Live Updates

پاکستانی قوم ہر مشکل سے نبرد آزما ہونے کی بھرپور صلاحیت رکھتی ہے، عظیم کامیابی پراللہ کے حضور سجدہ شکر بجا لاتے ہیں، حمزہ شہباز

اتوار 11 مئی 2025 13:40

لاہور (اُردو پوائنٹ اخبارتازہ ترین - اے پی پی۔ 11 مئی2025ء) سابق وزیراعلی پنجاب حمزہ شہباز شریف نے کہا ہے کہ پاکستانی قوم ہر مشکل وقت سے نبرد آزما ہونے کی بھرپور صلاحیت رکھتی ہے، پاکستان کی عظیم کامیابی پر خدائے بزرگ و برتر کے حضور سجدہ شکر بجا لاتے ہیں،آپریشن ''بنیان المرصوص'' نے پاکستان کی مسلح افواج کی پوری دنیا میں دھاک بٹھا دی ہے۔

(جاری ہے)

اتوار کے روز پاک بھارت جنگ بندی پر جاری اپنے ایک بیان میں انہوں نے کہا کہ بھارتی جارحیت کے خلاف پاکستان کی عظیم کامیابی پر خدائے بزرگ و برتر کے حضور سجدہ شکر بجا لاتے ہیں، اس جنگ میں پاکستانی فوج کی قابلیت اور فضائیہ کی پیشہ ورانہ مہارت کی مثالیں چہاردانگ عالم دی جا رہی ہیں ۔

حمزہ شہباز نے کہا کہ ملک کا تاریخی دفاع اور دلیر کمان کرنے پر سپہ سالار خصوصی تحسین کے مستحق ہیں ۔ انہوں نے مزید کہا کہ وزیراعظم محمدشہباز شریف کی زیرک اور بردبار قیادت نے اس مشکل وقت میں ملک کو سرخرو کیا،اس عظیم کامیابی میں وزیراعظم کی موثر خارجہ پالیسی کا ہاتھ ہے، اس فتح نے ثابت کر دیا کہ پاکستانی قوم ہر مشکل سے نبرد آزما ہونے کی بھرپور صلاحیت رکھتی ہے۔