Live Updates

بھارت 28 اور10 مئی کے دن کو کبھی نہیں بھولے گا‘ عظمیٰ بخاری

بدھ 28 مئی 2025 16:51

لاہور (اُردو پوائنٹ اخبارتازہ ترین - این این آئی۔ 28 مئی2025ء) وزیر اطلاعات پنجاب عظمیٰ بخاری نے کہا ہے کہ 28مئی پاکستان کی تاریخ کا ایک سنہری اور ناقابلِ فراموش دن ہے، جو قوم کی سربلندی اور خودداری کی علامت بن چکا ہے۔انہوں نے یومِ تکبیر کے موقع پر اپنے خصوصی پیغام میں کہا کہ قائد محمد نوازشریف نے 28مئی 1998کو عالمی دبا، معاشی پابندیوں اور امریکی آفرز کو مسترد کرتے ہوئے جرات مندانہ فیصلہ کیا اور ایٹمی دھماکے کر کے پاکستان کو اسلامی دنیا کی پہلی ایٹمی قوت بنایا۔

عظمیٰ بخاری نے کہا کہ میاں نوازشریف نے امریکی دبا کے جواب میں صاف اور دو ٹوک الفاظ میں ’’ابسلوٹلی ناٹ‘‘کہہ کر قومی غیرت کا علم بلند کیا۔میاں نوازشریف نے ملکی خودمختاری کو ہر چیز پر مقدم رکھتے ہوئے بھارت کے غرور کو خاک میں ملایا اور پاکستان کے دفاع کو ناقابلِ تسخیر بنا دیا۔

(جاری ہے)

انہوں نے کہا کہ آج ہماری افواج ہر میدان میں دشمن پر برتری حاصل کر رہی ہیں، اور یہ سب اس مضبوط فیصلے کا تسلسل ہے جو 28مئی 1998ء کو کیا گیا تھا۔

ان کا مزید کہنا تھا کہ بھارت 10مئی کو اپنے ایٹمی دھماکوں پر ناز کرتا رہا لیکن پاکستان نے 28مئی کو اسے منہ توڑ جواب دے کر اس کا غرور خاک میں ملا دیا۔ بڑے بھائی نواز شریف نے بھارت کے غرور کو توڑا جبکہ دوسرے بھائی شہباز شریف نے اسے دھول چٹا دی۔اپنے بیان کے اختتام پر انہوں نے کہا کہ محمد نوازشریف نہ صرف پاکستان بلکہ پوری امتِ مسلمہ کے لیے ایک قابلِ فخر رہنما ہیں، جنہوں نے ہر مشکل گھڑی میں پاکستان کے مفاد کو ترجیح دی اور دنیا کو باور کرایا کہ پاکستان ایک خوددار اور خودمختار ملک ہے۔