پیپلز پارٹی ، (ن)لیگ کی کوآرڈی نیشن کمیٹیوں کا اجلاس ،مختلف امور پر اتفاق رائے ہو گیا

رحیم یار خان ،ملتان کی ڈسٹرکٹ ڈویلپمنٹ کمیٹیوں کی سربراہی پیپلز پارٹی کو دینے ،منتخب ارکان اسمبلی کو مساوی فنڈز دینے پر اتفاق ضلعی سطح پر مختلف کمیٹیوں میں پیپلز پارٹی کو نمائندگی دی جائے گی، پوسٹنگ ٹرانسفر میں پیپلز پارٹی سے مشاورت پر اتفاق کیا گیا‘ ذرائع

منگل 24 دسمبر 2024 19:10

لاہور(اُردو پوائنٹ اخبارتازہ ترین - این این آئی۔ 24 دسمبر2024ء)پاکستان پیپلز پارٹی اور مسلم لیگ (ن) میں پاور شیئرنگ کے معاملہ پر گورنر ہائوس میں پیپلز پارٹی اور (ن)لیگ کی کوآرڈی نیشن کمیٹیوں کا اجلاس ہواجس میںمختلف امور پر اتفاق رائے ہو گیا ۔اجلاس میں گورنر پنجاب سردار سلیم حیدر خان، پیپلز پارٹی کے رہنما راجہ پرویز اشرف، مخدوم احمد محمود، علی حیدر گیلانی، ندیم افضل چن، حسن مرتضی جبکہ مسلم لیگ (ن)کی جانب سے نائب وزیراعظم اسحاق ڈار اعظم نذیر تارڑ، رانا ثنا اللہ، سپیکر پنجاب اسمبلی ملک محمد احمد خان، وفاقی وزیر احد خان چیمہ اورسینئر صوبائی وزیر مریم اورنگزیب شریک ہوئے۔

اجلاس میںآئی جی پنجاب ڈاکٹر عثمان انور، چیف سیکرٹری پنجاب زاہد اختر زمان، سیکرٹری سی اینڈ ڈبلیو نبیل اعوان بھی شامل تھے۔

(جاری ہے)

گورنر ہائوس میں ہونے والے اجلاس میں پنجاب میں پیپلز پارٹی کے مقامی سطح پر درپیش مسائل کے حوالے سے مشاورت کی گئی، اجلاس میں پیپلز پارٹی کے (ن) لیگ سے پنجاب میں تحفظات پر بھی گفتگو کی گئی۔نجی ٹی وی نے ذرائع کے حوالے سے بتایا کہ اجلاس کے آغاز میں ہی پیپلز پارٹی نے مسلم لیگ (ن)پر دو ٹوک موقف واضح کر دیا، پیپلز پارٹی نے موقف اختیار کیا کہ مسلم لیگ (ن)اتحادی حکومت کے معاملات کو آگے نہیں بڑھانا چاہتی تو واضح کردے ہم اپنا آئندہ کا لائحہ عمل خود طے کر لیں گے۔

دوسری جانب مسلم لیگ (ن)نے موقف اختیار کیا کہ اجلاس میں مختلف امور پر اتفاق رائے ہو گیا ہے، پیپلز پارٹی کے تحفظات کو دور کر کے ہم معاملات کو آگے بڑھائیں گے۔اجلاس میں رحیم یار خان اور ملتان کی ڈسٹرکٹ ڈویلپمنٹ کمیٹیوں کی سربراہی پیپلز پارٹی کو دینے اور منتخب ارکان اسمبلی کو مساوی فنڈز دینے پر اتفاق کیا گیا۔ذرائع کے مطابق ضلعی سطح پر مختلف کمیٹیوں میں پیپلز پارٹی کو نمائندگی دی جائے گی، پوسٹنگ ٹرانسفر میں پیپلز پارٹی سے مشاورت پر اتفاق کیا گیا۔اجلاس میں کہا گیا کہ گورنر پنجاب اور وزیراعلی کے درمیان کوئی اختلاف نہیں۔