Live Updates

ٹیکس چوروں، معاونت کرنیوالے کیساتھ قومی خزانہ لوٹنے والے حکمرانوں کا بھی احتساب کیاجائے،جامعت اسلامی سندھ

پیپلزپارٹی کی جانب سے ارکان کے اثاثہ جات ظاہرکرنے کی مخالفت میں ترمیم کی تجویز چورکی داڑھی میں تنکے کے مترادف ہے، اب ملک سے مافیاز کی سیاست ختم کرنا ہوگی،کاشف سعید شیخ

بدھ 14 مئی 2025 21:05

کراچی(اُردو پوائنٹ اخبارتازہ ترین - این این آئی۔ 14 مئی2025ء)امیرجماعت اسلامی سندھ کاشف سعید شیخ نے کہاہے کہ ٹیکس چوروں، معاونت کرنے والے افسران کے ساتھ ملک لوٹنے والے حکمرانوں کے کیخلاف بھی سخت کارروائی کی جائے، قانون سب کے لیے ایک ہونا چاہے۔چھوٹے اورکمزور لوگوں کو تومعمولی سا بجلی کا بل بروقت ادا نہ کرسکنے پرپکڑلیاجاتاہے مگرپورا ملک لوٹنے والے طاقتورلوگ تو خود کو آئین وقانون سے ہی بالاترسمجھتے ہیں۔

میڈیارپورٹس کے مطابق پاکستان میں سالانہ پانچ ہزار ارب روپے سے زیادہ کی کرپشن ہوتی ہے، یہ بدعنوانی عام آدمی نہیں، حکمران طبقہ کرتا ہے۔معیشت کی بدحالی، مہنگائی سے لیکر اسٹیل ملز،ریلوے، پی آئی اے ودیگر ادارے خسارے میں جبکہ حکمرانوں کے کاروبار واثاثہ جات میں اضافہ ہوجا تا ہے۔

(جاری ہے)

انہی چوروں کو پھرفارم 47میں لپیٹ کرعوام پرمسلط کردیا جاتا ہے۔

پانامہ لیکس سے لیکرعدالتوں میںان کے خلاف کرپشن کے مقدمات اس کا واضح ثبوت ہے۔ اس لیے یہاں ایک نہیں دوپاکستان ہیں ایک غریب اوردسرا طاقتوراشرافیہ کا۔ملکی دولت لوٹ کربیرون ملک اثاثے اورمحلات بنانے والے ملک وقوم کے وفادار نہیں ہوسکتے۔انہوں نے آج ایک بیان میں پیپلزپارٹی کے ارکان اسمبلی کی جانب سے ارکان کے اثاثہ جات ظاہرکرنے کی مخالفت میں ترمیم کی تجویز کوچورکی داڑھی میں تنکے کے مترادف قراردیتے ہوئے کہاکہ گوکہ الیکشن کمیشن میں جمع کرائے گئے گوشوارے بھی نامکمل ہوتے ہیں جس کی بناء پرکئی ارکان اپنی نشست سے بھی ہاتھ دھو بیٹھے مگر اس کے باوجود اثاثہ جات چھپانے اور الیکشن کمیشن پرعدم اعتمادکی باتیں سمجھ سے بالاتر ہے۔

عوام کو پتہ ہوناچاہیے کہ ان کانمائندہ الیکشن سے قبل اوربعد میں کتنے اثاثہ جات کامالک ہے۔صوبائی امیر نے کہاکہ حکمرانوں کی غلط پالیسیوں وکرپشن کی وجہ سے عو ام کا مہنگائی، بیروزگاری کی وجہ سے جینا دشوار ہوگیا، اب ملک سے مافیاز کی سیاست ختم کرنا ہوگی، 76سال عوام نے حکومتوں کو دیکھ لیا، کوئی بھی اس ملک اور عوام کی حالت کو بہتر نہیں کر سکا۔