ازاد کشمیر قانون ساز اسمبلی نے بھارت کے پہلگام میں فالز فلیگ آپریشن اورپاکستان پر الزام ومنافرت کے خلاف قرارداد مذمت متفقہ طور پر منظور کرلی

مظفر آباد (اُردو پوائنٹ اخبارتازہ ترین - اے پی پی۔ 30 اپریل2025ء) آزادجموں قانون ساز اسمبلی کا اجلاس بدھ کو سپیکر چوہدری لطیف اکبر کی زیر صدارت منعقد ہوا ۔ جس میں موسٹ سینئر وزیر حکومت آزادکشوکشمیرمیر کرنل ریٹائرڈ وقار احمد نورنے چوہدری انوارالحق وزیراعظم آزادحکومت ریاست جموں وکشمیر، وقار احمد نور موسٹ سینئر وزیر/وزیر سروسز اینڈ جنرل ایڈمنسٹریشن/داخلہ، خواجہ فاروق احمد قائد حزب اختلاف،سردار میر اکبر خان وزیر زراعت،لائیو سٹاک و ڈیری ڈویلپمنٹ، میاں عبدالوحید وزیر قانون، انصاف، پارلیمانی امور وانسانی حقوق، راجہ فیصل ممتاز راٹھور وزیر لوکل گورنمنٹ ودیہی ترقی، راجہ محمد صدیق وزیر صنعت، کامرس، لیبرویلفئیر و اوزان و پیمائش، محمد اکبر چوہدری وزیر خوراک، اظہر صادق وزیر مواصلات وتعمیرات عامہ و نثار انصر ابدالی وزیر صحت عامہ کی جانب سے مشترکہ قرارداد ایوان میں پیش کی۔

(جاری ہے)

کرنل وقار احمد نور نے قرارداد پیش کرتے ہوئے کہاکہ یہ ایوان پہلگام میں ہندوستان کی طرف سے فالس فلیگ آپریشن اور اس کے فوری بعد پاکستان پربے بنیاد الزامات، ہندوستانی میڈیا کی طرف سے مسلمانوں اور کشمیریوں کے خلاف نفرت کا ماحول پیدا کرنے، 2500 سے زائد عام شہریوں کی بلا جواز گرفتاریوں، گھروں کو بلڈوز کرنے اور دیگرظالمانہ اقدامات کی مذمت کرتا ہے۔

یہ ایوان ہندوستان کی سیکورٹی کابینہ کمیٹی کے فیصلہ جات کی مذمت کرتا ہے، یہ فیصلہ جات ظاہرکرتے ہیں کہ ہندوستان نے ایک طے شدہ منصوبہ کے تحت بغیر کسی تحقیق یہ اقدامات کر کے پاکستان اور مقبوضہ جموں و کشمیر میں جاری حق خودار دایت کی تحریک کو بد نام کرنے کی کوشش کی ہے۔ ہندوستان کو یہ قانونی حق حاصل نہیں کہ وہ سندھ طاس معاہدہ کو ختم کرنے کا یکطرفہ فیصلہ کرے، اس معاہدے میں ورلڈ بینک ایک ضامن کے طور پر موجود ہے۔

ہندوستان کی طرف سے یہ اعلان اس خطہ کوبدامنی اور جنگ میں دھکیلنے کی کوشش ہے۔یہ ایوان پاکستان کی قومی سلامتی کمیٹی کے اجلاس کے فیصلوں کی مکمل تائید کرتا ہے۔ پاکستان کے اس دلیرانہ موقف کو جموں و کشمیر کے عوام سراہتے ہیں۔ پاکستان کی قومی سلامتی کمیٹی کے فیصلے ہندوستان کے توسیع پسندانہ اور جارحانہ اقدامات کا موثر جواب ہیں۔یہ ایوان ہندوستان کی قابض افواج کی طرف سے سیز فائر لائن کی خلاف ورزیوں اور بلا اشتعال فائرنگ کی مذمت کرتا ہے اور پاکستان کی بہادر افواج کی طرف سے ہندوستان کو بھر پور جواب دینے پر ان کو بھرپور خراج تحسین پیش کرتا ہے۔

یہ ایوان چیف آف آرمی سٹاف جنرل عاصم منیر کی طرف سے کشمیریوں کے حق خودار دایت کے حوالہ سے دوٹوک اور اصولی موقف اپنانے، مقبوضہ کشمیر میں انسانی حقوق کی خلاف ورزیوں کو اجاگر کرنے، ہندوستان کے ہندتوا ایجنڈا کو دنیا کے سامنے بے نقاب کرنے اور ہندوستان کی دھمکیوں کا پوری قوت اور جذبہ ایمانی سے جواب دینے پر ان کو خراج تحسین پیش کرتا ہے۔

یہ ایوان اس عزم کا اعادہ کرتا ہے کہ جموں و کشمیر کے عوام پاکستان کے دفاع اور سلامتی کے لیے افواج پاکستان کے شانہ بشانہ لڑیں گے اور اس ملک کے دفاع کے لیے کسی بھی قربانی سے دریغ نہیں کریں گے۔یہ ایوان ہندوستان کے توسیع پسندانہ عزائم کو عالمی امن اور سلامتی کے لیے خطرہ سمجھتا ہے۔ہندوستان کی حکومت کی طرف سے ہندوستان میں مذہبی اقلیتوں بالخصوص مسلمانوں کے مذہبی مقامات اور عقائد پر حملوں اور حکومت کی سرپرستی میں ان کو اپنے مذاہب چھوڑنے کے لیے قتل کرنے، تشدد اور جائیدادوں کو تباہ کرنے کے اقدامات کی مذمت کرتا ہے۔

یہ ایوان قائد ایوان کی طرف کشمیری عوام کی خواہشات اور امنگوں کے مطابق دلیرانہ اور دوٹوک موقف پیش کرنے پر خراج تحسین پیش کرتا ہے اور قائد ایوان کے اس موقف کو ریاست جموں وکشمیر کے عوام کا اجتماعی موقف سمجھتا ہے۔یہ ایوان مقبوضہ جموں کشمیر کے شہدا کو خراج عقیدت پیش کرتا ہے اور حریت پسند عوام کے عزم،حوصلہ اور استقامت پر ان کو خراج تحسین پیش کرتا ہے۔

مقبوضہ کشمیر کے بہادر عوام کو یقین دلاتا ہے کہ آزاد کشمیر کی حکومت اور عوام اس جد و جہد آزادی میں ان کے شانہ بشانہ ہیں اور رہیں گے۔ مقبوضہ جموں و کشمیر میں حق خودارا دیت کی جدوجہد عالمی قوانین اور اقوام متحدہ کی قراردادوں کے عین مطابق ہے۔ ہندوستان کا کوئی بھی اقدام کشمیر کی متنازعہ حیثیت کو ختم نہیں کر سکتا۔ یہ ایوان اقوام متحدہ اور بین الاقوامی برادری سے مطالبہ کرتا ہے کہ اقوام متحدہ کی قراردادوں پر عملدرآمد کے لیے ہندوستان کو مجبور کریں اور مقبوضہ کشمیر میں انسانی حقوق کی سنگین خلاف ورزیوں کا نوٹس لیں۔