پیپلز پارٹی نے ہمیشہ عوام کے حقوق کی جنگ لڑی ہے: بلاول بھٹو زرداری

ہفتہ 19 اپریل 2025 00:30

حیدرآباد (اُردو پوائنٹ اخبارتازہ ترین - اے پی پی۔ 19 اپریل2025ء) چیئرمین پاکستان پیپلز پارٹی بلاول بھٹو زرداری نے کہا ہے کہ پیپلز پارٹی نے ہمیشہ عوام کے حقوق کی جنگ لڑی ہے اور ہر دور میں غریب، محنت کش اور پسماندہ طبقات کی آواز بنی ہے۔ عمرکوٹ کے ضمنی انتخاب میں پی پی پی کی امیدوار صباء تالپور کی کامیابی پر عوام کا شکریہ ادا کیا اور کہا کہ اس نشست پر پاکستان تحریک انصاف (پی ٹی آئی)، گرینڈ ڈیموکریٹک الائنس (جی ڈی اے) سمیت 17 جماعتوں کے حمایت یافتہ آزاد امیدوار کا مقابلہ پی پی پی نے تنہا کیا اور بھاری اکثریت سے کامیابی حاصل کی ۔

حیدرآباد میں ایک بڑے عوامی جلسے سے خطاب کرتے ہوئے انہوں نے کہا کہ یہ فتح سندھ میں پی پی پی اور اس کی قیادت کے خلاف پھیلائے گئے تمام پراپیگنڈے کو بہا لے گئی ہے۔

(جاری ہے)

انہوں نے مزید کہا کہ سندھ کے عوام نے ایک بار پھر ثابت کر دیا ہے کہ وہ شہید محترمہ بے نظیر بھٹو، شہید ذوالفقار علی بھٹو اور صدر آصف زرداری کے ’پاکستان کھپے‘ کے نعرے کے ساتھ کھڑے ہیں۔

انہوں نے کہا کہ پیپلز پارٹی نے ہمیشہ ملک کی سالمیت اور وفاق کی مضبوطی کے لیے کام کیا۔ ہم وہ ہیں جنہوں نے پاکستان کھپے کا نعرہ لگایا، ہم چاہتے ہیں کہ ہر صوبہ ترقی کرے۔ انہوں نے کہا کہ ان کی جماعت ملک میں معاشی ترقی، مہنگائی میں کمی اور نوجوانوں کے لیے روزگار کے مواقع فراہم کرنے کی پالیسی پر عمل پیرا ہے۔ بلاول بھٹو نے زور دیا کہ ملک کو دہشت گردی اور عالمی سازشوں سے بچانے کے لیے تمام سیاسی قوتوں کو متحد ہو کر کام کرنا ہوگا۔

انہوں نے کہا کہ پیپلز پارٹی مستقبل میں بھی عوامی حقوق، آئین کی بالادستی اور جمہوریت کے فروغ کے لیے اپنی جدوجہد جاری رکھے گی۔ جلسے میں وزیر اعلیٰ سندھ سید مراد علی شاہ، پی پی پی سندھ کے صدر نثار احمد کھوڑو اور دیگر رہنماؤں نے بھی خطاب کیا۔ آخر میں بلاول بھٹو زرداری نے اعلان کیا کہ وہ پیپلز پارٹی کے اگلے عوامی جلسے سے 25 اپریل کو ضلع سکھر میں خطاب کریں گے۔