شرجیل انعام میمن نے اپنی رہائش گاہ راول ہاس ٹنڈو جام حیدرآباد میں عیدالفطر کی نماز ادا کی

حیدرآباد (اُردو پوائنٹ اخبارتازہ ترین - این این آئی۔ 02 اپریل2025ء)سینئر وزیر و صوبائی وزیر برائے اطلاعات، ٹرانسپورٹ اور ماس ٹرانزٹ شرجیل انعام میمن نے اپنی رہائش گاہ راول ہاس ٹنڈو جام حیدرآباد میں عیدالفطر کی نماز ادا کی۔نماز کے بعد میڈیا سے گفتگو کرتے ہوئے صوبائی وزیر شرجیل انعام میمن نے پاکستان سمیت عالمِ اسلام کو عید کی مبارکباد پیش کی اور کہا کہ ہمیں افہام و تفہیم کی مثال قائم کرتے ہوئے متحد ہو کر ملکی ترقی کے لیے کام کرنا ہوگا۔

انہوں نے حالیہ دہشت گردی کے واقعات میں شہید ہونے والے شہریوں اور سیکیورٹی فورسز کے جوانوں کو خراجِ عقیدت پیش کیا اور ان کے لواحقین سے دلی ہمدردی کا اظہار کیا۔ ان کا کہنا تھا کہ دشمن ممالک پاکستان میں انتشار پھیلانا چاہتے ہیں، مگر ہم سب متحد ہوکر ان کے عزائم کو ناکام بنا سکتے ہیں۔

(جاری ہے)

ٹریفک حادثات کے حوالے سے شرجیل انعام میمن نے کہا کہ ٹریفک کنٹرول پولیس کی ذمہ داری ہے، تاہم ڈمپر اور ہیوی ٹریفک چلانے والے ڈرائیوروں کو مزید احتیاط کی ضرورت ہے تاکہ قیمتی جانوں کا ضیاع روکا جا سکے۔

انہوں نے کہا کہ پیڈسٹرین برج (پیدل چلنے والے پل) موجود ہونے کے باوجود عوام اس کا استعمال نہیں کرتے، جو ایک خطرناک عمل ہے۔ عوام الناس کو چاہیے کہ وہ کسی بھی ناخوشگوار واقعے سے بچنے کے لیے ٹریفک قوانین کی مکمل پاسداری کریں۔ انہوں نے کہا کہ ڈرائیونگ لائسنس کے اجرا کے عمل کو مزید سخت کیا جائے گا تاکہ غیر تربیت یافتہ افراد کے ہاتھ میں گاڑی نہ آئے۔

حکومت سندھ نے ٹرانسپورٹ کے نظام میں بہتری لانے کے لیے ایم وی آئی (موٹر وہیکل انسپکشن) سینٹرز کی تعداد دو سے بڑھا کر 24 کر دی ہے، جبکہ پبلک پرائیویٹ پارٹنرشپ کے تحت مزید سینٹرز قائم کیے جا رہے ہیں۔ عید کے بعد ایم وی آئی قوانین کو سختی سے نافذ کیا جائے گا۔ انہوں نے ٹریفک حادثات پر سیاست کرنے والوں کو آڑے ہاتھوں لیتے ہوئے کہا کہ یہ ایک شہری مسئلہ ہے، اس پر سیاسی پوائنٹ اسکورنگ نہیں ہونی چاہیے۔

انہوں نے کہا کہ جو لوگ ماضی میں سیاسی طور پر ناکام ہو چکے ہیں، وہ ان حادثات کو اپنی سیاست چمکانے کے لیے استعمال کر رہے ہیں، جو کہ انتہائی افسوسناک عمل ہے، شرجیل انعام میمن نے واضح کیا کہ کسی بھی نئی نہر (کینال) کی منظوری نہیں دی گئی، پیپلز پارٹی اور حکومت سندھ دریائے سندھ پر کسی بھی کینال کی تعمیر کے خلاف ہیں اور ہمیشہ رہیں گے، ہمارا کالا باغ ڈیم سمیت ہر اس منصوبے کے خلاف واضح اور دوٹوک مقف رہا ہے، جو دریائے سندھ پر کسی بھی غیر ضروری تعمیرات سے متعلق ہو، انہوں نے وفاقی حکومت سے اپیل کی کہ وزیرِاعظم شہباز شریف خود اس بات کا اعلان کریں کہ دریائے سندھ پر کوئی نئی کینال تعمیر نہیں ہو گی، ایک سوال پر انہوں نے کہا کہ پیکا ایکٹ کے تحت ناانصافی نہیں ہونی چاہیے، تاہم جھوٹی خبروں اور غلط اطلاعات کو روکنے کے لیے قانون ضروری ہے۔

انہوں نے یقین دلایا کہ پیپلز پارٹی آزادی صحافت پر مکمل یقین رکھتی ہے اور کسی بھی صحافی کو کسی قسم کی مشکلات کا سامنا نہیں ہونے دے گی، انہوں نے سابق وزیرِاعظم اور بانی پی ٹی آئی کو عید کی مبارکباد دی اور دعا کی کہ رہائی کے بعد وہ مثبت سیاست کریں اور ملک کی ترقی میں کردار ادا کریں۔ شرجیل انعام میمن نے کہا کہ ہمیں ہمارے دین نے بھی اتحاد اور یکجہتی کا درس دیا ہے، ہمیں ہر قسم کے سیاسی اور نظریاتی اختلافات کو پسِ پشت ڈال کر ملک کی ترقی کے لیے ایک ہونا ہو گا۔ انہوں نے کہا کہ دشمن ممالک پاکستان کو کمزور کرنا چاہتے ہیں، مگر ہم سب کو متحد ہو کر اپنے وطن کی حفاظت کرنا ہو گی۔