Live Updates

پی ٹی آئی کا سپیکر قومی اسمبلی ایاز صادق کے بائیکاٹ کا فیصلہ، عمران خان نے پارٹی پارلیمنٹرین کے سرکاری دورے پر پابندی عائد کر دی

سپیکرقومی اسمبلی کی جانب سے مدعو کردہ دیگر تقریبات میں بھی پی ٹی آئی کا کوئی رکن شرکت نہیں کرے گا، بانی پی ٹی آئی کی ہدایت پر کوئی رکن سپیکر کے وفود میں بیرون ملک نہیں جائے گا

فیصل علوی جمعرات 5 جون 2025 12:12

پی ٹی آئی کا سپیکر قومی اسمبلی ایاز صادق کے بائیکاٹ کا فیصلہ، عمران ..

اسلام آباد(اردوپوائنٹ اخبار تازہ ترین۔05 جون 2025)پی ٹی آئی نے قومی اسمبلی کے سیکرٹری ایاز صادق کے بائیکاٹ کا فیصلہ کرلیا، بانی پی ٹی آئی عمران خان نے پارٹی پارلیمنٹرین کے سرکاری دورے پر پابندی عائد کر دی،ذرائع کا کہنا ہے کہ سپیکرقومی اسمبلی کی جانب سے مدعو کردہ دیگر تقریبات میں بھی پی ٹی آئی کاکوئی رکن شرکت نہیں کرے گا، بانی پی ٹی آئی کی ہدایت پر کوئی رکن سپیکر کے وفود میں بیرون ملک نہیں جائے گا۔

قومی اسمبلی کی بزنس ایڈوائزری کمیٹی کی حد تک سپیکر سے ملاقاتیں ہوں گی۔پی ٹی آئی ذرائع کے مطابق اس حوالے سے پارٹی کے تمام اراکین کو مطلع کر دیا گیا ہے۔خیال رہے کہ اس سے قبل یہ اطلاعات سامنے آئیں تھیںکہ پاکستان تحریک انصاف اور اپوزیشن اتحاد نے سپیکر قومی اسمبلی ایاز صادق کے خلاف تحریک عدم اعتماد لانے کا فیصلہ کیاتھا۔

(جاری ہے)

پارٹی ذرائع کے مطابق بانی پی ٹی آئی سے وکلاءاور بہنوں نے ملاقات میں اسپیکر کے خلاف عدم اعتماد کی بات کی، بانی کو اپوزیشن اتحاد اور محمود اچکزئی کے سپیکر کے خلاف عدم اعتماد کے موقف سے آگاہ کیا تھا۔

پارٹی ذرائع کے مطابق بانی پی ٹی آئی نے کہا تھاکہ موجودہ حکومت کو پارلیمنٹ کے باہر اور اندر ٹف ٹائم دیں۔بعدازاںپاکستان تحریک انصاف کے چیئرمین بیرسٹرگوہر کا کہنا تھا کہ پی ٹی آئی نے تحریک عدم اعتماد لانے کا کوئی فیصلہ نہیں کیاتھا۔اسلام آباد میں صحافیوں سے گفتگو میں بیرسٹر گوہر کا کہنا تھا کہ پی ٹی آئی نے تحریک عدم اعتمادکے حوالے سے کوئی میٹنگ نہیں کی گئی تھی۔

بیرسٹر گوہر نے مزید کہا تھاکہ آپس میں بہتری کی طرف جانا چاہیے، عمران خان کی رہائی ہونی چاہیے، آخر وہ کس کیس میں اندر ہیں ؟ انہیں بیل ملنی چاہیے، ہم آپ کو سپورٹ کر رہے تھے۔ آپ بھی ہمیں سپورٹ کریں۔پی ٹی آئی کے سینئر رہنما اسد قیصر نے کہا تھا کہ سپیکر ایاز صادق کے خلاف تحریک عدم اعتماد لانے کا کوئی فیصلہ نہیں کیاگیاتھا۔پشاور میں میڈیا سے گفتگو کرتے ہوئے انہوں نے کہا کہ تحریک عدم اعتماد لائیں گے تو پکا کام کریں گے، فی الحال ایسا نہیںتھا۔اسد قیصر نے کہا کہ کوئی بیک ڈور ملاقاتیں یا مذاکرات نہیں ہو رہے، اگر مذاکرات ہو رہے ہوتے تو ہمارے ساتھ ایسا رویہ رکھا جاتا تھا؟ مذاکراتی نشست کے بارے میں مجھے کوئی علم نہیں تھا۔