عید کے بعد بجلی کے بلوں، چینی، آٹا مافیا سمیت دیگر مسائل پر احتجاجی تحریک شروع کریں گے

لاہور (اُردو پوائنٹ اخبارتازہ ترین۔ 02 اپریل 2025ء) امیر جماعت اسلامی پاکستان حافظ نعیم الرحمن نے عید الفطر کے پہلے روز منعم ظفر خان کے ہمراہ امریکی جیل میں قید ڈاکٹر عافیہ کی ہمشیرہ ڈاکٹر فوزیہ سے گھر جاکر ملاقات کی اور عیدالفطر کی مبارکباد دی جماعت اسلامی کراچی کے تحت یکم شوال کو ادارہ نورحق میں روایتی عید ملن کا انعقاد ہوا جس میں مرکزی، صوبائی اور کراچی کے ذمہ داران و کارکنان نے شرکت کی۔

تقریب 11بجے تا نماز ظہر تک جاری رہی۔امیر جماعت اسلامی پاکستان حافظ نعیم الرحمن نے اس موقع پر میڈیا سے گفتگو کرتے ہوئے کہاکہ عید کے پہلے اور دوسرے روز اسرائیل نے فلسطین میں کھیلتے ہوئے ننھے منے بچوں پر بمباری کی۔ گزشتہ ڈیڑھ سال سے فلسطینی ملبے کے ڈھیر پر رہنے پر مجبور ہیں۔

(جاری ہے)

صیہونیوں نے معاہدے کی خلاف ورزی کرکے ہزاروں سال کی تاریخ دہرائی۔

وہ وقت دور نہیں جب اسرائیل پر اللہ کا عذاب آئے گا۔ اسرائیل کے ساتھ ساتھ ہر وہ ملک جو اس کی پشتیبانی کررہا ہے وہ سب عذاب کا شکار ہوں گے۔ امت مسلمہ کے حکمرانوں کے پاس سب کچھ ہے لیکن غیرت و حمیت موجود نہیں ہے۔ اسرائیل کو بم و بارود فراہم کرنے میں امریکہ کا ہاتھ ہے۔ حکومت و اپوزیشن میں شامل تمام افراد امریکہ کی مذمت کے بجائے تعلقات بڑھانے کی کوشش کررہے ہیں۔

عید الفطر کے موقع پر پوری امت فلسطین کے ساتھ ہے۔ اسرائیل کو فائدہ پہچانے والی مصنوعات کا بائیکاٹ کریں۔ ایسے مسلم ممالک جو غداریوں کے مرتکب ہورہے ہیں اور اسرائیل کے ساتھ ساز باز کرکے فلسطین کو کچلنا چاہتے ہیں وہ سن لیں کہ اب وقت دور نہیں جب انہیں ذلت نصیب ہوگی۔ حافظ نعیم الرحمن نے مزیدکہاکہ تمام اہل وطن و امت مسلمہ کو بہت بہت عید مبارک۔

عید الفطر اللہ کا انعام ہے، اور رمضان المبارک کا نعم البدل ہے۔ عید کے موقع پر مسلمان خوشیاں مناتے ہیں اور ان کے ساتھ غیر مسلم بھی شریک ہوتے ہیں لیکن فلسطین کی صورتحال ہم سب کو غمگین کررہی ہے۔ عید کے بعد امن و امان کی صورتحال، بجلی کے بلوں، چینی، آٹا مافیا کے خلاف جماعت اسلامی تحریک شروع کررہی ہے، جماعت اسلامی کے تحت تمام صوبوں میں ریلیاں نکالی جائیں گی۔

عید کے اس موقع پر پیغام دینا چاہتے ہیں کہ جب عوام کی مرضی کے بغیر فارم 47 کے ذریعے لوگوں کو مسلط کیا جائے گا تو کبھی بھی عوام اور فوج کے درمیان دوریاں ختم نہیں ہوگی۔ حافظ نعیم الرحمن نے مزید کہاکہ پاکستان کے دو صوبے بلوچستان اور خیبرپختونخوا کے حالات خراب ہیں۔ حکومت کی طرف سے کوئی ایسا قدم نہیں اٹھایا جارہا جس سے یکجائی پیدا ہو۔

حکومت بتائے کہ کوئی بھی ایجنسی پاکستان میں آکر کام کررہی ہے تو اس میں پاکستان کی ایجنسیز کیا کررہی ہیں۔ جب اپنے ہی لوگوں کو محروم کریں گے تو لوگوں میں غم و غصہ پیدا ہوتا ہے۔ لوگوں کو لاپتا کیا جاتا ہے ان پر بمباری کی جاتی ہے جو کسی صورت درست نہیں ہے۔ مردان میں بمباری کرکے خانہ بدوشوں کو مارا گیا جس میں بچے اور خواتین تھیں۔ وزیر اعظم جھوٹ بولتے ہیں کہ دہشت گردوں کو مارا گیا ہے۔

  صوبوں کے حالات درست کرنے کے لیے محرومیوں کو دور کرنا ہوگا اور ذمہ داروں کو قوم کے سامنے لانا پڑے گا۔ حالات درست کرنے کے لیے گریٹر ڈائیلاگ وقت کی ضرورت ہے۔ افغانستان سے ڈائلاگ کیے جائیں۔اس موقع پر مرکزی نائب امیر ڈاکٹر اسامہ رضی، جماعت اسلامی کے رہنما راشد نسیم، ڈاکٹر معراج الہدیٰ صدیقی، صوبائی رہنما عبد الغفار عمر،نائب امراء کراچی برجیس احمد، محمد اسحاق خان، عبد الوہاب،مسلم پرویز، سیف الدین ایڈوکیٹ، ڈاکٹر واسع شاکر، نوید علی بیگ،سکریٹری کراچی توفیق الدین صدیقی، ڈپٹی سیکرٹریز راشد قریشی، عبد الرزاق خان، ابن الحسن ہاشمی،امرائے اضلاع انجینئر عبد العزیز، سید وجیہ حسن،نعیم اختر،سید مفخر علی ڈاکٹر نورالحق،ٹاؤن چیئرمین گلشن اقبال ڈاکٹر فواد، ٹاؤن چیئرمین ناظم آباد سید مظفر احمد،صوبائی سکریٹری اطلاعات مجاہد چنا،سکریٹری اطلاعات کراچی زاہد عسکری ودیگر بھی موجود تھے۔

دریں اثناء جماعت اسلامی منارٹی ونگ کراچی کے صدر یونس سوہن ایڈوکیٹ کی زیر قیادت اقلیتی برادری کے وفد نے امیر جماعت اسلامی کراچی منعم ظفر خان ودیگر رہنماؤں سے ادارہ نورحق میں ملاقات کی اور عید الفطر کی مبارکباد دی۔وفد میں نائب صدر منارٹی ونگ جماعت اسلامی کراچی سیموئل نذیر،جنرل سکریٹری  پرویز برکت،سکھ برادی کے رمیش سنگھ،،کونسلر گلشن ٹاؤن وہندو برادری کے رہنما کشور کمار ودیگر بھی شامل تھے۔

علاوہ ازیں امیرجماعت اسلامی پاکستان حافظ نعیم الرحمن نے عید الفطر کے پہلے روز امیر کراچی منعم ظفر خان کے ہمراہ امریکی جیل میں قید ڈاکٹر عافیہ کی ہمشیرہ ڈاکٹر فوزیہ سے ان کے گھر جاکر ملاقات کی اور عیدالفطر کی مبارکباد دی۔ ملاقات میں امیر جماعت اسلامی ضلع شرقی نعیم اختر، سکریٹری اطلاعات زاہد عسکری ودیگربھی موجود تھے۔ ڈاکٹر فوزیہ صدیقی نے بتایاکہ حکومت کی جانب سے ڈاکٹر عافیہ کی رہائی کے لیے کوئی اقدامات نہیں کیے جارہے، میری ہمشیرہ کو اذیتیں دی جارہی ہیں۔

حافظ نعیم الرحمن نے کہاکہ المیہ یہ ہے کہ حکومت میں آنے سے قبل تمام جماعتوں نے ڈاکٹر عافیہ کی رہائی کے وعدے تو کیے لیکن عملی طور پر کوئی اقدامات نہیں کیے، موجودہ حکومت بھی سابقہ حکومتوں کا تسلسل ہے جو صرف امریکی خوشنودی حاصل کرنے کی کوشش میں لگے رہتے ہیں۔ جماعت اسلامی ڈاکٹر عافیہ کی گرفتاری کے اول روز سے ان کے خاندان کے ساتھ ہے،ڈاکٹر عافیہ کی رہائی کے لیے ہر ممکن کوشش جاری رکھیں گے۔