میں بھی فائزہ نے ضلع بھر میں پہلی پوزیشن لے کر سکول کا نام روشن کیا ہے۔ انہوں نے کہا کہ طلباء کی خداداد صلاحیتوں کو اجاگر کرنے کے لئے غیرنصابی سرگرمیوں کا انعقاد باقاعدگی سے کیا جا رہا ہے تاکہ طلباء کو اپنی صلاحیتیں عوام کے سامنے پیش کرنے کا موقع مل سکے۔