ملازمین کو نوکری سے نکالنے کے بجائے بحال کرنا اور روزگار کے نئے مواقع پیدا کرنا پیپلز پارٹی کی ترجیحات میں شامل ہے، فیصل کریم کنڈی

جمعہ 16 مئی 2025 21:13

اسلام آباد (اُردو پوائنٹ اخبارتازہ ترین - این این آئی۔ 16 مئی2025ء)گورنر خیبر پختونخوا فیصل کریم کنڈی نے کہا ہے کہ ملازمین کو نوکری سے نکالنے کے بجائے بحال کرنا اور روزگار کے نئے مواقع پیدا کرنا پیپلز پارٹی کی ترجیحات میں شامل ہے ان خیالات کا اظہار انہوں نے آل ایمپلائیز کوارڈینیشن کونسل کے وفد سے گفتگو کے دوران کیا وفد میں وفاقی اور صوبائی محکمہ جات کے ملازمین کی یونینوں کے رہنماء شامل تھے، وفد کی قیادت شاہ ذوالقرنین اور اسلم خان کررہے تھے ، گورنر خیبرپختونخوا نے کہا کہ آپ کے چارٹر آف ڈیمانڈ کو وفاقی حکومت تک پہنچانے میں بطور وکیل میں کام کرونگا پیپلز پارٹی مزدور طبقہ کو پاکستان کی ترقی میں سب سے اہم تسلیم کرتی ہے اور یہی وجہ ہے کہ شہید ذوالفقار علی بھٹو کے مشن کے مطابق پیپلز پارٹی نے اقتدار میں ہمیشہ مزدورں کے حقوق کو فوقیت دی ۔

(جاری ہے)

انہوں نے کہا کہ تنخواہوں میں اضافہ ، پنشن میں ملازمین کے ساتھ مبینہ زیادتی ، محکمہ جات کی پرائیویٹائزیشن اور دیگر مسائل پر ملازمین کے شکوک وشبہات کو ختم کرنے کے لیئے وفاقی حکومت کو سنجیدگی سے کام کرنا ہوگا ۔ انہوں نے کہا کہ صوبائی حکومت زیادتیاں کررہی ہے ٹیکس پر ٹیکس لگائے جارہے ہیں مزدوروں سرکاری ملازمین کے حقوق غصب کیئے جارہے ہیں ، زمیندار سراہا احتجاج ہیں ، کرپشن عروج پر ہے۔

انہوں نے کہا کہ انہی زیادتیوں کے خلاف 26 مئی کو پیپلز پارٹی پشاور میں صوبائی سطح پر احتجاج کررہی ہے ۔انہوں نے کہا کہ خیبرپختونخوا اسمبلی میں پیپلز پارٹی کے اراکین ، صوبائی صدر اور ہماری صوبائی جماعت آپکے ساتھ ہے۔اس موقع پرمزدور راہنماؤں نے کہا کہ ہمارے وفد کوٹا ئم دینے پر ہم آپکے شکر گزار ہیں ، ہمارے صوبہ کے گورنر پاکستان پیپلز پارٹی سے تعلق رکھتے ہیں یہ پارٹی کا صوبہ پر احسان ہے، مزدوروں کو یونین سازی کا حق شہید ذوالفقار علی بھٹو نے دیااور مزدور ہمیشہ پیپلز پارٹی کو اپنا محسن تسلیم کرتے ہیں، وفد میں مزدور راہنماء عبدالمناف ، حبیب اللہ عمر زئی ، ریاض خان ، اشفاق باچا اور دیگر شامل تھے۔