تحریک پاکستان کے رہنما سردار عبدالرب نشتر کا یوم پیدائش جمعہ کو منایا گیا

جمعہ 13 جون 2025 14:10

اسلام آباد (اُردو پوائنٹ اخبارتازہ ترین - اے پی پی۔ 13 جون2025ء) تحریک پاکستان کے رہنما سردار عبدالرب نشتر کا یوم پیدائش جمعہ 13 جون کو منایا گیا۔ سردار عبدالرب نشتر بانی پاکستان قائد اعظم کے رفقاء میں کلیدی حیثیت حاصل تھی۔سردار عبدالرب نشتر 13 جون 1899ء کو پشاور کے ایک متوسط گھرانے میں پیدا ہوئے۔انہوں نے 1918ءمیں مشن ہائی سکول سے میٹرک اور ایڈورڈ کالج سے گریجوایشن کے بعد علی گڑھ یونیورسٹی سے ایل ایل بی کی ڈگری 1925 میں حاصل کی۔

وہ 1927ء سے 1931ء تک آل انڈیا کانگریس کے رکن رہے اور 1929ء سے 1938ء تک پشاور میونسپل کمیٹی کے کمشنر بھی رہے۔بعد ازاں سردار عبدالرب نشتر نے 1937ء میں آل انڈیا مسلم لیگ میں شمولیت اختیار کی اور آل انڈیا مسلم لیگ کی کونسل کے رکن بنے اور اپنے اعلیٰ کردار و افکار کے باعث جلد ہی قائد اعظم کے بااعتماد رفقاءمیں شامل ہوگئے۔

(جاری ہے)

وہ صوبہ سرحد کے وزیراعلیٰ بھی رہے۔

10 اگست 1947ء کو پاکستان کی پہلی دستور ساز اسمبلی کی حلف برداری کی تقریب میں رکنیت کے رجسٹر پر دستخط کرنے والے 53 افراد میں سردار عبدالرب نشتر بھی شامل تھے۔ سردار عبدالرب نشتر پنجاب کے دوسرے گورنر تھے اور انہوں نے بطور گورنر پنجاب 2 اگست 1949ء تا 24 نومبر 1951ء فرائض سرانجام دیئے۔سردار عبدالرب نے شعر و سخن کیلئے اپنا تخلص ”نشتر“ تجویز کیا۔بانی پاکستان کے دیرینہ ساتھی اور تحریک پاکستان کے عظیم رہنما سردار عبدالرب نشتر نے 14 فروری 1958ء کی صبح کراچی میں وفات پا گئے اور انہیں مادر ملت محترمہ فاطمہ جناح کے کہنے پر مزار قائد کے احاطے میں دفن کیا گیا۔ان کی سالگرہ کے موقع پر ان کی خدمات کو شاندار انداز میں خراج تحسین پیش کیا گیا۔