Live Updates

شہباز شریف کا ٹرمپ کو امن کا پیامبر قرار دینا ذہنی غلامی کی انتہاء ہوچکی ہے

بدقسمتی سے یہ حکمران امت کے جذبات کی ترجمانی میں بری طرح ناکام ہوگئے ہیں، اسلامی دنیا کے حکمرانوں کی خاموشی سے واضح ہے کہ یہ سب ٹرمپ کی خوشنودی چاہتے ہیں۔ امیر جماعت حافظ نعیم الرحمن

ثنااللہ ناگرہ جمعرات 5 جون 2025 19:44

شہباز شریف کا ٹرمپ کو امن کا پیامبر قرار دینا ذہنی غلامی کی انتہاء ہوچکی ..

لاہور (اُردو پوائنٹ اخبارتازہ ترین۔ 05 جون 2025ء) امیر جماعت اسلامی حافظ نعیم الرحمن نے کہا ہے کہ وزیراعظم شہباز شریف کا ٹرمپ کو امن کا پیامبر قرار دینا ذہنی غلامی کی انتہا ہے۔ سماجی رابطوں کی ویب ایکس پر اظہار خیال کرتے ہوئے انہوں نے کہا کہ امریکا نے ایک بارپھر غزہ میں جنگ بندی کی قرارداد کو ویٹو کردیا ہے، امریکا فلسطینیوں کی نسل کشی میں اسرائیل کا سرپرست ہے اور بموں اور بھوک سے مرنے والے معصوم بچوں اور عورتوں کے قتل عام میں برابر کا شریک ہے جب کہ شہباز شریف ٹرمپ کو امن کی چمپئن شپ کے سرٹیفیکیٹ بانٹ رہے ہیں۔

امیر جماعت نے سوال کیا کہ غلامی اور چاپلوسی اور کیا ہوتی ہے؟ حافظ نعیم الرحمن نے کہا کہ غزہ میں جاری صہیونی دہشت گردی پر اسلامی دنیا کے حکمرانوں کی خاموشی سے واضح ہے کہ یہ سب ٹرمپ کی خوشنودی چاہتے ہیں۔

(جاری ہے)

بدقسمتی سے یہ حکمران امت کے جذبات کی ترجمانی میں بری طرح ناکام ہوگئے ہیں۔ انہوں نے اس مطالبہ کو دہرایا کہ حکومت پاکستان واشنگٹن کی تابعداری کی بجائے اہل فلسطین پر مظالم بند کرنے اور غزہ کا مقدمہ لڑنے میں قائدانہ کردار ادا کرے۔

امیر جماعت نے اس عہد کا اعادہ کیا کہ جماعت اسلامی اہل غزہ کے حق میں بھرپور اور توانا آواز بلند کرتی اور حکمرانوں کو شرم دلاتی رہے گی۔ مزید برآں نائب امیر جماعتِ اسلامی پاکستان لیاقت بلوچ نے لاہور میں کِسان بورڈ پاکستان کے کنونشن میں نومنتخب ذمہ داران کی حلف برداری تقریب سے خطاب کرتے ہوئے کہا کہ وزیراعظم شہباز شریف فیلڈ مارشل جنرل عاصم منیر اور امریکی صدر ڈونلڈ ٹرمپ کی محبت میں سرشار اور گرفتار ہیں، انڈیا خطرناک اور شاطر دشمن ہے، اِس کے مقابلہ کے لیے بُنیان مَّرصُوص والا جذبہ اور قومی وحدت برقرار رکھنا ہوگا۔

پاک بھارت جنگ بندی میں ڈونلڈ ٹرمپ کا کردار اچھا ہے لیکن غزہ پر اسرائیلی صیہونی ظلم اور انسانی قتلِ عام رکوانے کی بجائے اُسے شہہ دینے کے لیے اقوامِ متحدہ کی سلامتی کونسل میں جنگ بندی قراردادوں کو ویٹو کرنا امریکہ کا دُنیا میں اَمن کے قیام کے حوالے سے دوغلے پن کو ظاہر کرتا ہے۔ عالمی اَمن کے لیے کشمیر و فلسطین کے مسائل کا حل ناگزیر ہے۔