عید میلاد النبی صلی اللہ علیہ والہ وسلم کیسے منایا جائے

آپ ﷺ نے زندگی گزارنے کے لئے ہمیں ایک مکمل ضابطہ ء حیات دیا. اللہ کے حقوق سے لے کر حقوق العباد تک ہر معاملے میں رہنمائی فرمائی. آپ ﷺکی رہنمائی کا، دائرہ کار چند انسانوں کے لئے نہیں بلکہ پوری انسانیت کے لئے تھا. وہ پیغام جو آپ ﷺنے دیا. اس کا، مقصد اللہ تعالیٰ کے ساتھ تعلق اور قرب و خوشنودی الہی کا حصول تھا.
آپ ﷺ نے زندگی کے ہر معاملے میں خود عمل کر کے دکھایا.

عائلی زندگی ہو یا پڑوسیوں کے حقوق، سپہ سالار ہوں یا معلم، پڑوسیوں کے حقوق ہوں، یا بیماروں کی تیمارداری، حاکم ہو یا تاجر. دوستوں کے ساتھ محبت کی بات ہو   یا دشمنوں کے ساتھ سلوک، جانوروں پر رحم، ہرمعاملے میں آپ ﷺ نے رہنمائی کا ایسا عملی نمونہ پیش کیا جس کی نظیر نہیں ملتی.

(جاری ہے)

 
آپ ﷺ کی پر اثر شخصیت کے سحر سے کوئی متاثر ہوئے بغیر نہ رہ سکا.

دعوت دین سے پہلے بھی آپ ﷺکی پر اثر  شخصیت کا ہر کوئی معترف تھا. آپ اپنے صدق و امانت کی وجہ سے صادق اور امین مشہور تھے.
 آپ ﷺ دنیا کی عظیم ترین اور  سب سے بااثر شخصیت رہے اور ہیں. اور آپ ﷺکی سیرت پر عمل کرتے ہوئے ایسی شخصیات سامنے آئیں جو حق کے راستے پر چلیں. جو آپ ﷺکے ہر قول ہر حکم پر عمل کے لئے یوں تیار کھڑے ہوتے کہ اس کے سوا ان کی زندگی کا کوئی مقصد نہیں تھا.

جو حق کے راستے پر نہ صرف چلے بلکہ اس راستے میں آنے والی تمام مشکلات و مصائب کو خندہ پیشانی اور خوشی سے قبول کیا.
اس لئے ہمیں آپ ﷺکی آمد کی خوشی منانے کے لیے آپ ﷺکی سنت پر عمل کرنا چاہیے. تاکہ صحیح معنی میں ان سے محبت کا حق ادا ہو سکے.مزید یہ کہ ہم اپنی خامیوں، کوتاہیوں، برائیوں کو دور کرنے کےلیے آپ ﷺکی سنت پر عمل پیرا ہوں تاکہ امت وسط کہلائے جانے کے قابل ہو سکیں .

خود آپ ﷺکے اسوہ حسنہ پر چلنے، اپنے ظاہر و باطن کو حضور  ﷺکی سنت سے ہم آہنگ کرکے، اپنے گھروں کے ماحول کو آپ  ﷺ کے اسوہ سے معطر کر کے، اپنےبچوں کو آپ ﷺکی سیرت، آپ ﷺکی زندگی کے واقعات پڑھ کر سنا کر سچا اور پکا مسلمان بنائیں. نیز آپ ﷺکی ذات اقدس پر درود و سلام خود بھی پڑھیں اور بچوں کو بھی اس عمل کی رغبت دلائیں. تاکہ وہ اپنے پیارے آقاﷺکی سیرت پڑھ اور سن کر سنت پر عمل کی کوشش کریں.

بچپن سے ہی ان کی تربیت ایسے ماحول میں کریں کہ انہیں دین پر عمل کرنا مشکل نہ لگے.  اور آپ ﷺ سے محبت میں آپ ﷺ کی سیرت پر عمل کی کوشش میں مصروف رہیں. اور انہیں ایک مکمل روشن راستے کے انتخاب میں کوئی مسئلہ اور جھجک نہ ہو. جس پر چل کر وہ دنیا و آخرت کی کامیابیاں سمیٹ سکیں.
کیونکہ آپﷺ نے جو تعلیمات ہم تک پہنچائیں. ان پر عمل پیرا ہو کراہل مغرب  کامیابی کی راہ پر گامزن ہے.

آپ ﷺکی تعلیمات پوری انسانیت کے لئے تھیں. جو بھی ان پر عمل کرے گا کامیابی اس کا مقدر بنے گی.
یوں بحیثیت مسلمان اور ان کی امتی ہونے کے ہمیں اپنی محبت کا اظہار قول کے ساتھ عمل سے بھی کرنا ہے. تاکہ ہمیں اپنے پیارے آقا ﷺ کے سامنے کبھی شرمندہ نہ ہونا پڑے.اور ہم آپ ﷺکے اسوہ حسنہ پر اسطرح عمل کریں کہ ایک ایک کرکے اپنی  برائیوں کو ختم کرتے جائیں اور آپ ﷺکی ایک ایک  سنت کو اپناتے جائیں تاکہ دنیا و آخرت کی کامیابیاں سمیٹ سکیں. اور روز محشر فخر سے اپنے نبی کا سامنا کر سکیں.