خطے میں سب سے زیادہ دہشتگردی سے متاثر ہونیوالا ملک پاکستان ہے،شہبازشریف

اسلام آباد(اُردو پوائنٹ اخبارتازہ ترین - این این آئی۔ 07 مئی2025ء)وزیر اعظم شہباز شریف نے کہاہے کہ خطے میں سب سے زیادہ دہشتگردی سے متاثر ہونے والا ملک پاکستان ہے،بھارت نے جارحیت کرکے جو فاش غلطی کی، اس کا خمیازہ ضرور بھگتنا ہوگا، پوری دنیا نے دیکھا کہ کئی گنا بڑے دشمن کو گھٹنے ٹیکنے میں صرف چند گھنٹے لگے،بھارتی 5جنگی طیارے،جو ان کا غرور تھے، اب صرف راکھ، ملبہ اور نشان عبرت بن چکے، پاکستان نے روایتی ہتھیاروں کی جنگ میں بھی اپنی برتری دشمن پر ایک مرتبہ پھر ثابت کردی،اس موقع پرچیئرمین جوائنٹس چیف آف اسٹاف کمیٹی جنرل ساحر شمشاد مرزا، آرمی چیف جنرل عاصم منیر، فضائیہ کے سربراہ ایئر مارشل ظہیر احمد بابر ، بحریہ کے سربراہ ایڈمرل نوید اشرف سمیت افواج پاکستان کے ہر سپاہی اور افسر کو سلام پیش کرتا ہوں،شہیدوں کے خون کے ایک ایک قطرے کا ضرور حساب لیا جائے گا۔

(جاری ہے)

بدھ کووزیر اعظم شہباز شریف نے قوم سے خطاب کرتے ہوئے کہاکہ گزشتہ رات بھارت نے جارحیت کرکے جو فاش غلطی کی، اس کا خمیازہ اب اسے ضرور بھگتنا ہوگا۔انہوں نے کہاکہ شاید وہ سمجھ بیٹھے تھے کہ ہم پیچھے ہٹ جائیں گے لیکن وہ یہ بات بھول گئے کہ یہ بہادروں کی قوم ہے، جو اپنے عزم میں فولادی ہے، جس کے سپوتوں نے خود کو میدان جنگ سے نکھارا ہے، جو اپنے وطن کی عزت اور حفاظت کیلئے خون کے آخری قطرے تک لڑنے کیلئے تیار ہے۔

شہباز شریف نے کہاکہ گزشتہ رات پوری دنیا نے دیکھا کہ عددی اعتبار سے کئی گنا بڑے دشمن کو گھٹنے ٹیکنے میں صرف چند گھنٹے لگے اور اللہ کے فضل و کریم سے ہمارے شاہینوں نے فضا میں ایسا طوفان برپا کیا کہ دشمن چیخ اٹھا، بھارت کے 5جنگی طیارے، جو ان کا غرور تھے، اب صرف راکھ، ملبہ اور نشان عبرت بن چکے۔وزیراعظم نے کہا کہ یہ ہمارا دندان شکن جواب تھا جس میں اسکوارڈن لیڈر ایم ایم عالم کی گرج تھی، جو کل رات دوبارہ پورے زور سے گونجی اور ہمارے شاہینوں نے دشمن پر ایسی کاری ضربیں لگائیں، جو وقت کا مرہم بھی کبھی نہیں بھر سکے گا۔

شہباز شریف نے کہاکہ بھارت کے بزدلانہ حملوں نے 26معصوم شہری شہید اور 46زخمی ہوئے، ان میں بچے اور خواتین شامل ہیں۔وزیراعظم نے کہاکہ گزشتہ روزایک بچے کی نماز جنازہ پڑھا اس کی عمر صرف 7سال تھی، اپنی والدہ اور بھائی کے ساتھ گھر پر تھا کہ اسپرنٹر لگا اور وہ اللہ تعالی کو پیارہ ہو گیا، دل پر ہاتھ رکھ کر بتائیں کہ ننھا منہ پھول کھیلنے سے پہلے مرجھا گیا۔

انہوں نے کہا کہ شہادت کے بلند رتبے پر ایسے ہی فائز ہونے والے ہمارے دوسرے عظیم پاکستانیوں کو قوم خراج عقیدت پیش کرتی ہے اور پورا پاکستان ان شہدا کے خاندانوں کے ساتھ ہے اور زخمیوں کی صحت یابی کیلئے دعا گو ہے۔انہوںنے کہاکہ ہم یہ عہد کرتے ہیں کہ ان شہیدوں کے خون کے ایک ایک قطرے کا ضرور حساب لیا جائے گا، یہ وہ بزدل دشمن ہے، جو نہتے انسانوں پر وار کرکے خود کو طاقتور سمجھتا ہے، لیکن گزشتہ رات ہم نے ثابت کر دیا کہ پاکستان اپنے دفاع میں منہ توڑ جواب دینا جانتا ہے۔

وزیراعظم نے کہا کہ پوری قوم اپنی بہادر افواج کی جرات اور دلیری کو سلام پیش کرتی ہے، لائن آف کنٹرول پر ایک گھنٹے پر محیط جاری رہنے والی فضائی جنگ میں پاکستانی پائلٹس نے اپنی سرحدی حدود میں رہتے ہوئے اعلیٰ ترین اور پیشہ ورانہ مہارت، بہادری اور بے مثال شجاعت سے دشمن کے جہازوں کے پرخچے اڑا دیئے۔انہوںنے کہاکہ گزشتہ رات کے معرکے میں پاکستان نے روایتی ہتھیاروں کی جنگ میں بھی اپنی برتری دشمن پر ایک مرتبہ پھر ثابت کردی، میں اس موقع پر چیئرمین جوائنٹس چیف آف اسٹاف کمیٹی جنرل ساحر شمشاد مرزا، بری فوج کے سپہ سالار جنرل عاصم منیر، فضائیہ کے سربراہ ایئر مارشل ظہیر احمد بابر اور بحریہ کے سربراہ ایڈمرل نوید اشرف سمیت افواج پاکستان کے ہر سپاہی اور افسر کو سلام پیش کرتا ہوں۔

انہوںنے کہاکہ عوام کو یقین دلاتا ہوں کہ 24کروڑ پاکستانیوں کو آپ پر فخر اور ناز ہے۔وزیراعظم نے کہاکہ میری عزیز ہم وطنو! پہلگام واقعے کے آڑ میں بھارتی حملہ بے بنیاد اور بلا جواز ہے، امن پسند ملک کے طور پر پاکستان نے اس واقعے کی غیرجانبدارانہ اور شفاف تحقیقات کی تھی، جس کی دنیا نے بھرپور تائید کی لیکن بھارت نے عالمی قانون اور بین الاقوامی تقاضوں کو پامال کرتے ہوئے جارحیت کا راستہ اختیار کیا۔

انہوں نے کہاکہ عالمی قوانین اور اقوام متحدہ کی قراردادوں کے مطابق مقبوضہ جموں کشمیر ایک مسلمہ تنازع تھا، ہے اور اس وقت تک رہے گا جب تک کشمیری بھائیوں اور بہنوں کو اقوام متحدہ کے زیر نگرانی، آزادنہ، غیر جانبدارانہ ماحول میں حق رائے دہی نہیں مل جاتا۔وزیراعظم شہباز شریف نے کہا کہ بھارت بے شک 100یکطرفہ فیصلے کر لے مگر اس سے حقیقت کبھی نہیں بدلے گی، میرے بھائیوں اور بہنوں!اس خطے میں دہشتگردی سے سب سے زیادہ متاثر ہونے والا ملک پاکستان ہے، ہم نے دہشتگردی کے خلاف جنگ میں 90ہزار قیمتیں شہادتیں دیں، 152ارب ڈالر سے زائد کے مالی نقصان برداشت کیے۔انہوںنے کہاکہ یہ بھارت کی خام خیالی ہے کہ اس کی موجودہ مہم جوئی دہشتگرد کے خاتمے کی جنگ سے ہماری توجہ ہٹا سکے گی۔