چوہدری شافع حسین سے پاکستان مسلم لیگ کے سینئر عہدیداران کے وفد کی ملاقات

لاہور (اُردو پوائنٹ اخبارتازہ ترین - این این آئی۔ 03 جون2025ء) پاکستان مسلم لیگ پنجاب کے جنرل سیکرٹری وصوبائی وزیر صنعت و تجارت چوہدری شافع حسین سے پارٹی کے سینئر عہدیداران کے وفد نے ان کے آفس میں ملاقات کی وفد میں پاکستان مسلم لیگ کے چیف آرگنائزر ڈاکٹر محمد امجد ، مرکزی نائب صدر مہرین ملک آدم ،غلام مصطفی ملک مرکزی سیکرٹری اطلاعات ، ایڈیشنل سیکرٹری جنرل ڈاکٹر رحیم اعوان مرکزی جوائنٹ سیکرٹری عاطف مغل،صدر فیڈرل کیپٹل رضوان صادق خان اور دیگر شامل تھے ۔

ملاقات میں پارٹی کے تنظیمی امور ،ملک کی مجموعی سیاسی صورتحال اور پنجاب میں سرمایہ کاری کے فروغ پر بات چیت ہوئی ۔وفد نے پنجاب میں سرمایہ کاری کے فروغ کیلئے چوہدری شافع حسین کی کاوشوں کو سراہا ۔صوبائی وزیر صنعت و تجارت چوہدری شافع حسین نے وفد سے گفتگو کرتے ہوئے کہا کہ پنجاب کو سرمایہ کاری کا مرکز بنادیا ہے ۔

(جاری ہے)

سازگار ماحول کے باعث ملکی اور غیر ملکی سرمایہ کار پنجاب کو سرمایہ کاری کیلئے ترجیح دے رہے ہیں ۔

چین سمیت دیگر غیر ملکی سرمایہ کار کمپنیاں پنجاب میں کارخانے لگا رہی ہیں مقامی سرمایہ کار بھی پنجاب میں نئے کارخانے لگا رہے ہیں۔صوبائی وزیر صنعت و تجارت چوہدری شافع حسین نے وفد سے گفتگو کرتے ہوئے کہا کہ مسلم لیگ نے پاکستان بنایا اور یہی جماعت ملک کو ترقی کی راہ پر گامزن کرے گی پاکستان مسلم لیگ کے صدر چوہدری شجاعت حسین کی قیادت میں عوام کی خدمت کا سفر جاری رکھیں گے ۔

چوہدری شجاعت حسین نے ہمیشہ رواداری اور خدمت کی سیاست کی ہے ان کی شرافت اور رواداری کی سیاست کو ہی آگے بڑھا رہے ہیں ۔چوہدری شافع حسین نے کہا کہ پاکستان کی دلیر اور بہادر افواج نے مکار دشمن بھارت کا غرور چند گھنٹوں میں خاک میں ملا دیا ۔عبرت ناک شکست سے مودی سرکار بوکھلاہٹ کا شکار ہے ۔مودی کو شکست برداشت نہیں ہورہی ،اس کی گیدڑ بھپکیوں سے ڈرنے کی ضرورت نہیں پاکستان کی مسلح افواج دشمن کی ہر جارحیت کا منہ توڑ جواب دینے کیلئے ہمہ وقت تیار ہے پوری قوم سیسہ پلائی دیوار کی طرح پاک فوج کے ساتھ کھڑی ہے ۔

ہمیں متحد ہو کر ملک کو ترقی اور خوشحالی کی منزل سے ہمکنار کرنا ہے پاکستان مسلم لیگ کو ہر سطح پر منظم اور فعال بنایا جائے گا ۔صوبائی وزیر نے کہا کہ پارٹی عہدیدار اور ورکرز لوگوں سے قریبی رابطہ رکھیں اور ان کے مسائل حل کریں۔