پاکستان کے خلاف بھارت کی جارحیت، وزیر اعلی خیبر پختونخوا علی امین گنڈاپور کی زیر صدارت صوبائی کابینہ کا ہنگامی اجلاس

پشاور (اُردو پوائنٹ اخبارتازہ ترین - اے پی پی۔ 07 مئی2025ء) وزیر اعلی خیبر پختونخوا علی امین گنڈاپور کی زیر صدارت صوبائی کابینہ کا ہنگامی اجلاس منعقد کیاگیا۔وزیر اعلی ہائوس پشاور کی جا نب سے جاری بیان کے مطابق اجلاس میں سپیکر صوبائی اسمبلی، صوبائی اسمبلی میں اپوزیشن لیڈر، کابینہ اراکین، چیف سیکرٹری، آئی جی پی، ایڈیشنل چیف سیکرٹری اور انتظامی سیکرٹریز سمیت متعلقہ افراد نے شرکت کی ۔

اجلاس میں بھارتی جارحیت کے نتیجے میں شہید ہونے والوں کے درجات کی بلندی اور ملکی سلامتی کے لئے دعا کی گئی ۔اجلاس میں کابینہ کا بھارتی جارحیت پر سخت رد عمل کا اظہار اور جارحانہ اقدام کی شدید الفاظ میں مذمت کی جبکہ ملکی دفاع کے لئے ہر قسم کی قربانی دینے کے عزم کا اظہار کیا گیا اور بھارتی جارحیت کا منہ توڑ جواب دینے کے لئے سکیورٹی فورسز کو ہر قسم کے تعاون کی یقین دہانی کی گئی ۔

(جاری ہے)

اجلاس میں کابینہ کو پاک بھارت کشیدگی کی صورتحال پر بریفنگ دی گئی ۔اجلاس میں کا بینہ نے متفقہ طور ہر بھارت کی طرف سے جارحیت قابل مذمت اور افسوسناک قرار دے دیا اور کہا گیا کہ ہے بھارت کی طرف سے رات کی تاریکی میں شہری آبادی کو نشانہ بنانا انتہائی شرمناک اور بزدلانہ اقدام ہے۔کابینہ نے کہا کہ بھارت کا یہ اقدام بین الاقوامی قوانین کی سنگین خلاف ورزی ہے۔

اجلاس سے خطاب کرتے ہوئے وزیراعلی خیبرپختونخوا علی امین گنڈاپور نے کہا کہ ہم یہاں سے بھارت کو پیغام دینا چاہتے ہیں کہ ہم ملک کی دفاع کے لئے ہر وقت تیار ہیں۔انہوں نے کہا کہ بحیثیت مسلمان ہمارے لئے سب سے بڑا رتبہ شہادت ہے اور ہم شہادت کے لئے ہر وقت تیار ہیں، ہم کشمیر اور پنجاب کے عوام کے ساتھ کھڑے ہیں اور انہیں ہر ممکن تعاون کا یقین دلاتے ہیں،ملکی دفاع کے لئے ہم سب متحد ہیں، 25 کروڑ عوام ملک کی فوج ہے، مودی کی جارحانہ پالیسی اس کے اپنے ہی لوگوں اور ملک کو خطرے میں ڈال رہا ہے۔

انہوں نے کہا کہ پاکستان اپنے تحفظ کے لئے بھر پور جواب دینے کا حق رکھتا ہے، ہمارے سکیورٹی فورسز بھارتی جارحیت کا بھر پور جواب دے رہے ہیں،بھارتی جارحیت کا بھر پور اور بروقت جواب دینے پر سکیورٹی فورسز کو خراج تحسین پیش کرتے ہیں، خیبر پختونخوا کی عوام اور حکومت سکیورٹی فورسز کے ساتھ بھر پور یکجہتی کا اظہار کرتے ہیں۔انہوں نے کہا کہ بھارتی فاشسٹ حکومت کا جارحانہ رویہ خطے کے امن کے لئے مستقل خطرہ ہے، بھارت ہماری امن کی خواہش کو کمزوری نہ سمجھے، ہم اینٹ کا جواب پتھر سے دیں گے۔انہوں نے کہا کہ عالمی برادری بھارت کے اس جارحانہ رویے کا سخت نوٹس لے، خیبر پختونخوا کے عوام ملک کی دفاع کے لئے کسی بھی قربانی سے دریغ نہیں کریں گے ۔