Live Updates

9 مئی کے مقدمات میں عمران خان کا پولی گرافک ٹیسٹ کروانے سے انکار

لاہور کی عدالت نے عمران خان کا پولی گرافک ٹیسٹ کرنے کی اجازت دی تھی

منگل 20 مئی 2025 17:55

9 مئی کے مقدمات میں عمران خان کا پولی گرافک ٹیسٹ کروانے سے انکار

راولپنڈی (اُردو پوائنٹ اخبارتازہ ترین - این این آئی۔ 20 مئی2025ء)اڈیالہ جیل میں قید بانی پاکستان تحریک انصاف (پی ٹی آئی) عمران خان نے پولی گرافک ٹیسٹ کرانے سے انکار کردیا، لاہور پولیس کی ٹیم 9 مئی کے مقدمات میں بانی کے پولی گرافک ٹیسٹ کیلیے اڈیالہ جیل پہنچی تھی۔راولپنڈی کی اڈیالہ جیل میں بانی پی ٹی آئی عمران خان نے پولی گرافک ٹیسٹ کرانے سے انکار کر دیا، بانی پی ٹی آئی نے وکلا کی عدم موجودگی میں ٹیسٹ کیلئے شامل تفتیش ہونے سے انکار کیا۔

پولیس ٹیم کے پہنچنے پر جیل کا عملہ نے عمران خان کو سیل میں بلانے کے لیے گیا تاہم وہ نہیں آئے، لاہور پولیس کی 11 رکنی ٹیم ڈپٹی سپرنٹنڈنٹ آف پولیس ڈی ایس پی آصف جاوید کی سربراہی میں اڈیالہ جیل آئی تھی۔تفتیشی ٹیم میں انسپکٹر محمد اسلم، انسپکٹر محمد عالم اور انسپکٹر محمد ارحم کے علاوہ پنجاب فارنزک یونٹ کے عابد ایوب بھی شامل تھے۔

(جاری ہے)

تفتیشی ٹیم بانی پی ٹی آئی عمران خان کا 9 مئی کے کیسز میں پولی گرافک ٹیسٹ کیلئے آئی تھی۔یاد رہے کہ 14 مئی کو لاہور کی انسداد دہشتگردی کی خصوصی عدالت نے عمران خان کا پولی گرافک ٹیسٹ کروانے کی اجازت دی تھی۔9 مئی کے مقدمات میں پولیس نے عمران خان کا پولی گرافک اور فوٹوگرافک ٹیسٹ کرانے کا فیصلہ کیا گیا تھا، جس کے لیے پراسیکیوشن نے انسداد دہشت گردی عدالت میں باقاعدہ درخواست جمع کرائی تھی۔

درخواست میں مؤقف اپنایا گیا تھا کہ بانی پی ٹی آئی سے 9 مئی واقعات کے حوالے سے سچائی جانچنے کے لیے پولی گرافک سمیت دیگر ضروری سائنسی ٹیسٹ کروائے جانا اہم ہے تاہم عدالت میں سماعت کے دوران بانی پی ٹی آئی کے وکیل بیرسٹر سلمان صفدر نے درخواست کی سخت مخالفت کی تھی۔ابتدائی دلائل میں انہوںنے کہاکہ 2 سال بعد ایسی درخواست دائر کرنا بدنیتی پر مبنی ہے۔