Live Updates

ی*کسی بھی جارحیت کی صورت میں بھارت کو منہ توڑ جواب دیا جائے گا: سردار سلیم حیدر خان

ٴیو ای ٹی ریسورس سنٹر جنڈ میں جلد کام شروع کر دے گا، گورنر پنجاب کا اٹک میں عوامی اجتماع سے خطاب

پیر 28 اپریل 2025 19:10

Eاٹک (اُردو پوائنٹ اخبارتازہ ترین - آن لائن۔ 28 اپریل2025ء) گورنر پنجاب سردار سلیم حیدر خان نے کہا ہے کہ پاکستانی عوام پاک فوج کے ساتھ ہیں اور کسی بھی جارحیت کی صورت میں بھارت کو منہ توڑ جواب دیا جائے گا۔ حکومت پنجاب کے تعاون کے بغیر ضلع اٹک کے عوام کے لیے ترقیاتی کام کئے گئے ہیں۔ یو ای ٹی ریسورس سنٹر جنڈ میں جلد کام شروع کر دے گا۔ ان خیالات کا اظہار انہوں نے ضلع اٹک کی تحصیل جنڈ میں منعقدہ عوامی اجتماع سے خطاب کرتے ہوئے کیا۔

اس موقع پر پیپلز پارٹی کے رہنما سید عاطف حسین شاہ، قومی اسمبلی کے امیدوار سردار فیضان حیدر، ضلعی صدر پاکستان پیپلز پارٹی سردار اشعر حیات خان، ملک شیر خان صدریال، ملک ریاض صدریال، آصف علی ملک، ملک امانت راول، خطیب پارلیمنٹ ہاؤس احمد الرحمن، ملک آصف حیات ملک جلیل اعوان اور دیگر رہنما بھی موجود تھے۔

(جاری ہے)

گورنر پنجاب سردار سلیم حیدر خان نے کہا کہ جند کے عوام پاکستان پیپلز پارٹی کے ساتھ ہیں۔

گورنر پنجاب نے کہا کہ اللہ تعالی نے انہیں عوام کی خدمت کے لئے گورنر بنایا ہے اس لئے انہوں نے گورنر ہاؤس کی آرام دہ زندگی پر عوامی خدمت کو ترجیح دی ہے۔ گورنر پنجاب نے کہا کہ ضلع اٹک کے لوگوں کو ایک روپیہ بھی ترقیاتی فنڈ نہیں ملا۔ انہوں نے مزید کہا کہ انہوں نے اپنے دوستوں اور مخیر حضرات کے تعاون سے اپنے علاقے میں کروڑوں روپے کے ترقیاتی کام کروائے ہیں۔

انہوں نے کہا کہ جنڈ، جلوال، اچھری، چپری، ماڑی جلوال اور دیگر علاقوں میں ریکارڈ ترقیاتی کام مکمل کئے گئے ہیں۔ انہوں نے مزید کہا کہ جلوال اور پنڈی گھیب سمیت پورے ضلع میں عوام کی فلاح و بہبود کے اقدامات اپنی مدد آپ کے تحت جاری رہیں گے۔ قبل ازیں گورنر پنجاب سردار سلیم حیدر خان نے کھلی کچہری میں عوامی مسائل بھی سنے۔