بھارت کے بزدلانہ حملے میں پاکستان میں شہادتیں

لاہور ( اردوپوائنٹ اخبار تازہ ترین ۔ 06 مئی 2025ء ) بھارت کے بزدلانہ حملے میں پاکستان میں شہادتیں ۔ تفصیلات کے مطابق بھارت کی جانب سے پاکستان کے مختلف علاقوں پر کیے گئے حملے کے نتیجے میں 3 شہادتیں اور 12 افراد کے زخمی ہونے کی تصدیق کر دی گئی۔ 2 افراد آزاد کشمیر کے علاقے کوٹلی میں شہید ہوئے، 1 معصوم بچہ بھی جام شہادت نوش کر گیا، 12 افراد احمد پور شرقیہ میں ہونے والے حملے میں زخمی ہوئے۔

دوسری جانب بھارت کے بزدلانہ حملے کے فوری بعد پاکستان نے جوابی کاروائی کا آغاز کر دیا۔ بھارت کے بزدلانہ حملے کے بعد پاکستان نے منہ توڑ جواب دیتے ہوئے بھارت کے 2 جنگی جہاز مار گرائے ہیں، اس دوران پاکستان کے کسی جنگی طیارے کو نقصان نہیں پہنچا۔ زمینی محاذ پر بھی پاک فوج کی جانب سے متعدد مقامات پر جوابی کاروائیاں جاری ہیں، پاکستان نے بھارت کا بریگیڈ ہیڈکوارٹر تباہ کر دیا ، دودھیال سیکٹر پر بھارت کی پوری چیک پوسٹ بھی تباہ کر دی ۔

(جاری ہے)

اس تمام صورتحال میں پاکستان کے اہم ائیرپورٹس بند کر دیے گئے ۔ پاکستان پر بھارت کے بزدلانہ حملے کے بعد لاہور ائیرپورٹ ہنگامی طور پر بند کر دیا گیا، اسلام آباد، سیالکوٹ اور فیصل آباد کے ائیرپورٹس کو بھی 48 گھنٹے کیلئے بند کر دیا گیا، تمام پروازوں کو واپس بھیج دیا گیا۔ جبکہ پاکستان پر رات کے اندھیرے میں کیے گئے بزدلانہ حملے کے حوالے سے بھارت کی وزارت دفاع کا بیان سامنے آیا ہے۔

بھارت کی وزارت دفاع نے پاکستان پر کیے گئے بزدلانہ حملے کو "آپریشن سندور" کا نام دیتے ہوئے دعوٰی کیا ہے کہ پاکستان میں کل 9 مقامات پر حملہ کیا گیا۔ بھارت کی وزارت دفاع نے دعوٰی کیا ہے کہ پاکستان اور آزاد کشمیر میں کسی ملٹری سائٹ کو نشانہ نہیں بنایا گیا۔ واضح رہے کہ بھارت نے پاکستان پر میزائل حملے کر دیے۔ پاکستان کے کئی شہروں میں زور دار دھماکے ہونے کے بعد تصدیق کی گئی ہے کہ بھارت کی جانب سے پاکستان پر بزدلانہ حملہ کیا گیا ہے۔

پاک فوج کے ترجمان میجر جنرل احمد شریف نے اے آر وائی نیوز سے گفتگو کرتے ہوئے تصدیق کی کہ بھارت نے پاکستان کے 3 مقامات پر میزائل حملے کیے ہیں۔ آزاد کشمیر میں کوٹلی اور مظفرآباد کے علاوہ بہاولپور میں بھارت نے اپنی فضائی حدود سے میزائل داغے۔ ترجمان پاک فوج نے کہا کہ پاکستانی فضائیہ متحرک ہے بھارتی طیاروں کو پاکستان کی حدود میں نہیں آنے دیا۔

بھارت نے شرمناک اور بلااشتعال حملہ کیا ہے، میزائل حملے کے نقصان کا تخمینہ لگایا جا رہا ہے۔ بزدل دشمن بھارت کے ان حملوں کا پاکستان بھرپور جواب دے گا، پاکستان وقت کا تعین کر کے بھرپور جواب دے گا۔ اس سے قبل دیر رات کو ملک کے 2 بڑے شہروں میں زور دار دھماکے ہونے کی اطلاعات سامنے آئی ہیں۔ اس حوالے سے اے آر وائی نیوز کے مطابق پنجاب کے شہر بہاولپور اور آزاد کشمیر کے شہر مظفرآباد میں دیر رات کو دھماکے ہوئے۔

اے آر وائی نیوز کے مطابق بہاولپور میں 4 دھماکوں کے بعد رات کے وقت آسمان پر تیز روشنی چھا گئی جبکہ پورا شہر لرز اٹھا۔ دھماکوں کے بعد شہری خوفزدہ ہو کر گھروں اور عمارتوں سے باہر نکل آئے۔ آزاد کشمیر کے دارالحکومت مظفرآباد میں بھی زوردار دھماکے سنائی دیے گئے۔