91 فیصد پاکستانی عمران خان کے ساتھ کھڑے ہیں، فوری رہا کیا جائے، حلیم عادل شیخ

کراچی (اُردو پوائنٹ اخبارتازہ ترین - این این آئی۔ 26 مئی2025ء)راجپوت سوسائٹی، سہراب گوٹھ ٹان میں پاکستان تحریک انصاف (پی ٹی آئی)کے چیئرمین عمران خان کی رہائی کے لیے "عمران ٹائیگرز" کراچی کے رہنما نوید صدیقی کی جانب سے ورکرز کنونشن کا انعقاد کیا گیا۔ کنونشن میں پی ٹی آئی سندھ کے صدر حلیم عادل شیخ، جنرل سیکریٹری ڈاکٹر مسرور سیال، پی ٹی آئی رہنما فہیم خان، ارسلان خالد، رکنِ سندھ اسمبلی چوہدری اویس، ساجد میر، سربلند خان، آفتاب جہانگیر، رانا وسیم اکرم، امجد جاہ، نذیر اللہ محسود، صیم خان، نازش فاطمہ، عائشہ رشید، حسنہ ندیم بٹ سمیت بڑی تعداد میں کارکنان اور خواتین نے شرکت کی۔

ورکرز کنونشن کے بعد چیئرمین عمران خان کی رہائی کے مطالبے کے تحت پی ٹی آئی سندھ کے صدر حلیم عادل شیخ کی قیادت میں ایک بائیک ریلی بھی نکالی گئی، جو راجپوت سوسائٹی سے الاصف اسکوائر تک جاری رہی۔

(جاری ہے)

ریلی میں کارکنان نے جوش و خروش سے شرکت کی اور عمران خان کی فوری رہائی کو مطالبہ کیا۔تقریب سے خطاب کرتے ہوئے پی ٹی آئی سندھ کے صدر حلیم عادل شیخ نے کہا کہ91 فیصد پاکستانی عمران خان کے ساتھ کھڑے ہیں، پوری قوم ان کی رہائی کی خواہش مند ہے۔

ان عوام کا کوئی سیاسی مفاد نہیں بلکہ وہ صرف علامہ اقبال کے خواب کی تکمیل اور قائداعظم کے دیے ہوئے پاکستان کو بچانے کے لیے عمران خان کے ساتھ ہیں۔انہوں نے مزید کہا کہ کراچی بانیانِ پاکستان کا شہر ہے اور ہم یہ ملک چوروں اور لٹیروں کے حوالے نہیں کرنا چاہتے۔ پورا سندھ تبدیلی کے لیے تیار ہے، اور عید کے بعد عمران خان کی کال پر ایک بڑی تحریک کا آغاز کیا جائے گا۔

قوم متفقہ حکمتِ عملی پر متحد ہے اور سڑکوں پر نکلنے کے لیے تیار ہے۔حلیم عادل شیخ نے عمران خان اور ان کی اہلیہ بشری بی بی کے ساتھ جیل میں روا رکھے جانے والے سلوک کی شدید مذمت کرتے ہوئے کہا کہ "قوم کے عظیم رہنما کو جھکانے کے لیے اس کی بیوی پر ظلم کیا جا رہا ہے، جو انتہائی افسوسناک ہے۔ یہ قوم کے جذبات سے کھیلنے کے مترادف ہے، جو نفرتوں کو جنم دے رہا ہے۔

ہمیں نفرت نہیں، اتحاد کی ضرورت ہے۔"انہوں نے کہا کہ بھارت کی جارحیت کے موقع پر قوم نے اتحاد کا مظاہرہ کرکے ثابت کیا تھا کہ پاکستان کی سالمیت پر کوئی سمجھوتہ ممکن نہیں۔ انہوں نے مزید کہا کہ عوام کے مینڈیٹ کو چوری کرنے والوں کو عوام کی نمائندگی کا کوئی حق حاصل نہیں۔ جس لیڈر کو عوام نے ووٹ دے کر منتخب کیا، اسے جھوٹے مقدمات میں جیل بھیج دیا گیا اور ملک کی سب سے بڑی جماعت کو دیوار سے لگانے کی کوشش کی جا رہی ہے۔

انہوں نے مطالبہ کیا کہ ظلم، جبر اور بربریت کی رات اب ختم ہونے کو ہے، قوم کا ایک ہی مطالبہ ہے کہ عمران خان، پارٹی رہنماں اور ہزاروں کارکنوں کو، جو جھوٹے مقدمات میں قید ہیں، فوری طور پر رہا کیا جائے۔کنونشن سے پی ٹی آئی سندھ کے جنرل سیکریٹری ڈاکٹر مسرور سیال، کراچی کے سینئر نائب صدر فہیم خان، آفتاب جہانگیر، نوید صدیقی سمیت دیگر رہنماں نے بھی خطاب کیا۔