آج ملک معاشی طورپر بدحالی کا شکار ہے جس کی تمام تر ذمہ دار پی ٹی آئی کی حکومت ہے ، چوہدری نظام الدین آرائیں

وزیراعظم فوری طورپر استعفیٰ دے کر ملک میں جاری بے یقینی کی صورتحال کا خاتمہ کریں، رہنماء پیپلز پارٹی چوہدری نظام الدین آرائیں کا کارکنوں سے خطاب

بدھ 23 مارچ 2022 22:20

حیدرآباد(اُردو پوائنٹ اخبارتازہ ترین - این این آئی۔ 23 مارچ2022ء) پیپلزپارٹی کے رہنماء چوہدری نظام الدین آرائیں نے کہا ہے کہ آج ملک معاشی طورپر بدحالی کا شکار ہے جس کی تمام تر ذمہ دار پی ٹی آئی کی حکومت ہے جس نے معیشت کا دیوالیہ نکال دیا ہے، وزیراعظم فوری طورپر استعفیٰ دے کر ملک میں جاری بے یقینی کی صورتحال کا خاتمہ کریں، اب عوام اتحادی اور خود ان کے ارکان اسمبلی ان کے ساتھ نہیں ہیں۔

وہ نورانی بستی ، پریٹ آباد ، بھٹی گوٹھ میں پیپلزپارٹی کے کارکنوں سے خطاب کر رہے تھے، اس موقع پر یوم دفاع پاکستان کا کیک بھی کاٹا گیا، اجتماع سے شانی آرائیں، محمد علی گوہر ایڈوکیٹ اور منٹھار جتوئی نے بھی خطاب کیا، چوہدری نظام الدین آرائیں نے مالاکنڈ میں بلاول بھٹو زرداری کے کامیاب جلسے پر انہیں اور عوام کو بھی مبارکباد دی، انہوں نے کہا کہ اب پیپلزپارٹی ملک کے چاروں صوبے گلگت بلتستان اور آزاد کشمیر کی مقبول ترین جماعت ہے ۔

(جاری ہے)

عوام پی ٹی آئی کی قیادت کے جھوٹے وعدوں اور بے بنیاد دعوؤں سے تنگ آچکے ہیں کیونکہ اس حکومت نے سوائے مہنگائی، بیروزگاری ، بدامنی اور سیاست میں بدتمیزی کو فروغ دینے کے علاوہ کچھ نہیں کیا، انہوں نے کہا کہ آج سب سے زیادہ پریشان غریب اور متوسط طبقے کے افراد ہیں جو مہنگائی کے ہاتھوں اس حد تک پریشان ہوگئے ہیں اور اب ان کے گھر کا چولہا جلنے بھی مشکل ہو گیا ہے، انہوں نے کہاکہ جب سے تحریک عدم اعتماد آئی ہے کراچی اسٹاک ایکسچینج کا بھٹہ بیٹھ گیا ہے، کاروباری طبقے کو کھربوں روپے کا نقصان ہو چکا ہے، پورا ملک جمود کا شکار ہے ۔ عوام مطالبہ کررہے ہیں کہ اس نااہل اور سلیکٹڈ حکومت کو فوری طورپر ختم کیا جائے۔