غصہ بیماری یا فطری عمل

کہتے ہیں غصے میں عقل جواب دے جاتی ہے، کسی نے اسے ایمانی قوت کے نام پر "جلال شاہانہ" بلکہ یوں کہیں " جلال پیرانہ" کا نام بھی دیا، اور اسی جلال میں کئی گناہ گار بھسم ھوتے سنے، جس کو"پیرانہ کرامت" کا نام دیا گیا، غصے میں طلاق، جنگ و جدل اور لاشوں کے مینار بنتے بھی دیکھے، امیر تیمور، چنگیز خان، اور روم و فارس کے تاریخی نوعیت کے واقعات غصے کی کہانیوں سے بھرے پڑے ہیں، آج کوئی گھر، دفتر، سکول، کالج، منبر و مسجد اور زندگی کے ہر شعبے میں اسی غصے کی بہتات ھے، فساد برپا ھے تو وجہ کوئی معمولی  اور غصہ" غیر معمولی" نظر آئے گا، نفرتیں اتنی بڑھ گئیں کہ چھوٹے چھوٹے واقعات کی بڑی بڑی خبریں بنتی اور معاشرہ تقسیم ہوتا رہتا ہے، بھائی، بھائی سے، بیٹے، بیٹیاں، ماں باپ سے، بیوی شوہر سے، دوست، دوست سے، حتیٰ کہ جنہیں "رہنما" کہا جاتا ہے وہ غصے سے"گمراہ" ہیں، گالم گلوچ، تشدد، فرسٹریشن، اور"جدت"اور شدت نے معاشرے کو اپنی لپیٹ میں لیا ہوا ہے،
علی الصبح ایک گاڑی دوسری سے ھلکی سے ٹکرائی دونوں پارٹیاں بیچ سڑک پر گاڑی کھڑی کرکے" تو تکار "کر ریے ہیں، یہ ثابت کرنے کی ناکام کوشش کر رہے ہیں کہ "غلطی تمھاری ھے"اس کو کنارے لگا کر بھی تو تکار کی جا سکتی ھے مگر نہیں دس بیس اور لوگوں کو بھی غصہ دلانا ھے، آپ نے سنا ہے کہ غصہ عقل کو کھا جاتا ہے، غصہ کرنا حرام ہے، غصے میں شیطان ھاوی رہتا ہے، مگر یہ باتیں کتابوں میں اچھی لگتی ہیں، عملاً ان کی کوئی ضرورت نہیں، یہ بھی دانشور کہتے ہیں کہ، غصے میں فیصلہ اور محبت میں وعدہ نہیں کرنا چاہیے، یہ الفاظ افسانوں کے رنگ بھرنے کیلئے اچھے لگتے ہیں عمل سے کوئی تعلق نہیں، ایک زمانہ پڑھانے میں گزری کم ہی استاد ایسے دیکھے جو ذاتی غصے کو کلاس سے باہر چھوڑ کر جاتے ھوں، میری اکثر اساتذہ، بڑے بڑے افسران اور علم و دانش کے بڑے بڑے منصب اٹھائے پھرنے والوں سے بحث بھی ھوئی، استاد وہ ھوتا ھے جو ذاتی جذبات، غصہ، اور نفرت کلاس سے باہر چھوڑ کر جائے تب ھی وہ اپنے پیشے سے انصاف کر سکتا ہے، مرحوم امان اللہ اسٹیج و تھیٹر کے بڑے فنکار تھے، کہتے ہیں کہ اپنے والد کا گھر میں جنازہ چھوڑ کر پہلے سے طے شدہ اسٹیج ڈرامے کے لیے گیا، لوگوں کو ھنسایا، اور پھر گھر آکر رویا، کتنا مشکل کام ہے نا؟، استاد کلاس میں جاتا ہے تو بیوی بچوں کا غصہ، راستے کے مسائل، مالی پریشانی، قرض کا بوجھ، اعلیٰ افسر سے جھگڑے کا غصہ  طلباء پر جھاڑ کر واپس آ جائے گا، پھر بچے بھی ایسا ہی کریں گے، گویا سلسلہ چل نکلا، علماء منبر پر بیٹھ کر حکومت، سماج، گھر اور خاندان کا غصہ چلا چلا کر اتار دیں گے، کسی کو کیا سمجھ آنی ھے، بس محفل میں واہ واہ ھو جائے گی، ڈاکٹر مریض پر، دکاندار گاہک پر، ڈرائیور گاڑی پر، یا راہ گیر پر، شوہر دفتر کے عملے پر، مجھ جیسے ناچیز تحریر پر غصہ نکال دیں گے، اہل یونان نے ایک بستی تعمیر کی تھی کہ یہاں صرف علمی و تحقیقی کام کرنے والے رہیں گے جنہیں دنیا کی ہر سہولت دی جائے گی جن کا کام صرف علم و تحقیق ھوگا تاکہ اس میں ذاتی غصہ  نفرت ، اور تنقید نہ شامل ھو، مزاحمتی علم نہیں، تعمیری  ، جاندار اور مثبت چیزیں فروغ پا سکیں، ھمارے ھاں تو قدم قدم پر چیختے چلاتے مسائل ھوں یا معاشی، معاشرتی اور سماجی ابتری غصہ آنا فطری  ھوگا اور یقینی بھی، معاشی عدم مساوات، معاشرتی ناانصافی غصے کی شدت کی بڑی وجوہات ھوتی ھیں، مگر جس دین کے ھم پیرو کار ہیں، اس کے رہنما تو اخلاق و معافی کا منبع ہیں، دعوت ھو، سفر و حضر ھو، پریشانی اور مصیبت، ھو، جنگ و جدل ھو یا فتح و نصرت ؛ عاجزی ، صبر، معافی اور مسکراہٹ نمایاں ہے، کیا اسی پیغام عمل کر کےمعاشرے کو بدل نہیں سکتے، ؟
بات غصے کی ھو رہی تھی میں حیرتوں میں ڈوبا ھوں کہ ایک دانشور، پڑھا لکھا شخص، عالم، استاد اور حکمران غصے میں رہ کر اپنے مقاصد کیسے حاصل کر سکتا ہے؟ معاشرے میں اکثر لوگوں کی یہ عادت بن چکی ہے کہ وہ صرف اپنی بات سنانا اور منوانا چاہتے ہیں، میانہ روی، یا مکالمے۔

(جاری ہے)

کا زمانہ ہی نہیں رہا، کسی کی روح، ایمان، عزت، انسانی منصب اور کردار کتنا ہی پامال کیوں نہ ہوتا ھو سب کچھ اس پر لاد کر اپنا آپ جھاڑ کر یہ گیا، وہ گیا ،  دلچسپ بات سنیں ایک شخص سانس پھولا  ھوا بھاگ رہا تھا میں نے !پوچھا کیا ھوا کہنے لگا وہ نکل جائے گا میں نے کہا کون؟ کہنے لگا وہ سامنے ایک شخص ھے جو اپنی غزل سنا کر بھاگ گیا، میری نہیں سن رہا،  اب اس مسئلے کا حل کون نکالے گا؟ کوئی کسی کی نہیں سنتا اپنی سنانا چاہتا ہے، کمال ھے سننے والوں کی!
بات غصے کی ھو رہی تھی، اگرچیکہ یہ ایک فطری عمل ہے مگر اس کو ھم نے اعصابی اور اخلاقی کمزوری بنا دیا ہے، غصے کی وجوہات معلوم کرکے صبر کا پیمانہ متعین کریں، دوسرے کو بھی سنیں، مکالمہ کریں، ظلم کی حد یہ ہے کہ ذرائع ابلاغ نے بھی شدت کو ہی ھوا دی ھے، "منا پاس ھوگیا" اتنی بڑی خبر بن گئی کہ روز لاشوں کے انبار دروازے پہ پھینک کر، یا ٹی وی، موبائل کی صورت میں دل و دماغ میں اتار کر لوگ چلے جاتے ہیں، کوئی اپنے اوپر، کوئی دوسروں پہ غصہ اتارتا ہے، اور یوں معاشرہ تیزی سے تنزلی کا شکار ھوتا رہتا ہے، بس دس منٹ اپنے لئے نکالیئے، غور کیجیے، اور راستہ متعین کیجیے، کچھ نا کچھ فرق ضرور پڑے گا، سوچیں آپ کے عمل سے دوسروں کو کتنا نقصان پہنچ رہا ہے، بطور مسلمان صبر و تحمل، اخلاق و اعمال کا پیمانہ کیا ھونا چاھیے، غصہ عادت ہے تو عادت بدلنے کی کوشش کریں، محنت، تسلسل اور یقین ھم سب کو بدل سکتا ہے۔

مجھے غصہ آرہا ہے کہ کوئی نہیں سمجھے گا، کاش سمجھ جائے،