ہندوستان دو منہ والا سانپ اور مودی سند یافتہ دہشت گرد اور مسلمانوں کا قاتل ہے راجہ فاروق حیدر

پہلگام فالس فلیگ آپریشن کے ذریعے پاکستان کے ساتھ کشیدگی کی آڑ میں مقبوضہ کشمیر میں کشمیریوں کی نسل کشی کررہا ہے ، سابق وزیر اعظم

جمعہ 9 مئی 2025 22:34

مظفرآباد (اُردو پوائنٹ اخبارتازہ ترین - این این آئی۔ 09 مئی2025ء)سابق وزیراعظم آزادکشمیر راجہ محمد فاروق حیدر خان نے کہاہے کہ ہندوستان دو منہ والا سانپ اور مودی سند یافتہ دہشت گرد اور مسلمانوں کا قاتل ہے پہلگام فالس فلیگ آپریشن کے ذریعے پاکستان کے ساتھ کشیدگی کی آڑ میں مقبوضہ کشمیر میں کشمیریوں کی نسل کشی کررہا ہے ۔ میڈیا سے گفتگو کرتے ہوئے انہوںنے کہاکہ مقبوضہ کشمیر میں قابض فوج کی جانب سے 3ہزار نوجوانوں کو جبری طور پر لاپتہ کردیا گیا درجنوں مکانات تباہ کردیے گئے ۔

انہوںنے کہاکہ مودی غزہ طرز پر کاروائی کرنا چاہتا ہے اسرائیل اور ہندوستان پاکستان کے خلاف ایک ہیں ۔ انہوںنے کہاکہ پاکستان کی افواج کے منہ توڑ جواب نے مودی اور اسرائیل کے عزائم خاک میں ملا دیے ۔

(جاری ہے)

انہوںنے کہاکہ 48 سال کی شادی شدہ خواتین کو مقبوضہ کشمیر سے جبری طور پر واپس بھیجنا انسانیت دشمنی کی بدترین مثال ہے ،ہندوستان بین الاقوامی قوانین، اقوام متحدہ کی قراردادوں کی سنگین خلاف ورزی کررہا ہے ۔

انہوںنے کہاکہ حکومت پاکستان ہندوستان کی جارحیت کے ساتھ ساتھ انسانیت دشمنی کی یہ بدترین مثالیں بھی دنیا کے سامنے رکھے ۔راجہ فاروق حیدر نے کہاکہ بحیثیت کشمیری ہمارے اوپر لائن آف کنٹرول عبور کرنے پر کوئی پابندی نہیں اگر حالات یہی رہے تو ہم لائن آف کنٹرول عبور کرنے سے دریغ نہیں کرینگے ۔