گورنر خیبرپختونخوا فیصل کریم کنڈی سے آفریدی قبائل کے نمائندہ وفد کی ملاقات

اتوار 4 مئی 2025 20:00

پشاور (اُردو پوائنٹ اخبارتازہ ترین - اے پی پی۔ 04 مئی2025ء) گورنر خیبر پختونخوا فیصل کریم کنڈی سے آفریدی قبائل کے ایک نمائندہ وفد نے ملک شاہ محمود اور ملک بسم اللہ کی قیادت میں پبلک ڈے کے موقع پر گورنر ہاؤس پشاور میں ملاقات کی۔ ملاقات کے دوران قبائلی عمائدین نے فاٹا انضمام کے بعد پیدا ہونے والے مسائل، قبائلی علاقوں میں بڑھتی ہوئی بدامنی اور ترقیاتی منصوبوں میں قبائل کو نظر انداز کیے جانے پر شدید تحفظات کا اظہار کیا۔

قبائلی عمائدین نے مطالبہ کیا کہ قبائلی رسم و رواج کے مطابق جرگہ نظام کو بحال کیا جائے تاکہ مقامی سطح پر انصاف کا نظام مضبوط ہو۔ انہوں نے صدر آصف علی زرداری کے سابقہ دور حکومت میں ایف سی آر میں کی گئی اصلاحات کو سراہتے ہوئے کہا کہ پیپلز پارٹی نے ہمیشہ قبائلی عوام کے حقوق کے لیے عملی کردار ادا کیا۔

(جاری ہے)

گورنر فیصل کریم کنڈی نے وفد کو یقین دہانی کرائی کہ ان کے تحفظات کو متعلقہ حکام تک پہنچایا جائے گا اور قبائلی علاقوں کی ترقی اور امن کےلیے سنجیدہ اقدامات کیے جائیں گے۔

انہوں نے کہا کہ ریاست نے ترقیاتی کاموں کے لیئے سو ارب کا وعدہ کیا۔ سرتاج عزیز کمیشن میں اضافی رقم کا بھی وعدہ کیا گیا تھا وہ مکمل رقم نہیں ملی جو تھوڑی بہت رقم ملی وہ وزیراعلیٰ نے من پسند علاقوں میں خرچ کی اور قبائل کا استحصال کیا۔ یہی وجہ ہے کہ قبائل کی نوجوان نسل اب انضمام کے خلاف ہورہی ہے۔ وزیر اعظم پاکستان تک قبائل کے تحفظات پہنچائے، وفاقی حکومت نے اس حوالہ سے مثبت اقدامات کی یقین دہانی کرائی ہے۔

انہوں نے کہا کہ تمام قبائل کا مشترکہ جرگہ بناکر ایک یادداشت تیار کرتے ہیں اس کی روشنی میں جرگہ کی صدر پاکستان آصف علی زرداری اور وزیراعظم پاکستان محمد شہباز شریف سے ملاقات کرائی جائے گی۔ وفد نے قبائل کے مسائل کے حل میں دلچسپی لینے اور انکے حل کے لیئے قائدانہ کردار ادا کرنے کے جذبہ پر گورنر فیصل کریم کنڈی کو خراج تحسین پیش کیا۔