وزیرداخلہ محسن نقوی سے قطر کے سفیر کی ملاقات،دوطرفہ تعلقات،حالیہ دورہ قطر سمیت پاک بھارت سیز فائر کے بعد کی صورتحال پر تبادلہ خیال

پیر 19 مئی 2025 17:14

اسلام آباد(اُردو پوائنٹ اخبارتازہ ترین - این این آئی۔ 19 مئی2025ء)وفاقی وزیر داخلہ محسن نقوی سے قطر کے سفیر علی مبارک علی عیسیٰ الخطیر نے ملاقات کی جس میں پاکستان اور قطر کے درمیان تعلقات سمیت دو طرفہ امور پر تبادلہ خیال کیا گیا جبکہ وفاقی وزیرداخلہ محسن نقوی کے حالیہ دورہ قطر کے حوالے سے بھی گفتگو کی گئی۔ ملاقات میں پاکستان اور بھارت کے مابین سیز فائر کے بعد کی صورتحال پر بھی بات چیت کی گئی۔

وزیر داخلہ محسن نقوی اس موقع پر کہا کہ پاکستان ہمیشہ امن کا داعی رہا ہے اور ہم خطے میں پائیدار امن چاہتے ہیں۔ انہوں نے کہا کہ قطر کا حالیہ دورہ انتہائی کامیاب رہا، قطر کے وزیر اعظم، نائب وزیراعظم اور وزیر داخلہ کے ساتھ ملاقاتوں میں دوطرفہ تعاون کو آگے بڑھانے پر اتفاق کیا گیا، انسدادِ منشیات، انسداد دہشتگردی، سیکورٹی تعاون اور تربیتی پروگرامز پر بھی سیر حاصل گفتگو کی گئی۔

(جاری ہے)

وزیر داخلہ نے واضح کیا کہ تمام شعبوں میں قطر کے ساتھ تعاون کو فروغ دینا پاکستان کی ترجیح ہے۔ انہوں نے کہا کہ قطر کے اعلی حکام نے فالواپ وزٹ پر جلد پاکستان آنے پر اتفاق کیا ہے، وفاقی سیکرٹری داخلہ کی قیادت میں اعلیٰ سطح کا وفد بھی قطر کا دورہ کرے گا، وفد میں وزارت داخلہ کے ماتحت اداروں کے سربراہاں شامل ہوں گے۔ وفاقی وزیرداخلہ محسن نقوی نے اس بات پر زور دیا کہ قطر پاکستان کا قابل اعتماد شراکت دار ہے، قطر کے ساتھ تعلقات کو قابلِ فخر اثاثہ سمجھتے ہیں۔ وفاقی سیکرٹری داخلہ محمد خرم آغا اور دیگر حکام بھی اس موقع پر موجود تھے۔