ھ*پاکستان تیار ہے، کسی بھی مہم جوئی کا انجام خطرناک ہوگا، وزیر دفاع کی بھارت کو تنبیہ

اسلام آباد(اُردو پوائنٹ اخبارتازہ ترین - آن لائن۔ 25 اپریل2025ء)وزیر دفاع خواجہ آصف نے کہا ہے کہ پاکستان کسی بھی مہم جوئی کا منہ توڑ جواب دینے کے لیے تیار ہے، بھارت کو مشورہ ہے کہ کسی بھی مس ایڈونچر سے باز رہے۔پارلیمنٹ ہائوس میں میڈیا سے گفتگو کرتے ہوئے وزیر دفاع نے کہا کہ لائن آف کنٹرول (ایل او سی) پر صورتحال تیزی سے بگڑ رہی ہے، ایسے میں بھارت خبردار رہے کہ اگر کسی جارحانہ اقدام کی کوشش کی گئی تو اس کا بھرپور اور دوٹوک جواب دیا جائے گا۔

وزیرِ دفاع نے واضح الفاظ میں کہا کہ پاکستان نہ صرف تیار ہے بلکہ "دو سو فیصد تیار" ہے کہ اگر بھارت نے کوئی غلط قدم اٹھایا تو اسے اس کا سخت جواب ہی ملے گا۔انہوں نے یاد دلایا کہ ماضی میں بھی بھارت کو فضائی حدود کی خلاف ورزی مہنگی پڑی تھی اور اس کی یادگار مثال بھارتی پائلٹ ابھی نندن کی گرفتاری اور چائے نوشی کے بعد واپسی ہے۔

(جاری ہے)

خواجہ آصف نے زور دے کر کہا کہ بھارت کشیدگی کو ہوا دینے کے بجائے احتیاط کا دامن تھامے۔

پہلگام حملے میں پاکستان کو مؤرد الزام ٹھہرانے کے بھارتی دعوے کو مسترد کرتے ہوئے انہوں نے کہا کہ اس واقعے میں بڑی تعداد میں مسلمان بھی جاں بحق ہوئے۔وزیر دفاع نے بھارتی میڈیا پر بھی تنقید کی اور کہا کہ وہاں کی رپورٹنگ میں سنجیدگی کم اور فلمی رنگ زیادہ ہوتا ہے۔ ان کا کہنا تھا کہ بھارتی میڈیا دراصل بالی ووڈ سے متاثرہ ایک پروپیگنڈہ مشین ہے۔

انہوں نے کہا کہ بھارت کالعدم تنظیموں کو پاکستان کے اندر دہشت گردی کے لیے استعمال کر رہا ہے، جو کہ دراصل بھارت ہی کی پراکسیز ہیں۔مزید برآں برطانوی میڈیا کو انٹرویو دیتے ہوئے خواجہ آصف کا کہنا تھا کہ بھارت اگر جنگی جنون میں مبتلا ہوا تو نتیجہ دونوں ایٹمی ممالک کے درمیان کھلی جنگ کی صورت میں نکل سکتا ہے، جس کے اثرات صرف خطے تک محدود نہیں رہیں گے۔

خواجہ آصف کا کہنا تھا کہ دنیا کو اس ممکنہ تصادم پر سنجیدگی سے غور کرنا چاہیے کیونکہ ایک غلط قدم بڑے پیمانے پر تباہی کا باعث بن سکتا ہے۔وزیر دفاع نے کہا کہ اللہ کی مہربانی ، ذوالفقار بھٹو اور نوازشریف کی کوششوں سے پاکستان ایٹمی قوت بنا ،دو ایٹمی ممالک میں کشیدگی سے پوری دنیا میں اضطراب پایا جاتا ہے،دو ایٹمی قوتیں اس وقت ایک دوسرے کے آمنے سامنے ہیں،بھارت نہ پانی کا رخ موڑ سکتا ہے نہ نئے آبی زخائر بنا سکتا ہے،بھارت نے آٹھ دس سال سے سندھ طاس معاہدہ کے حوالے سے اپنا رویہ تبدیل کیا ،سندھ طاس معاہدہ کی معطلی کا معاملہ عدالت میں چلا جائے گا ،پاکستان میں دہشتگردی میں بھارت سمیت عالمی قوتیں ہیں،افغانستان نے اپنی سرزمین دہشتگردوں کو فراہم کی ہوئی ہے،افغانستان کی سرزمین سے پاکستان میں دہشتگردی ہوتی ہے،تین چار سے افغانستان کو ہمسائے کی حیثیت سے یہ سلسلہ بند کرنے کے لیے کہہ رہے ہیں،ہم نے افغانستان کے لیے بڑی قربانیاں دی ہیں،آج بھی ساٹھ لاکھ افغانی پاکستان میں بیٹھا ہوا ہے،بھارت ہماری مغربی سرحد کو دہشتگردی کے لیے استعمال کررہا ہے ۔