تحریک انصاف والے آج اپنے کیے کی سزا بھگت رہے ہیں، عطا تارڑ

لاہور ( اُردو پوائنٹ اخبارتازہ ترین۔ 02 فروری 2025ء ) وفاقی وزیر اطلاعات، نشریات، قومی ورثہ و ثقافت عطاءاللہ تارڑ کا کہنا ہے کہ 2025ء ترقی کا سال ہے، مہنگائی مزید کم ہوگی، پاکستان کی معیشت کا دنیا کی بہترین معیشتوں میں شمار ہوگا، اڑان پاکستان منصوبہ پاکستان کی ترقی و خوشحالی کا منصوبہ ہے، وزیراعظم شہباز شریف شفافیت کے نئے ریکارڈ قائم کر رہے ہیں، تحریک انصاف کے دور میں ترقی کا ایک منصوبہ نہیں لگا، ان کے دور میں صرف لوٹ مار کی گئی، آج یہ اپنے کیے کی سزا بھگت رہے ہیں۔

لاہور میں اپنے انتخابی حلقہ این اے 127 کی یونین کونسل 232 میں عوامی اجتماع سے خطاب کرتے ہوئے انہوں نے کہا کہ مسلم لیگ ن تعمیر و ترقی کی سیاست کرتی ہے جہاں ملکی حالات بہتر ہو رہے ہیں وہاں معیشت بہتر ہو رہی ہے، مہنگائی میں کمی آرہی ہے، شرح سود نیچے جا رہی ہے، عالمی ممالک پاکستان کی معیشت کی تعریف کر رہے ہیں، وزیراعظم شہبازشریف نے ملک کو ڈیفالٹ سے بچایا، مسلم لیگ ن نے ملک کو مشکل ترین حالات سے نکالا، آج ملک ترقی کی منازل طے کر رہا ہے، معیشت کے حوالے سے دن بدن اچھی خبریں آرہی ہے، ملکی برآمدات میں مسلسل اضافہ ہو رہا ہے۔

(جاری ہے)

وفاقی وزیر اطلاعات نے کہا کہ ملک پر نحوست کا سایہ چھٹ گیا ہے، پی ٹی آئی دور حکومت میں لوٹ مار کی گئی، 190 ملین پاؤنڈ کیس ملکی تاریخ کا سب سے بڑا ڈاکہ ہے، 190 ملین پاؤنڈ کیس کے فیصلے پر پی ٹی آئی پروپیگنڈا کر رہی ہے، آج جب ان کو اس کیس میں سزا ہوئی ہے تو چوری چھپانے کے لیے مذہب کارڈ کا استعمال کیا جا رہا ہے، کہا جا رہا ہے ہمیں سیرت پر چلنے کی سزا دی جا رہی ہے، یہ پورا ٹولہ رنگے ہاتھوں پکڑا گیا ہے، ان کے پاس 190 ملین پاؤنڈ کا کوئی جواب نہیں، یہ توشہ خانہ سے گھڑیاں چوری کر رہے تھے۔

مسلم لیگ ن کے رہنماء کا کہنا ہے کہ وزیراعظم شہباز شریف نے توشہ خانہ کے قواعد و ضوابط بنائے، وزیراعظم شہباز شریف شفافیت کے نئے معیار قائم کر رہے ہیں، آج کے بعد توشہ خانہ سے کوئی بھی 300 ڈالر سے زائد کی چیز نہ لے سکے گا نہ رکھ سکے گا، اگر لینی ہوگی تو پوری قیمت ادا کرنا ہوگی، اسی طرح پی ٹی آئی دور حکومت میں کوئی ایک منصوبہ نہیں لگا بلکہ ہمیشہ مسلم لیگ ن کے دور میں ہی تعمیر و ترقی ہوئی، جو وعدے کیے تھے آج پورے کر رہے ہیں، پی ٹی آئی والے پیسے کمانے میں لگے ہوئے تھے، انہیں عوام کے مسائل سے کوئی سروکار نہیں تھا، یہ کیش اکٹھی کر رہے تھے، ڈیلیں کر رہے تھے، ہیرے کی انگوٹھیاں لے رہے تھے۔

انہوں نے کہا کہ 2025ء ترقی کا سال ہے، ملک میں مہنگائی کی شرح کم ہو رہی ہے، اڑان پاکستان پروگرام پاکستان کی ترقی و خوشحالی کا منصوبہ ہے، پاکستان کی معیشت کا دنیا کی بہترین معیشتوں میں شمار ہوگا، سٹاک مارکیٹ کے ریکارڈ ٹوٹ رہے ہیں، یہ تبھی ہوتا ہے جب تاجر خوشحال ہوتے ہیں، پی ٹی آئی نے اپنے دور میں جھوٹ کا بازار گرم کیے رکھا، علاقے کی ترقی کے لیے انہیں فرصت نہیں تھی، وہ لوٹ مار کرتے رہے، اپنی جیبیں گرم کیں، عوامی پیسے کا ذاتی استعمال کیا جس کی تاریخ میں مثال نہیں ملتی، یہ وہ لوگ ہیں جو شہداء کی بے حرمتی کرتے ہیں، ان کے سیاسی مقاصد پاکستان کے خلاف ہیں، ہم شہداء کی تعظیم و تکریم کرنے والے لوگ ہیں۔