پاکستان ہمیشہ امن کا خواہاں رہا ہے، عالمی اداروں نے بھارت کے جھوٹے پراپیگنڈے کو یکسرمسترد کردیا ہے،گورنر پنجاب

پیر 12 مئی 2025 20:00

لاہور (اُردو پوائنٹ اخبارتازہ ترین - اے پی پی۔ 12 مئی2025ء) گورنر پنجاب سردار سلیم حیدر خان نے کہا کہ پاکستان ہمیشہ امن کا خواہاں رہا ہے، عالمی اداروں نے بھارت کے جھوٹے پراپیگنڈے کو یکسرمسترد کردیا ہے،ہماری بری،بحری اور پاک فضائیہ نے بھارتی حکومت کی نیندیں اڑا دیں،ہمارے سپہ سالار ملکی سا لمیت کا دفاع کرنا جانتے ہیں۔ ان خیالات کا اظہار انہوں نے پبلک ٹرانسپورٹ کمپنیز کے وفد سے ملاقات کے دوران کیا۔

گورنر پنجاب نے کہا کہ پبلک ٹرانسپورٹ کا لوگوں کو اپنی منزل پر پہنچانے میں اہم کردار ہے۔انہوں نے کہا کہ عوام کو جدید، محفوظ اور آرام دہ سفری سہولیات فراہم کرنا ٹرانسپورٹ کمپنیوں کی ذمہ داری ہونی چاہئے۔انہوں نے کہا کہ ڈرائیورز حضرات تیز رفتاری سے گریز کریں تاکہ سڑک پر مختلف حادثات سے بچا جاسکے۔

(جاری ہے)

انہوں نے کہا کہ ٹرانسپورٹرز کروڑوں روپے کا ٹول ٹیکس و دیگر ٹیکس ادا کرتے ہیں ان کو سہولیات فراہم کرنا حکومتی ترجیحات میں شامل ہونا چاہئے ۔

انہوں نے کہا کہ وطن عزیز کی تعمیر و ترقی ،خوشحالی اور استحکام کیلئے ہم سب کو مل کر کردار ادا کرنا ہے۔ اس موقع پر وفد نے گورنر پنجاب کو انہیں درپیش مختلف مسائل سے آگاہ کیا۔ وفد نے کہا کہ غیر قانونی اور بلا جواز بھاری جرمانوں کے ساتھ روٹ پرمنٹ و لائسنس کی منسوخی سے ٹرانسپورٹ کمپنیوں کو کروڑوں کا نقصان ہورہا ہے،ٹرانسپورٹز کیلئے موٹر وے پولیس اور ہائی وے پولیس کا ڈرائیوروں کے ساتھ ناروا سلوک انتہائی مشکل اور تکلیف دہ بات ہے۔

انہوں نے کہا کہ ہائی وے پر سست رفتار ٹریفک جس میں سائیکل،موٹر سائیکل،پیدل چلنے والے اورمویشیوں کی گزرگاہوں کیلئے مناسب انداز میں الگ گرین بیلٹ بنائیں جائیں۔انہوں نے ٹرانسپورٹرز کے مسائل کے حل کیلئے ہر ممکن تعاون کا یقین دلایا۔ وفد میں ٹرانسپورٹرز کی مختلف کمپنیوں سے تعلق رکھنے والے نمائندے موجود تھے۔