Live Updates

دہشت گردی کے خلاف جنگ میں پوری قوم سکیورٹی فورسز کے ساتھ کھڑی ہے، وزیراعظم شہباز شریف

پاکستان دہشت گردی کے خلاف جنگ جیت رہا ہے، سکیورٹی فورسز ملک کی سرحدوں کے دفاع اور دہشت گردی کی لعنت کے خاتمے کیلئے اپنے عزم میں غیر متزلزل ہیں، وزیراعظم کا بیان

فیصل علوی پیر 28 اپریل 2025 11:20

دہشت گردی کے خلاف جنگ میں پوری قوم سکیورٹی فورسز کے ساتھ کھڑی ہے، وزیراعظم ..

اسلام آباد(اردوپوائنٹ اخبار تازہ ترین۔28اپریل 2025)وزیراعظم شہباز شریف کا کہنا ہے کہ دہشت گردی کے خلاف جنگ میں پوری قوم سکیورٹی فورسز کے ساتھ کھڑی ہے،پاکستان دہشت گردی کے خلاف جنگ جیت رہا ہے، سکیورٹی فورسز ملک کی سرحدوں کے دفاع اور دہشت گردی کی لعنت کے خاتمے کیلئے اپنے عزم میں غیر متزلزل ہیں،وزیراعظم نے شمالی وزیرستان کے علاقے حسن خیل میں افغانستان سے فتنہ الخوارج کے دہشت گردوں کی در اندازی ناکام بنانے پر سکیورٹی فورسز کی ستائش کرتے ہوئے انہیں خراج تحسین کیا۔

انہوں نے کہا کہ سکیورٹی فورسز نے شاندار پیشہ ورانہ مہارت کا مظاہرہ کرتے ہوئے دہشت گردوں کو بر وقت روکا۔ پاکستان کو دہشت گردوں کے خلاف اہم کامیابیاں حاصل ہو رہی ہیں۔ یہ کامیاب کارروائیاں اس بات کی نشاندہی کرتی ہیں کہ ہمیں دہشتگردوں کیخلاف کامیابیاں حاصل ہو رہی ہیں۔

(جاری ہے)

واضح رہے کہ گزشتہ روزپاکستان کی سیکیورٹی فورسز نے افغانستان کی جانب سے ملک میں در اندازی کی کوشش ناکام بناتے ہوئے 54 خوارج دہشت گردوں کو ہلاک کردیاتھا۔

آئی ایس پی آر کاکہنا تھا کہ انٹیلی جنس رپورٹس کے مطابق یہ خوارج اپنے غیر ملکی آقاو¿ں کے اشارے پر پاکستان میں بڑی دہشت گرد کارروائیاں کرنے کیلئے دراندازی کی کوشش کر رہے تھے۔ سیکیورٹی فورسزنے موثر حکمت عملی کے تحت دشمن کے عزائم کو ناکام بنایا تھا۔ کامیاب کارروائی کرتے ہوئے تمام 54 خوارج کو جہنم واصل کر دیا گیا تھا۔ ترجمان پاک فوج کے مطابق ہلاک شدگان سے بھاری مقدار میں اسلحہ، گولہ بارود اور بارودی مواد بھی برآمد کیا گیا تھا۔

آئی ایس پی آر کاکہناتھاکہ 25 اور 26 اپریل کی درمیانی شب اور پھر 26 اور 27 اپریل 2025 کی شب، شمالی وزیرستان کے علاقے حسن خیل میں پاکستان،افغانستان سرحد کے راستے بڑی تعداد میں خوارج کی نقل و حرکت کو سیکیورٹی فورسز نے بروقت ناکام بنا دیا تھا۔ترجمان پاک فوج کامزید یہ بھی کہنا تھا کہ حالیہ قومی سلامتی کمیٹی کے اجلاس میں بھی اس بات پر زور دیا گیا کہ بھارت کا اسٹریٹجک مقصد پاکستانی سیکیورٹی فورسز کی توجہ دہشت گردی کے خلاف جنگ سے ہٹانا تھا تاکہ فتنہ الخوارج کو سانس لینے کا موقع دیا جا سکے اورہماری مسلح افواج کے بھرپور حملوں سے بری طرح پسپا ہو چکا تھا۔