وزیراعظم کے معاون خصوصی سید طارق فاطمی کا روسی فیڈریشن کا دورہ، روسی حکام سے جنوبی ایشیا کی صورتحال اور پاک۔ روس تعلقات میں حالیہ پیشرفت پر بات چیت کی

اسلام آباد (اُردو پوائنٹ اخبارتازہ ترین - اے پی پی۔ 04 جون2025ء) وزیراعظم کے معاون خصوصی سید طارق فاطمی نے روسی فیڈریشن کا تین روزہ دورہ کیا، روسی وزیر خارجہ کے ساتھ ملاقات کے بعد انہوں نے روسی فیڈریشن کے وزیر توانائی اور پاکستان۔روس بین الحکومتی کمیشن کے شریک چیئرمین سرگئی تسیویلوف سے ملاقات کی۔ بدھ کو دفتر خارجہ کے مطابق دونوں فریقوں نے مستقبل میں تعاون کے لیے تجارت، توانائی، کنیکٹویٹی، نئی اسٹیل ملز، سائبر سکیورٹی سمیت کلیدی شعبوں کی نشاندہی کرتے ہوئے دو طرفہ تعلقات کا جامع جائزہ لیا۔

وزیراعظم کے معاون خصوصی نے پاکستان اور روس کے درمیان توانائی کے شعبے میں تعاون کو مزید فروغ دینے کے امکانات پر زور دیا۔ انہوں نے سرگئی تسیویلوف کو جنوبی ایشیا میں ہونے والی حالیہ پیشرفت سے آگاہ کیا جبکہ کشیدگی کو کم کرنے میں روس کے کردار کی تعریف کی۔

(جاری ہے)

سرگئی تسیویلوف نے 2024 میں ماسکو میں منعقد ہونے والے نویں پاکستان۔روس بین الحکومتی کمیشن کے نتائج پر اطمینان کا اظہار کیا اور اس سال پاکستان میں آئی جی سی کے نتیجہ خیز ہونے کی امید ظاہر کی۔

انہوں نے کہا کہ پاکستان "ٹرانزٹ ہب" بننے کی صلاحیت رکھتا ہے۔ سید طارق فاطمی نے خارجہ پالیسی کے امور پر صدر کے سینئر معاون یوری یوشاکوف سے بھی ملاقات کی۔ ملاقات کے دوران وزیراعظم کے معاون خصوصی نے انہیں جنوبی ایشیا میں حالیہ کشیدگی کے بارے میں آگاہ کیا اور بھارت کے جارحانہ اقدامات خاص طور پر یکطرفہ طور پر سندھ طاس معاہدے کو التواءمیں رکھنے کے حوالے سے پاکستان کے موقف سے آگاہ کیا۔

ان ملاقاتوں کے علاوہ وزیراعظم کے معاون خصوصی نے روس کے سرکردہ ٹی وی نیٹ ورکس کو انٹرویوز دیئے جن میں انہوں نے پاک روس تعلقات میں بڑھتے ہوئے مثبت رجحانات اور پاکستان اور بھارت کے درمیان حالیہ کشیدگی پر اپنے واضح خیالات کا اظہار کیا۔ انہوں نے ممتاز پرنٹ اور الیکٹرانک میڈیا کے ماہرین تعلیم اور صحافیوں کے ایک گروپ کے ساتھ بھی تبادلہ خیال کیا۔

جنوبی ایشیا کی صورتحال اور پاکستان۔ روس تعلقات میں ہونے والی حالیہ پیش رفت پر بات چیت کے لیے وزیراعظم کے معاون خصوصی کی والڈائی ڈسکشن کلب نے میزبانی کی جو ماسکو میں ایک باوقار تھنک ٹینک ہے۔ وزیراعظم کے معاون خصوصی کا روس کا دورہ انتہائی کامیاب رہا جس میں کئی اہم سرکاری مصروفیات اور اراکین پارلیمنٹ، تھنک ٹینک، ماہرین تعلیم اور صحافیوں کے ساتھ واضح تبادلہ خیال ہوا۔

اس ودرہ نے حالیہ صورتحال اور دیگر اہم مسائل جیسے کہ سندھ طاس معاہدے کے بارے میں پاکستان کے نقطہ نظر کو روس کے ساتھ واضح طور پر شیئر کرنے کی راہ ہموار کی۔بیان کے مطابق تجارت، سرمایہ کاری، توانائی اور رابطوں کے راستوں کے اہم شعبوں میں پاکستان روس کے ساتھ اپنے تعلقات کو جس انداز میں بڑھا رہا ہے اس کو بڑے پیمانے پر سراہا گیا۔