بھارت کی پھر دراندازی؛ ڈرون حملوں میں پاک فوج کے 4 جوانوں سمیت 6 زخمی، 1 شہری شہید

راولپنڈی ( اُردو پوائنٹ اخبارتازہ ترین۔ 08 مئی 2025ء ) ڈی جی آئی ایس پی آر لیفٹیننٹ جنرل احمد شریف چوہدری کا کہنا ہے کہ بھارت کی جانب سے پھر اندازی کی کوشش کی گئی، اس دوران لاہور میں ڈرون گرنے سے پاک فوج کے 4 جوان زخمی اور سندھ میں ایک شہری شہید ہوگیا۔ میڈیا بریفنگ کے دوران انہوں نے بتایا کہ 7 اور 8 مئی کی رات بھارت نے دوبارہ جارحیت کا مظاہرہ کیا، بھارت نے گزشتہ رات مختلف مقامات پر ڈرون بھیجے، پاک فوج نے لاہور، گوجرانولا، چکوال، راولپنڈی، اٹک، بہاولپور، میانو، چھور اور کراچی سمیت 12 شہروں میں بھارتی ڈرون مار گرائے، ڈرون گرنے سے ایک شخص جاں بحق اور 2 زخمی ہوئے، ایک بھارتی ڈرون پاکستانی فوجی تنصیب سے ٹکرایا جس میں پاک فوج کے 4 اہلکار زخمی ہوئے اور عسکری سامان کو معمولی نقصان پہنچا۔

(جاری ہے)

بتایا گیا ہے کہ سندھ کے ضلع گھوٹکی کی تحصیل ڈہرکی میں پیش آیا، جہاں بارڈر کے قریب گرنے والے بھارتی ڈرون کے دھماکے سے ایک کسان جاں بحق دو افراد شدید زخمی ہوئے، جاں بحق ہونے والے کی شناخت فوری طور پر نہیں ہوئی، زخمیوں کو طبی امداد کے لیے ہسپتال منتقل کر دیا گیا، ڈرون کے ملبے کو سیکیورٹی فورسز نے قبضے میں لے لیا اور تحقیقات جاری ہیں۔

اسی طرح چکوال کے تھانہ ڈھمن کی حدود میں دیوالیاں گاؤں کے قریب بھی ایک ڈرون گرا، عینی شاہدین نے بتایا کہ گرنے سے قبل سائرن کی آوازیں سنی گئیں۔ خوش قسمتی سے اس واقعے میں کوئی جانی نقصان نہیں ہوا، تاہم ڈرون کے بھارتی ساختہ ہونے کے شواہد ملے ہیں، جن کی تحقیقات پولیس اور حساس ادارے کر رہے ہیں۔ بتایا جارہا ہے کہ شیخوپورہ کے گاؤں باہومان میں بھی پاک فوج نے دشمن کا ایک اور ڈرون مار گرایا، جو کھیتوں میں گرا، جس سے کوئی جانی نقصان نہیں ہوا، تاہم سکیورٹی اداروں نے علاقے کو گھیرے میں لے کر ملبے کی جانچ شروع کر دی ہے، گجرات کے علاقے پیر جنڈ میں گرنے والے بھارتی ڈرون کے دو ٹکڑے الگ الگ جگہوں پر گرے، ایک حصہ کھیتوں میں اور دوسرا شہری مہندی خان کے گھر کی چھت توڑتا ہوا اندر جاگرا، خوش قسمتی سے کمرے میں کوئی فرد موجود نہ ہونے کے باعث کوئی جانی نقصان نہیں ہوا، پولیس نے ملبہ قبضے میں لے کر تحقیقات شروع کر دیں۔

معلوم ہوا ہے کہ لاہور ایئرپورٹ کے قریب بھی بھارت کی جانب سے سرحد پار سے آپریٹ کیا جانے والا 5 سے 6 فٹ لمبا ڈرون گرایا گیا، یہ ڈرون حساس مقامات کی جاسوسی کے لیے استعمال ہو رہا تھا اور دھماکہ خیز مواد سے لیس تھا، ڈرون کو سسٹم جام کرکے گرایا گیا، جس کے دوران ایک زوردار دھماکہ بھی سنا گیا، واقعہ کے بعد پولیس اور سیکیورٹی اداروں نے علاقے کو سیل کردیا، علاوہ ازیں کراچی کے علاقے ملیر شرافی گوٹھ میں بھی ایک ڈرون گرایا گیا، جہاں ریسکیو اور فائر بریگیڈ کی ٹیمیں موقع پر پہنچ ہو چکی ہیں۔