سکول بس پر حملہ بے رحمانہ ہے، امریکی ناظم الامور کی خضدار میں سکول بس میں ہونے والے دھماکے کی مذمت

اسلام آباد(اردوپوائنٹ اخبار تازہ ترین۔21 مئی 2025)امریکی ناظم الامور کی بلوچستان کے علاقے خضدار میں سکول بس میں ہونے والے دھماکے کی مذمت، خضدار میں سکول بس پر حملہ بے رحمانہ ہے، سفاکانہ حملے کی مذمت میں پاکستان کے ساتھ ہیں،پاکستان میں امریکہ کی قائم مقام سفیر نٹالی بیکر نے اپنے ایک بیان میں کہا ہے کہ دکھ کی اس گھڑی میں متاثرہ خاندانوں کے غم میں برابر کے شریک ہیں۔

دہشتگردانہ حملے میں معصوم بچوں کا قتل ناقابل فہم ہے۔کسی بچے کو سکول جاتے ہوئے خوف کا شکار نہیں ہونا چاہیے۔ ہم پاکستان میں ان لوگوں کے ساتھ کھڑے ہیں جو اس تشدد کے خاتمے کیلئے کوشاں ہیں۔قائم مقام امریکی سفیر نٹالی بیکر کامزید کہنا تھا کہ خضدار میں ہونے والے دھماکے کے زخمیوں کی جلد صحت یابی کیلئے دعاگو ہوں۔

(جاری ہے)

واضح رہے کہ اس سے قبل آج بلوچستان کے ضلع خضدار میں اسکول کے بچوں کو لے کر جانے والی بس پر خودکش حملے کے نتیجے میں 3 طالبات سمیت 5 افراد شہید جب کہ 38 زخمی ہوگئے تھے۔

بھارتی سپانسرڈ دہشت گردوں نے خضدار میں زیرو پوائنٹ کے قریب سکول بس کو خودکش دھماکے سے نشانہ بنایا تھا۔ڈپٹی کمشنر خضدار نے کہا تھا کہ دھماکے میں 38 بچے زخمی ہوئے تھے ۔ زخمیوں کو سی ایم ایچ خضدار منتقل کر دیا گیا تھا جہاں انہیں طبی امداد فراہم کی گئی تھی۔ڈپٹی کمشنر (ڈی سی) خضدار کا کہنا تھا کہ ابتدائی تحقیقات میں معلوم ہوا ہے کہ سکول بس میں دھماکا خود کش بمبار کی جانب سے خود کو اڑانے کے بعد ہواتھا۔

سکول بس میں سوار 4 بچے شہید ہوئے تھے۔پولیس حکام کے مطابق دھماکے سے بس کو شدید نقصان پہنچا تھا تاہم پولیس و فورسز کی نفری جائے وقوعہ پر پہنچ گئی تھی اور علاقے میں سرچ آپریشن شروع کر دیا گیا تھا۔ پولیس کا کہنا تھا کہ مزید معلومات سامنے آنے پر میڈیا اور عوام سے شیئر کی جائیں گی۔پاک فوج کے شعبہ تعلقات عامہ آئی ایس پی آر کے مطابق بلوچستان کے علاقے خضدارمیںسکول بس پر دہشتگرد حملہ کیا گیا، بزدلانہ حملے میں سکول کے معصوم بچوں کی بس کونشانہ بنایا گیا تھا۔

آئی ایس پی آر نے کہا تھاکہ واقعے میں تین معصوم بچے اور دو نوجوان شہید جبکہ متعدد بچے زخمی ہوئے تھے۔ آپریشن "بنیان مرصوص میں شرمناک ناکامی اور سیکیورٹی فورسز کے موثر تعاقب کے بعد بھارت اپنے ان دہشت گرد نیٹ ورکس کو بطور ریاستی ہتھیار استعمال کر رہا تھا تاکہ پاکستان میں نہتے شہریوں اور بچوں کو نشانہ بنایا جا سکے۔آئی ایس پی آر کے مطابق خضدار میں بزدلانہ حملے کی منصوبہ بندی دہشتگرد ریاست بھارت میں کی گئی تھی۔

بلوچستان میں بھارتی پراکسیز نے اس بھیانک منصوبے کو انجام دیا تھا۔میدان جنگ میں ناکامی پربھارت بلوچستان اورکے پی میں پراکسیز سے دہشتگردی کروا رہا تھا۔وزیراعلیٰ بلوچستان سرفراز بگٹی کابھی کہنا تھا کہ شہدا میں بس ڈرائیور اور ہیلپر شامل تھے جب کہ شدید زخمیوں کو ائیر لفٹ کرکے سی ایم ایچ کوئٹہ منتقل کردیا گیا تھا۔ انہوں نے کہا تھا کہ آج بزدل دہشتگردوں نے خضدار میں اسکول بس پر کاربم حملہ کیا تھا ۔ بھارتی پراکسیز کالعدم بی ایل اے اور بی ایل ایف بھارت کے ایما پر معصوم بچوں کو نشانہ بنارہی تھیں۔ آج کے حملے میں ملوث دہشتگردوں کوچن چن کر جہنم واصل کیا جائے گا۔